Britney Spears DUI: અમેરિકી પોપ સિંગર બ્રિટની સ્પીયર્સ પર કેલિફોર્નિયામાં ડ્રગ્સ અને દારૂના નશામાં ધૂત થઈને ગાડી ચલાવવાનો આરોપ લગાવવામાં આવ્યો છે. વેન્ચુરા કાઉન્ટી ડિસ્ટ્રિક્ટ એટર્નીના અધિકારીઓએ સિંગરને લઈને આ જાણકારી આપી છે. વેન્ચુરા કાઉન્ટી ડિસ્ટ્રિક્ટ એટર્ની ઓફિસે જણાવ્યું છે કે 44 વર્ષીય પોપ સ્ટાર દારૂ પીને અને ડ્રગ્સના નશામાં ગાડી ચલાવી રહી હતી. તેના પર ગુરુવારે આ આરોપ લગાવવામાં આવ્યો છે. જોકે આ મામલે બ્રિટની સ્પીયર્સના રિપ્રેઝન્ટેટિવ તરફથી હાલમાં કોઈ કોમેન્ટ કરવામાં આવી નથી.
કાળી BMW તેજ અને અનિયંત્રિત રીતે ચલાવી રહી હતી
આ ક્રિમિનલ કમ્પ્લેન્ટમાં એ સ્પષ્ટ કરવામાં આવ્યું નથી કે સ્પીયર્સ પર કયા પ્રકારના દારૂ કે ડ્રગ્સનું કેટલી માત્રામાં સેવન કરવાનો આરોપ છે. ‘કેલિફોર્નિયા હાઈવે પેટ્રોલ’ (CHP) મુજબ, સ્પીયર્સની ચાર માર્ચે તે સમયે ધરપકડ કરવામાં આવી હતી જ્યારે તે પોતાના ઘર પાસે US 101 પર પોતાની કાળી BMW તેજ અને અનિયંત્રિત રીતે ચલાવી રહી હતી.
દારૂ અને ડ્રગ્સ લીધા પછી ગાડી ચલાવવાના શંકા હેઠળ ધરપકડ
CHP એ જણાવ્યું કે તે નશામાં લાગતી હતી અને બાદમાં તપાસ પછી તેની દારૂ અને ડ્રગ્સ લીધા પછી ગાડી ચલાવવાના શંકા હેઠળ ધરપકડ કરવામાં આવી અને વેન્ચુરા કાઉન્ટીની જેલમાં લઈ જવામાં આવી. જોકે તેને બીજા દિવસે 23 માર્ચે જામીન પર મુક્ત કરવામાં આવી હતી. સ્પીયર્સના રિપ્રેઝન્ટેટિવએ જણાવ્યું કે ધરપકડના બરાબર એક મહિના પછી સ્પીયર્સ સ્વેચ્છાએ નશા મુક્તિ ઉપચાર કેન્દ્રમાં ભરતી થઈ ગઈ. સ્પીયર્સની રજૂઆત સોમવારે થવાની છે. પ્રોસેક્યુટર્સે જણાવ્યું કે કારણ કે આ એક સામાન્ય અપરાધ છે, તેથી તેને કોર્ટમાં હાજર થવાની જરૂર રહેશે નહીં.
પિતા જેમી સ્પીયર્સ સાથે ચાલી રહેલી લડાઈને લઈને હતી ચર્ચામાં
બ્રિટની સ્પીયર્સ 1990 અને 2000 ના દાયકાની ટોપ પોપ સ્ટાર રહી છે. તેના હિટ ગીતોમાં Baby One More Time, Toxic, Everytime, Gimme More, Womanizer અને Stronger જેવા નામ સામેલ છે. વર્ષ 2000 ના દાયકાની શરૂઆતમાં સ્પીયર્સ ટેબ્લોઇડની હેડલાઇન્સમાં છવાઈ ગઈ કારણ કે તે માનસિક બીમારી સામે ઝઝૂમી રહી હતી. તેની પર્સનલ લાઈફ ઘણી ચર્ચામાં રહી. બ્રિટની અવારનવાર સોશિયલ મીડિયા પર વાંધાજનક કન્ટેન્ટ પોસ્ટ કરતી રહેતી હોય છે. બ્રિટની પોતાના પિતા જેમી સ્પીયર્સ સાથે ચાલી રહેલા ગાર્ડિયનશિપ કેસને લઈને પણ ઘણી ચર્ચામાં રહી હતી. તેના ફાઈનાન્સથી લઈને ખાનગી જીવન સાથે જોડાયેલા મોટાભાગના મામલાઓના નિર્ણય તેના પિતા જેમી સ્પીયર્સ લેતા હતા. જોકે, 2021 માં સપ્ટેમ્બરમાં લાંબી કાનૂની લડાઈ પછી તેને હાલમાં જ પિતાની કન્ઝર્વેટરશિપમાંથી આઝાદી મળી. 13 વર્ષથી પિતાની કન્ઝર્વેટરશિપના બંધનોમાંથી મળેલી આઝાદી પછી બ્રિટનીએ પોતાની તસવીર શેર કરીને લખ્યું હતું, ‘ઈન્ડિપેન્ડન્ટ મહિલા વાળી એનર્જીનો આનાથી સારો અહેસાસ પહેલા ક્યારેય થયો નહોતો.’
કહેવામાં આવ્યું હતું કે તેની માનસિક હાલત ઠીક નથી
અહીં એ પણ જણાવતા જઈએ કે અમેરિકી કાયદા મુજબ ‘કન્ઝર્વેટરશિપ’ હેઠળ વૃદ્ધાવસ્થા કે શારીરિક કે માનસિક સમસ્યાને કારણે કોઈ વ્યક્તિના પૈસા સાથે જોડાયેલા મામલાઓ કે ડેઈલી લાઈફ મેનેજમેન્ટ માટે એક સંરક્ષક એટલે કે કન્ઝર્વેટર પસંદ કરવામાં આવે છે. વર્ષ 2008 માં બ્રિટનીએ ફેડરલાઈનથી છૂટાછેડા લીધા હતા અને ત્યારબાદ કહેવામાં આવ્યું કે તેની માનસિક હાલત ઠીક નથી. બ્રિટની પર ડ્રગ્સ લેવાના પણ આરોપ લાગ્યા. બ્રિટનીના પિતા જેમ્સ સ્પીયર્સે તેની કન્ઝર્વેટરશિપ માટે કોર્ટમાં અરજી કરી હતી અને તેને સ્વીકારી લેવામાં આવી હતી.
