Gill vs Abhishek T20: શુભમન ગિલ અને અભિષેક શર્મા આમને-સામને, બાળપણના મિત્રો વચ્ચે મેદાન પર જોરદાર ટક્કર
Gill vs Abhishek T20: શેર-એ-પંજાબ T20 લીગમાં ભારતીય ક્રિકેટના બે ગાઢ મિત્રો અને દિગ્ગજ બેટર શુભમન ગિલ અને અભિષેક શર્મા એકબીજા સામે ટકરાતા જોવા મળ્યા. બાળપણથી એકસાથે ક્રિકેટ શીખીને વર્લ્ડ ક્રિકેટ પર છવાઈ જનાર આ બંને સ્ટાર્સનો મોહાલીમાં આમનો-સામનો થયો. ભારતીય ટેસ્ટ અને વનડે ટીમના કેપ્ટન શુભમન ગિલ જ્યાં ફાજિલ્કા ફાલ્કન્સની કમાન સંભાળી રહ્યા હતા, ત્યાં ICC રેન્કિંગમાં ત્રીજા ક્રમાંકના બેટર અભિષેક શર્મા અમૃતસર સૂરમાસ તરફથી મેદાનમાં ઉતર્યા.
શુભમન ગિલે રમી જોરદાર ઇનિંગ
આ હાઇવોલ્ટેજ મુકાબલામાં ફાજિલ્કા ફાલ્કન્સે પ્રથમ બેટિંગ કરતાં 20 ઓવરમાં 6 વિકેટના નુકસાન પર 191 રનનો મોટો સ્કોર બનાવ્યો. કેપ્ટન શુભમન ગિલે મોરચેથી આગેવાની કરતાં માત્ર 35 બોલમાં 8 ચોગ્ગા અને 3 ગગનચુંબી છગ્ગાની મદદથી 67 રનની તોફાની ઇનિંગ રમી. જોકે, ઇનિંગની 10મી ઓવર ખૂબ જ રોમાંચક રહી, જ્યારે અભિષેક શર્મા બોલિંગ કરવા આવ્યા.
શુભમન ગિલને અભિષેકે કર્યો આઉટ
શુભમન ગિલે પ્રથમ બોલ પર સીધો છગ્ગો, ત્રીજા બોલ પર ચોગ્ગો અને પાંચમા બોલ પર ફરીથી છગ્ગો ફટકાર્યો, પરંતુ છેલ્લા બોલ પર મોટો શોટ રમવાના પ્રયાસમાં નમન ધીરને કેચ આપી બેઠા અને અભિષેકે ગિલની વિકેટ લઈને બાજી મારી લીધી. 192 રનના લક્ષ્યાંકનો પીછો કરવા ઉતરેલી અમૃતસર સૂરમાસની ટીમને અભિષેક શર્માએ તોફાની શરૂઆત અપાવી.
View this post on Instagram
અભિષેકની પણ શાનદાર ઇનિંગ
અભિષેકે માત્ર 15 બોલમાં 6 ચોગ્ગા અને 4 છગ્ગા ફટકારીને 49 રનની ધમાકેદાર ઇનિંગ રમી. આ પહેલાં, આ સીઝનની પોતાની પ્રથમ મેચ રમી રહેલા શુભમન ગિલે લુધિયાણા લાયન્સ સામે પણ 21 બોલમાં 7 ચોગ્ગા અને 1 છગ્ગાની મદદથી 40 રન બનાવીને ટીમને શાનદાર શરૂઆત અપાવી હતી.
