BYD Denza Electric Cars: ચીનની ઑટોમોબાઇલ કંપની BYD પોતાની નવી લક્ઝરી બ્રાન્ડ Denzaને ભારતમાં લૉન્ચ કરવાની તૈયારી કરી રહી છે. ડેન્ઝા (Denza) મૂળરૂપે 2010માં BYD અને મર્સિડીઝ-બેન્ઝ (Mercedes-Benz)નું જૉઇન્ટ વેન્ચર હતું, જેને હવે સંપૂર્ણપણે BYD દ્વારા સંચાલિત કરવામાં આવી રહ્યું છે. ભારતમાં Denzaની એન્ટ્રી BYDના વર્તમાન પોર્ટફોલિયોથી ઉપરના સેગમેન્ટમાં થશે. તે ભારતમાં ₹80 લાખથી વધુ કિંમતવાળી લક્ઝરી ગાડીઓ વેચશે. કંપની બે દમદાર ઑલ-ઇલેક્ટ્રિક મૉડલ્સ Z9 GT ફાસ્ટબૅક અને D9 લક્ઝરી MPV સાથે ભારતમાં એન્ટ્રી કરશે. આવો, તમને ડેન્ઝાની આ બંને લક્ઝરી EVsના ફીચર્સ અને પરફોર્મન્સ વિશે વિગતવાર જણાવીએ.
Denza Z9 GTની વિશેષતાઓ
Denza Z9 GT એક સુપર-પરફોર્મિંગ 4-ડોર ફાસ્ટબૅક કાર છે, જે ફીચર્સ અને પાવરના મામલે પોર્શે ટાયકન (Porsche Taycan) જેવી કારોને પડકાર આપે છે.
- પાવર અને ટૉર્ક – ઑટોકાર ઇન્ડિયાના રિપોર્ટ મુજબ તેમાં 3 ઇલેક્ટ્રિક મોટર્સ લગાવવામાં આવી છે, જે 1,156 hpની જબરદસ્ત પાવર આપે છે.
- ઝડપ – 2.9 ટન વજન હોવા છતાં આ કાર માત્ર 2.7 સેકન્ડમાં 0થી 100 કિલોમીટર પ્રતિ કલાકની ઝડપ પકડી શકે છે. ટૉપ સ્પીડની વાત કરીએ તો તે 270 કિલોમીટર પ્રતિ કલાકની ઝડપે દોડી શકે છે.
- બૅટરી અને રેન્જ – તેમાં 122.5 kWhની બ્લેડ બૅટરી છે, જે 600 કિલોમીટરની રેન્જ આપે છે.
9 મિનિટમાં ચાર્જ થશે Denza Z9 GT
- તેની 1,500 kW ફ્લૅશ અલ્ટ્રા-ફાસ્ટ ચાર્જિંગ ટેક્નૉલૉજીથી કારની બૅટરી 10થી 97% માત્ર 9 મિનિટમાં ચાર્જ થઈ જાય છે.
- તેમાં ચારેય પૈડાંને વાળવાની રિયર-વ્હીલ સ્ટિયરિંગ અને ત્રાંસું ચલાવવાની (Crab-crawl) અનોખી ક્ષમતા છે.
- ભારતમાં તેની કિંમત ₹1.2 કરોડથી ₹1.5 કરોડની વચ્ચે હોઈ શકે છે.
Denza D9ની વિશેષતાઓ
Denza D9 એક પ્રીમિયમ 7-સીટર લક્ઝરી ઇલેક્ટ્રિક MPV છે, જે માર્કેટમાં ટોયોટા વેલફાયર, લેક્સસ LM અને MG M9 જેવી ગાડીઓને ટક્કર આપશે.
- પાવર અને રેન્જ – તેમાં ફ્રન્ટ-વ્હીલ ડ્રાઇવ સેટઅપ સાથે 313 hpની પાવર અને 103 kWhની બ્લેડ બૅટરી મળશે, જે 520 કિલોમીટરની રેન્જ આપશે.
- ફર્સ્ટ-ક્લાસ કૅબિન – કારમાં 2+2+3 સીટિંગ લેઆઉટમાં સેકન્ડ રો (મિડલ રો)માં મસાજ, હીટિંગ, વેન્ટિલેશન, લેગ-રેસ્ટ અને ફોલ્ડ-આઉટ ટેબલવાળી કૅપ્ટન સીટ્સ આપવામાં આવી છે.
- એક્ટિવ બૉડી કંટ્રોલ – આ ટેક્નૉલૉજીથી અચાનક બ્રેક લગાવવા અથવા એક્સીલરેટ કરવા પર કૅબિનમાં ઝટકા લાગતા નથી અને રાઇડ સારી રહે છે.
- અનુમાનિત કિંમત – ભારતમાં તેની કિંમત લગભગ ₹80 લાખ રૂપિયા હોવાની શક્યતા છે.
એક્સક્લૂઝિવ પ્રીમિયમ શોરૂમ ખોલવામાં આવશે
ભારત સરકારના નિયમો (Press Note 3)ને કારણે BYD ભારતમાં પોતાના સ્થાનિક અસેમ્બલી પ્લાન્ટમાં નવું રોકાણ કરી શકતી નથી. તેથી કંપની ઇમ્પોર્ટેડ (CBU) લક્ઝરી ગાડીઓ દ્વારા ભારતીય પ્રીમિયમ સેગમેન્ટ પર કબજો જમાવવાનો પ્રયાસ કરી રહી છે. ડેન્ઝા માટે BYDથી અલગ એક્સક્લૂઝિવ પ્રીમિયમ શોરૂમ ખોલવામાં આવશે. શરૂઆતના તબક્કામાં ડેન્ઝા માત્ર દિલ્હી-NCR અને મુંબઈ જેવા મોટા મહાનગરોમાં ઉપલબ્ધ થશે.
