Australia Work Visa: ઑસ્ટ્રેલિયામાં ઉચ્ચ શિક્ષણ પૂર્ણ કરનારા વિદ્યાર્થીઓને ડિગ્રી પૂરી થયા પછી ‘ટેમ્પરરી ગ્રેજ્યુએટ વિઝા’ (સબક્લાસ 485) આપવામાં આવે છે. આ વિઝા દ્વારા વિદ્યાર્થીઓને દેશમાં રહીને નોકરી કરવાની મંજૂરી મળે છે. જો કે, વિદ્યાર્થીઓ કેટલા વર્ષ સુધી ઑસ્ટ્રેલિયામાં રહી શકે છે તે તેમની ડિગ્રી પર આધારિત છે. ભારતીય વિદ્યાર્થીઓને અન્ય દેશોના વિદ્યાર્થીઓ કરતાં વધુ સમય સુધી ઑસ્ટ્રેલિયામાં રહેવાની મંજૂરી મળે છે, કારણ કે ભારત અને ઑસ્ટ્રેલિયા વચ્ચે થયેલા AI-ECTA કરાર હેઠળ ખાસ છૂટછાટ આપવામાં આવી છે. આવો, ઑસ્ટ્રેલિયાના પોસ્ટ-સ્ટડી વર્ક વિઝા વિશે વિગતે જાણીએ.
કેટલા વર્ષ સુધી નોકરી કરી શકાય?
‘ટેમ્પરરી ગ્રેજ્યુએટ વિઝા’ હેઠળ વિદ્યાર્થીઓને 2 થી 3 વર્ષ સુધી નોકરી કરવાની છૂટ મળે છે, જે તેમની ડિગ્રી પર આધારિત છે. વિઝા મળવો એટલે નોકરી મળી ગઈ એવું નથી – વિદ્યાર્થીઓએ પોતે જ નોકરી શોધવી પડે છે. બેચલર (ઓનર્સ) ડિગ્રી ધરાવનારાઓને 2 વર્ષ સુધી રહેવાની મંજૂરી છે, માસ્ટર ડિગ્રી ધરાવનારાઓને પણ 2 વર્ષ અને માસ્ટર (રીસર્ચ) અથવા ડોક્ટરલ ડિગ્રી ધરાવનારાઓને 3 વર્ષ સુધી રહેવાની છૂટ છે.
AI-ECTA કરાર હેઠળ, બેચલર (ઓનર્સ) ડિગ્રી ધરાવનાર ભારતીયો 2 વર્ષ ઑસ્ટ્રેલિયામાં રહી શકે છે. જો તેમણે સાયન્સ, ટેકનોલોજી, એન્જિનિયરિંગ અથવા ગણિત જેવા વિષયોમાં બેચલર કર્યું હોય, તો 3 વર્ષ સુધી રહી શકે છે. માસ્ટર ડિગ્રી ધરાવનાર ભારતીય વિદ્યાર્થીઓને પણ 3 વર્ષ અને ડોક્ટરલ ડિગ્રી ધરાવનારાઓને 4 વર્ષ રહેવાની છૂટ છે. ગ્રેજ્યુએટ ડિપ્લોમા ધરાવનાર વિદ્યાર્થીઓને 2 વર્ષ સુધી રહેવાની મંજૂરી મળે છે.
વિઝા માટેની શરતો
* અરજદારે હેલ્થ અને કેરેક્ટર સંબંધિત માપદંડો પૂરા કરવા પડશે.
* પૂરતું હેલ્થ ઇન્શ્યોરન્સ હોવું જરૂરી છે.
* ઑસ્ટ્રેલિયન વેલ્યુ સ્ટેટમેન્ટ સહી કરવી પડશે.
* ઑસ્ટ્રેલિયન સરકાર પાસેથી લીધેલ તમામ કર્જ ચૂકવવો પડશે.
વિદ્યાર્થી પોતાના પરિવારના સભ્યોને એક જ એપ્લિકેશનમાં સામેલ કરી શકે છે અથવા પછીથી પણ અરજી કરી શકે છે.
વિઝાની કિંમત
આ વિઝાની ફી 2,300 ઑસ્ટ્રેલિયન ડોલર (લગભગ 1.32 લાખ રૂપિયા) છે. જો તમે પરિવારને સાથે રાખો છો તો તેમની માટે વધારાની ફી લાગશે. ઉપરાંત હેલ્થ ચેક, પોલીસ સર્ટિફિકેટ અને બાયોમેટ્રિક્સ માટે પણ અલગ ખર્ચ થાય છે. પ્રક્રિયા પૂર્ણ થયા પછી વિઝા મંજૂરીનો સમય નક્કી થાય છે.
વિઝા પછી શું?
‘ટેમ્પરરી ગ્રેજ્યુએટ વિઝા’ વધારી શકાતો નથી. જો તમે આ વિઝા પર નોકરી કરી રહ્યા હો અને તમારી કંપની તમને સ્પૉન્સર કરવા તૈયાર હોય તો પછી તમે વર્ક વિઝા મેળવી શકો છો. એટલે કે વિઝા પૂર્ણ થયા પછી ઑસ્ટ્રેલિયામાં નોકરી ચાલુ રાખવા માટે વર્ક વિઝા મેળવવો જરૂરી છે.
પ્રવાસ સંબંધિત નિયમો
વિઝા ધરાવનાર વ્યક્તિ ઑસ્ટ્રેલિયામાં આવજા કરી શકે છે, પરંતુ વિદેશમાં વિતાવેલો સમય પણ વિઝાની મુદતમાં ગણાશે. ઉદાહરણ તરીકે, જો વિઝા 2 વર્ષ માટે છે અને વિદ્યાર્થી 1 વર્ષ વિદેશમાં રહે છે, તો તે સમય પણ વિઝા અવધિમાં ગણાશે. વિઝા ઇલેક્ટ્રોનિક રીતે પાસપોર્ટ સાથે જોડાયેલ હોય છે અને ફિઝિકલ લેબલ તરીકે આપવામાં આવતો નથી.
