India-Malaysia Strategic Partnership: વડાપ્રધાન નરેન્દ્ર મોદીએ રવિવારે પોતાના મલેશિયાઈ સમકક્ષ અનવર ઇબ્રાહિમ સાથે સંરક્ષણ અને સુરક્ષા સંબંધોને મજબૂત કરવા અને આર્થિક તેમજ નવાચાર (ઇનોવેશન) ભાગીદારીને વધારવા પર કેન્દ્રિત વ્યાપક મંત્રણા કરી.
બંને પક્ષો દ્વારા અનેક કરારો પર હસ્તાક્ષર કરવામાં આવે તેવી અપેક્ષા છે, જે સેમિકન્ડક્ટર સહિતના અનેક મુખ્ય ક્ષેત્રોમાં સહયોગ પ્રદાન કરશે. મોદી શનિવારે કુઆલાલમ્પુર પહોંચ્યા જ્યાં તેમનું ભવ્ય સ્વાગત કરવામાં આવ્યું. હવાઈ મથક પર ઇબ્રાહિમે તેમનું સ્વાગત કર્યું જે દ્વિપક્ષીય સંબંધોમાં એક નવી ગતિનો સંકેત છે.
મંત્રણા પહેલા ભવ્ય સ્વાગત
મંત્રણા પહેલા મોદીનું આજે સવારે પર્દાના પુત્રામાં ઔપચારિક સ્વાગત કરવામાં આવ્યું. વિદેશ મંત્રાલયના પ્રવક્તા રણધીર જાયસવાલે કહ્યું, ‘ભારત અને મલેશિયા વચ્ચે સભ્યતાગત, ઐતિહાસિક અને જન-સંબંધો પર આધારિત ગાઢ સંબંધો છે.’ વડાપ્રધાને શનિવારે મલેશિયાની યાત્રા પર રવાના થતા પહેલા પોતાના સંદેશમાં સંકેત આપ્યો હતો કે આ મુલાકાત ગહન સંરક્ષણ સહયોગ અને મજબૂત આર્થિક જોડાણને પ્રોત્સાહન આપવા પર કેન્દ્રિત હશે.
મલેશિયા સાથેના ઐતિહાસિક સંબંધો પર પીએમ મોદીનું નિવેદન
મોદીએ કહ્યું હતું, ‘ભારત અને મલેશિયા વચ્ચેના ઐતિહાસિક સંબંધોમાં તાજેતરના વર્ષોમાં સતત પ્રગતિ થઈ છે. હું વડાપ્રધાન અનવર ઇબ્રાહિમ સાથેની મારી ચર્ચાઓ અને અમારી વ્યાપક વ્યૂહાત્મક ભાગીદારીને વધુ મજબૂત કરવાને લઈને ઉત્સાહિત છું.’
તેમણે ઉમેર્યું હતું કે, ‘અમારું લક્ષ્ય આપણા સંરક્ષણ અને સુરક્ષા સંબંધોને મજબૂત કરવાનું, આપણી આર્થિક અને નવાચાર ભાગીદારીને વધારવાનું તેમજ નવા ક્ષેત્રોમાં આપણા સહયોગનો વિસ્તાર કરવાનું છે.’ ભારત અને મલેશિયાએ ઓગસ્ટ ૨૦૨૪માં પોતાના દ્વિપક્ષીય સંબંધોને વ્યાપક વ્યૂહાત્મક ભાગીદારીના સ્તર સુધી વધાર્યા છે.
