Income Tax Notice: ઘણીવાર કોઈ મિત્ર અથવા સંબંધી કોઈ કારણસર તેમના પૈસા આપણા બેંક એકાઉન્ટમાં જમા કરાવે છે. અથવા ઘણીવાર પરિસ્થિતિ એવી હોય છે કે કોઈ બીજા વ્યક્તિની રકમ આપણે આપણા બેંક એકાઉન્ટમાં જમા કરાવવી પડે છે. જો તમે પણ તમારા બેંક એકાઉન્ટમાં કોઈ બીજા વ્યક્તિની રકમ જમા કરી રહ્યા છો અથવા કરાવી રહ્યા છો, તો તમારી પાસે આ વાતનો નક્કર પુરાવો જરૂર રાખો કે તે રકમ તમારી નથી. નહીંતર તમે ઈન્કમ ટેક્સની મુસીબતમાં પડી શકો છો. આવી જ ઘટના એક વેપારી સાથે બની છે. આ મામલો ઈન્કમ ટેક્સ એપેલેટ ટ્રિબ્યુનલ (ITAT) સુધી પહોંચ્યો, જ્યાંથી તેમને રાહત મળી.
જાણો આખો મામલો
આ સમગ્ર મામલો કર્ણાટકના એક નાના વીજળીના વેપારી રમઝાન મુલ્લા સાથે જોડાયેલો છે. વર્ષ 2016માં જ્યારે નોટબંધી થઈ, ત્યારે તેમણે તેમના બેંક ખાતાઓમાં કુલ 20.99 લાખ રૂપિયા જમા કરાવ્યા હતા. રમઝાનના જણાવ્યા અનુસાર આ પૈસાના બે ભાગ હતા:
8.73 લાખ રૂપિયા તેમની દુકાનનું રોકડ વેચાણ એટલે કે કમાણીના પૈસા હતા.
12.26 લાખ રૂપિયા તેમના પાંચ વૃદ્ધ સંબંધીઓના હતા. આ જૂની એટલે કે નોટબંધીમાં બંધ થઈ ગયેલી નોટો હતી. તે વૃદ્ધો પાસે કાં તો બેંક ખાતું નહોતું અથવા તેઓ પોતે બેંક જવા માટે અસમર્થ હતા. તેથી તેમણે જૂની નોટો બદલવા માટે રમઝાનને આપી હતી.
ઈન્કમ ટેક્સમાંથી મળ્યો નોટિસ
કારણ કે રમઝાન નાના વેપારી છે અને સરકારની પ્રિઝમ્પટિવ ટેક્સેશન સ્કીમ (કલમ 44AD) હેઠળ ટેક્સ ભરે છે. તેથી તેમને રોજબરોજનો આખો હિસાબ-કિતાબ રાખવાની જરૂર નહોતી. તેમ છતાં, પોતાની વાત સાબિત કરવા માટે તેમણે સેલ્સ રજિસ્ટર, વેટ (VAT) રિટર્ન, બેંક સ્ટેટમેન્ટ અને તેમના તે પાંચેય સંબંધીઓના લેખિત સોગંદનામા (એફિડેવિટ) ઈન્કમ ટેક્સ વિભાગને સોંપ્યા.
ઈન્કમ ટેક્સ અધિકારી (AO) આ જવાબથી સંતુષ્ટ નહોતા. તેમનું માનવું હતું કે કોઈ પણ વ્યક્તિ પોતાના સંબંધીઓની જૂની નોટો પોતાના ખાતામાં જમા કરી શકે નહીં. વિભાગે રમઝાનના તમામ પુરાવાઓને ફગાવી દેતા કુલ 20.99 લાખ રૂપિયાને ‘અઘોષિત આવક’ ગણી લીધી અને ભારે ટેક્સનો નોટિસ પકડાવી દીધો.
ITAT એ સંભળાવ્યો મોટો ચુકાદો
જ્યારે રમઝાને આની સામે અપીલ કરી, તો મોટા અધિકારીઓ (CIT-A) એ થોડી રાહત આપતા બિઝનેસના અડધા પૈસાને તો સાચા માન્યા, પરંતુ સંબંધીઓના પૂરા 12.26 લાખ રૂપિયા પર ટેક્સના નિર્ણયને યોગ્ય ઠેરવ્યો.
ત્યારબાદ આ મામલો ટેક્સ કોર્ટ એટલે કે ITAT પાસે પહોંચ્યો. કોર્ટે રમઝાનના તમામ દસ્તાવેજો જેમ કે વેટ રિટર્ન અને સંબંધીઓના સોગંદનામાને સાચા ઠેરવ્યા. કોર્ટે રમઝાનની તરફેણમાં ચુકાદો આપતા ઈન્કમ ટેક્સ વિભાગ દ્વારા લગાવવામાં આવેલી પૂરેપૂરી ટેક્સ ડિમાન્ડ રદ કરી દીધી.
