Study Abroad Best Countries: વિશ્વસ્તરીય શિક્ષણ મેળવવાનું સપનું જોતા ભારતીય વિદ્યાર્થીઓ માટે સૌથી મોટો અવરોધ ઘણીવાર ટ્યુશન ફી નહીં, પરંતુ સ્ટુડન્ટ વિઝા ઇન્ટરવ્યૂ પાસ કરવા માટે જરૂરી નાણાકીય ભંડોળનો પુરાવો હોય છે. ઑસ્ટ્રેલિયા અને કેનેડા જેવા દેશો હવે વિઝા મંજૂર કરવા માટે જ ₹14 લાખથી ₹17 લાખ સુધીની રકમ લિક્વિડ કૅશ એટલે કે તરત ઉપયોગ કરી શકાય તેવા નાણાં તરીકે રાખવાની કડક માગ કરી રહ્યા છે.
તેવી જ રીતે, અમેરિકા અને બ્રિટન જેવા દેશોમાં પણ અભ્યાસ માટે લિક્વિડ કૅશની જરૂર પડે છે. આને ધ્યાનમાં રાખીને યોગ્ય અને સસ્તો દેશ પસંદ કરવો જરૂરી બની જાય છે. સારી વાત એ છે કે યુરોપના ઘણા દેશો વિઝાની જરૂરિયાતોને અલગ દૃષ્ટિકોણથી જુએ છે. આજે આપણે એવા પાંચ દેશો વિશે જાણીશું, જે સૌથી ઓછા નાણાં એટલે કે લિક્વિડ કૅશનો પુરાવો જોઈને ભારતીયોને સ્ટુડન્ટ વિઝા આપે છે. આ યાદીમાં સામેલ તમામ દેશો યુરોપમાં છે, જ્યાં શ્રેષ્ઠ શિક્ષણ મળે છે.
પોલૅન્ડ
આ યાદીમાં પહેલું નામ પોલૅન્ડનું છે, જ્યાં સ્ટુડન્ટ વિઝા મેળવવા માટે દર વર્ષે 2,166 યુરો એટલે કે આશરે ₹2.30 લાખ ખાતામાં હોવા જોઈએ. યુરોપિયન યુનિયનમાં નાણાંના પુરાવા માટેની સૌથી ઓછી જરૂરી મર્યાદા પોલૅન્ડમાં છે. પોલૅન્ડની અર્થવ્યવસ્થા ટેક્નોલોજી અને મૅન્યુફૅક્ચરિંગની આસપાસ કેન્દ્રિત છે. આ કારણે આ ક્ષેત્રો સાથે જોડાયેલા અભ્યાસક્રમો માટે પોલૅન્ડ સારો વિકલ્પ પણ છે.
સ્પેન
સ્પેન પોતાના સ્ટુડન્ટ વિઝાની શરતોને સીધી સ્થાનિક જીવનનિર્વાહ ખર્ચના સૂચકાંક (IPREM) સાથે જોડે છે. IPREMમાં વધુ ફેરફાર કરવાની જરૂર પડતી નથી, તેથી ભારતીય વિદ્યાર્થીઓને વધુ લિક્વિડ કૅશની જરૂર પડતી નથી. સ્પેનમાં 10 મહિના માટે 6,000 યુરો એટલે કે આશરે ₹6.38 લાખની જરૂર પડે છે.
ફ્રાન્સ
ફ્રાન્સ પણ ઉચ્ચ શિક્ષણ માટે વિશ્વના શ્રેષ્ઠ વિકલ્પોમાંથી એક છે. ફ્રાન્સમાં લઘુત્તમ વેતનના આધારે સ્ટુડન્ટ વિઝા માટે જરૂરી બચતની રકમ નક્કી કરવામાં આવી છે. હાલમાં કોઈ ભારતીય વિદ્યાર્થીને સ્ટુડન્ટ વિઝા મેળવવો હોય, તો તેણે 10 મહિના માટે 8,775 યુરો એટલે કે ₹9.33 લાખ હોવાનો પુરાવો આપવો પડશે.
ઇટાલી
ઇટાલીમાં સ્ટુડન્ટ વિઝા મેળવવો હોય, તો તમારા ખાતામાં 10,179.85 યુરો એટલે કે આશરે ₹10.82 લાખ હોવા જોઈએ. આ વાર્ષિક રકમ સીધી ઇટાલીના યુનિવર્સિટી અને રિસર્ચ મંત્રાલય હેઠળ નક્કી કરવામાં આવે છે અને વિઝા સંબંધિત દસ્તાવેજો માટે આ રકમનો પુરાવો જરૂરી છે. આ માટે છેલ્લા છ મહિનાના વ્યક્તિગત બેંક ખાતાનો સ્પષ્ટ અને સરળતાથી તપાસી શકાય એવો રેકોર્ડ જરૂરી છે.
જર્મની
જર્મનીમાં સ્ટુડન્ટ વિઝા માટે બ્લૉક અકાઉન્ટ ખોલાવવું પડે છે. આ ખાતામાં કુલ 11,904 યુરો એટલે કે આશરે ₹12.60 લાખ હોવા જોઈએ. જર્મનીમાં ઉચ્ચ શિક્ષણ મેળવવાનો સૌથી મોટો લાભ એ છે કે અહીંની સરકારી યુનિવર્સિટીઓમાં ટ્યુશન ફી ચૂકવવી પડતી નથી. કમ્પ્યુટર સાયન્સ હોય કે મિકેનિકલ એન્જિનિયરિંગ, દરેક પ્રકારના અભ્યાસક્રમ માટે જર્મની શ્રેષ્ઠ વિકલ્પ છે.
