Zero Depreciation Cover: જ્યારે પણ કોઈ વ્યક્તિ કાર કે બાઈક જેવું નવું વાહન ખરીદે છે, ત્યારે તેનો ઈન્શ્યોરન્સ કરાવે છે. ઈન્શ્યોરન્સ કોઈપણ વાહન અને તેના માલિક માટે નાણાકીય સુરક્ષા કવચ તરીકે કામ કરે છે. વાહન ગુમ થવું, ચોરી થવી, અકસ્માત થવો કે કોઈપણ પ્રકારનું નુકસાન થવા જેવી પરિસ્થિતિમાં નિયમો અનુસાર વીમા કંપની આર્થિક સહાય કરે છે. આવી સ્થિતિમાં Zero Depreciation Cover નામનો એક વિકલ્પ છે.
- Zero Depreciation Cover વગરના સામાન્ય ઈન્શ્યોરન્સમાં શું થાય છે?
- Zero Depreciation Cover શું છે?
- સામાન્ય ઈન્શ્યોરન્સ અને Zero Depreciation Cover વચ્ચેના મોટા તફાવતો શું છે?
- Zero Depreciation Coverની માંગ કેમ વધી રહી છે?
- Zero Depreciation Cover ઈન્શ્યોરન્સમાં ક્યારે ઉમેરી શકાય છે?
- મુખ્યત્વે કયા ભાગો પર Zero Depreciation Cover લાગુ પડતું નથી?
- Zero Depreciation Cover કોના માટે હોય છે?
- Zero Depreciation Coverને બીજાં કયાં નામથી ઓળખવામાં આવે છે?
સામાન્ય ઈન્શ્યોરન્સમાં આ સુવિધા મળતી નથી, પરંતુ તેને અલગથી એડ-ઓન તરીકે ઉમેરાવવી પડે છે. બદલાતા સમય અને વાહનોના વધતા ઉપયોગ વચ્ચે ઈન્શ્યોરન્સની સાથે Zero Depreciation Cover લેવાનું ચલણ પણ ઝડપથી વધી રહ્યું છે. નિષ્ણાતો તેને તમારી કાર અને બાઈક માટે ખૂબ જ મહત્ત્વપૂર્ણ માને છે. ચાલો જાણીએ કે કાર કે બાઈક માટે Zero Depreciation Cover શા માટે જરૂરી છે અને સામાન્ય વીમા કરતાં તે કેટલો ફાયદાકારક છે.
Zero Depreciation Cover વગરના સામાન્ય ઈન્શ્યોરન્સમાં શું થાય છે?
સામાન્ય રીતે ઘણા લોકો કાર કે બાઈકનો સામાન્ય ઈન્શ્યોરન્સ કરાવે છે, જેમાં Zero Depreciation Cover સામેલ હોતું નથી. આવી સ્થિતિમાં જો તમારી કાર કે બાઈકનો દુર્ભાગ્યવશ અકસ્માત થાય તો તેના પ્લાસ્ટિક, મેટલ, રબર અને ફાઇબર સહિતના કેટલાક ભાગોને નુકસાન થઈ શકે છે.
આવા નુકસાન માટે સામાન્ય ઈન્શ્યોરન્સમાં વીમા કંપની આ ભાગોના જૂના ઘસારાની કિંમત બાદ કરીને અમુક રકમ ચૂકવે છે. બાકીની રકમ તમારે પોતાના ખિસ્સામાંથી ચૂકવવી પડે છે. આ રીતે Zero Depreciation Cover ન લેવાથી તમને આર્થિક નુકસાન પણ થઈ શકે છે.
Zero Depreciation Cover શું છે?
હવે વાત કરીએ Zero Depreciation Coverની. આ ઈન્શ્યોરન્સમાં મળતું એડ-ઓન કવર છે. એટલે કે સામાન્ય ઈન્શ્યોરન્સ લેતી વખતે તેને અલગથી ઉમેરાવવું પડે છે. ઘણા લોકો Zero Depreciation Coverને Nil Dep અથવા Bumper-to-Bumper Cover તરીકે પણ ઓળખે છે.
જ્યારે તમે તમારી કાર કે બાઈક માટે Zero Depreciation Cover લો છો, ત્યારે અકસ્માત થવા પર વીમા કંપની પ્લાસ્ટિક, રબર, ફાઇબર વગેરે ભાગોના ઘસારાને ધ્યાનમાં લેતી નથી. આ ભાગો કેટલા જૂના છે તે પણ જોવામાં આવતું નથી. તેના બદલે કંપની આ ભાગોને થયેલા નુકસાન સામે 100 ટકા ક્લેમ ચૂકવે છે. આથી આ ભાગોના સમારકામ માટે તમારે પોતાના ખિસ્સામાંથી એક રૂપિયો પણ ખર્ચવો પડતો નથી.
સામાન્ય ઈન્શ્યોરન્સ અને Zero Depreciation Cover વચ્ચેના મોટા તફાવતો શું છે?
| સરખામણીનો આધાર | સામાન્ય ઈન્શ્યોરન્સ (Comprehensive Policy) | Zero Depreciation Cover (Add-on Cover) |
|---|---|---|
| ઘસારાનો નિયમ | ક્લેમ વખતે વાહનના જૂના કે બદલાયેલા ભાગો પર ઘસારા મુજબની કિંમત ઘટાડીને ચુકવણી કરવામાં આવે છે. | ક્લેમ વખતે ભાગોના ઘસારા બદલ કોઈ કપાત થતી નથી. ભાગોનો 100% ખર્ચ વીમા કંપની ચૂકવે છે. |
| પ્લાસ્ટિક અને રબરના ભાગો પર ચુકવણી | પ્લાસ્ટિક, રબર અને નાયલોનના ભાગો પર 50% સુધીની કપાત કરવામાં આવે છે. | પ્લાસ્ટિક, રબર અને કાચ સહિતના તમામ ભાગો માટે સંપૂર્ણ 100% ચુકવણી મળે છે. |
| મેટલ અને ફાઇબરના ભાગો પર ચુકવણી | ફાઇબરના ભાગો પર 30% કપાત. મેટલના ભાગો પર વાહનની ઉંમર અનુસાર 5%થી 50% સુધીની કપાત. | મેટલ અને ફાઇબરના ભાગો પર 0% કપાત થાય છે. સંપૂર્ણ ક્લેમ મળે છે. |
| ખિસ્સામાંથી થતો ખર્ચ | અકસ્માત પછી સમારકામનો મોટો હિસ્સો એટલે કે ભાગોના ઘસારાની કિંમત પોતે ચૂકવવી પડે છે. | ખિસ્સામાંથી થતો ખર્ચ લગભગ શૂન્ય હોય છે. માત્ર ફરજિયાત વપરાશ ખર્ચ અને ફાઇલિંગ ફી ચૂકવવાની હોય છે. |
| પ્રીમિયમ (વીમાની હપ્તાની રકમ) | તેનું પ્રીમિયમ Zero Dep કરતાં ઓછું એટલે કે સસ્તું હોય છે. | સામાન્ય ઈન્શ્યોરન્સની સરખામણીમાં તેનું પ્રીમિયમ લગભગ 15%થી 20% વધુ હોય છે. |
| વાહનની ઉંમરની મર્યાદા | કોઈપણ ઉંમરનાં જૂનાં વાહનો માટે ઉપલબ્ધ રહે છે. | સામાન્ય રીતે માત્ર 5 વર્ષ સુધીનાં નવાં કે ઓછાં જૂનાં વાહનો માટે જ ઉપલબ્ધ હોય છે. |
| ક્લેમની મર્યાદા | પૉલિસીની મુદત દરમિયાન ગમે તેટલી વાર ક્લેમ કરી શકાય છે. | કેટલીક કંપનીઓ એક પૉલિસી વર્ષમાં ક્લેમની સંખ્યા મર્યાદિત રાખે છે, ઉદાહરણ તરીકે 1 કે 2 વાર. |
Zero Depreciation Coverની માંગ કેમ વધી રહી છે?
વાહનોના ભાગોની વધતી કિંમતો અને અકસ્માતને કારણે થતા નુકસાનને ધ્યાનમાં રાખીને Zero Depreciation Coverની માંગ વધી રહી છે.
Zero Depreciation Cover ઈન્શ્યોરન્સમાં ક્યારે ઉમેરી શકાય છે?
જ્યારે તમે તમારા વાહનનો ઈન્શ્યોરન્સ કરાવતા હો અથવા તેનું રિન્યુઅલ કરાવતા હો ત્યારે નિયમો અનુસાર Zero Depreciation Cover ઉમેરી શકો છો.
મુખ્યત્વે કયા ભાગો પર Zero Depreciation Cover લાગુ પડતું નથી?
વાહનનાં ટાયર, બેટરી અને ટ્યુબ પર Zero Depreciation Cover લાગુ પડતું નથી.
Zero Depreciation Cover કોના માટે હોય છે?
આ કવર નવી કાર કે બાઈક સહિતનાં અન્ય વાહનો માટે ખરીદીના સમયથી લઈને 5 વર્ષ સુધી ઉપલબ્ધ હોય છે. કેટલાક કિસ્સાઓમાં તે લગભગ 7 વર્ષ સુધી પણ લાગુ થઈ શકે છે.
Zero Depreciation Coverને બીજાં કયાં નામથી ઓળખવામાં આવે છે?
Zero Depreciation Coverને Nil Depreciation Cover અને Bumper-to-Bumper Cover તરીકે પણ ઓળખવામાં આવે છે.
