Banking Reforms 2026: નાણામંત્રી નિર્મલા સીતારમણે આજે નાણાકીય વર્ષ ૨૦૨૬-૨૭ નું બજેટ રજૂ કર્યું. આ દરમિયાન તેમણે બેંકિંગ સેક્ટર માટે એક મોટી જાહેરાત કરી. સીતારમણે કહ્યું કે દેશના બેંકિંગ સેક્ટરની વ્યાપક સમીક્ષા માટે એક હાઈ-લેવલ કમિટી બનાવવામાં આવશે અને સુધારા પર આધારિત વૃદ્ધિ માટે નવી યોજના બનાવવામાં આવશે. આનો ઉદ્દેશ્ય ભારતીય બેંકોને આગામી સમય માટે વિકસિત ભારતના પ્લાન મુજબ તૈયાર કરવાનો છે. તેમણે કહ્યું કે ભારતીય બેંકો આજે સારી સ્થિતિમાં છે. તેમનો નફો અને દુનિયામાં પહોંચ વધી છે.
સીતારમણે કહ્યું કે ફાઇનાન્શિયલ સેક્ટરમાં ભારતીય બેંકિંગ સેક્ટર આજે ઘણી સારી સ્થિતિમાં છે. બેંકોની બેલેન્સ શીટ મજબૂત છે, નફો ઐતિહાસિક રીતે સૌથી વધુ છે, એસેટ ક્વોલિટીમાં સુધારો થઈ રહ્યો છે અને કવરેજ ૯૮ ટકાથી વધુ છે. આ સેક્ટરને હવે વધુ આગળ લઈ જવાની જરૂર છે. તે માટે જરૂરી પગલાં લેવામાં આવશે. વિકસિત ભારત માટે હાઈ-લેવલ કમિટીની જાહેરાત કરતા નાણામંત્રીએ કહ્યું કે સમિતિ બેંકિંગ સિસ્ટમના સ્ટ્રક્ચર, એફિશિયન્સી અને તૈયારીઓની સમીક્ષા કરશે અને તેને આર્થિક વિસ્તરણના આગામી તબક્કા મુજબ તૈયાર કરવામાં આવશે.
શું છે પ્રસ્તાવ?
આ દરમિયાન નાણામંત્રીએ નોન-બેંકિંગ ફાઇનાન્શિયલ કંપનીઓ એટલે કે NBFC માટે વિકસિત ભારત વિઝન મુજબ ક્લિયર રોડમેપની પણ જાહેરાત કરી. તેમણે કહ્યું કે સરકારે ખાસ કરીને પબ્લિક સેક્ટરની NBFC માટે ક્રેડિટ ડિસબર્સમેન્ટ (ધિરાણ વિતરણ) અને ટેકનોલોજી એડોપ્શન માટે ખાસ ટાર્ગેટ સેટ કર્યા છે. સીતારમણે કહ્યું કે પબ્લિક સેક્ટરની NBFC માં સ્કેલ હાંસલ કરવા અને એફિશિયન્સી સુધારવા માટે પહેલા પગલા તરીકે NBFC ને પાવર ફાઇનાન્સ કોર્પોરેશન અને રૂરલ ઇલેક્ટ્રિફિકેશન કોર્પોરેશનમાં રિસ્ટ્રક્ચર કરવાનો પ્રસ્તાવ છે.
માનવામાં આવે છે કે આનાથી ભારતીય બેંકોની સ્પર્ધાત્મકતા વધશે અને દુનિયામાં તેમનો દબદબો વધશે. અત્યારે ભારતની એક પણ બેંક માર્કેટ કેપની દ્રષ્ટિએ દુનિયાની ટોપ 100 કંપનીઓમાં સામેલ નથી. પરંતુ આમાં ચીનની ઘણી બેંકો સામેલ છે. જેમાં ICBC (૩૭૧.૨૫ અબજ ડોલર), એગ્રીકલ્ચરલ બેંક ઓફ ચાઇના (૩૩૮.૩૭ અબજ ડોલર) અને ચાઇના કન્સ્ટ્રક્શન બેંક (૩૨૮.૨૦ અબજ ડોલર) સામેલ છે. જોકે એસેટ્સની દ્રષ્ટિએ જોઈએ તો ભારતની બે બેંકો દુનિયાની ટોપ ૧૦ બેંકોમાં સામેલ છે.
