Indian Army SSC Tech Recruitment 2026: ભારતીય સેનાએ ૬૭મી શોર્ટ સર્વિસ કમિશન (ટેકનિકલ) ભરતી ૨૦૨૬ માટે સત્તાવાર નોટિફિકેશન બહાર પાડ્યું છે. આ ભરતી અભિયાન હેઠળ ૩૫૦ ખાલી જગ્યાઓ ભરવામાં આવશે. રસ ધરાવતા અને પાત્રતા ધરાવતા ઉમેદવારો ૭ જાન્યુઆરી ૨૦૨૬ થી ૫ ફેબ્રુઆરી ૨૦૨૬ સુધી ભારતીય સેનાની સત્તાવાર વેબસાઇટ joinindianarmy.nic.in ના માધ્યમથી ઓનલાઇન અરજી કરી શકે છે.
આ ભરતી હેઠળ વિવિધ એન્જિનિયરિંગ સ્ટ્રીમમાં કુલ ૩૫૦ જગ્યાઓ ભરવામાં આવશે. જેમાં સિવિલ એન્જિનિયરિંગની ૭૫ જગ્યાઓ, કોમ્પ્યુટર સાયન્સ એન્ડ એન્જિનિયરિંગની ૬૦ જગ્યાઓ, ઇલેક્ટ્રિકલ એન્જિનિયરિંગની ૩૩ જગ્યાઓ, ઇલેક્ટ્રોનિક્સ એન્જિનિયરિંગની ૬૪ જગ્યાઓ, મિકેનિકલ એન્જિનિયરિંગની સૌથી વધુ ૧૦૧ જગ્યાઓ અને અન્ય એન્જિનિયરિંગ શાખાઓની ૧૭ જગ્યાઓનો સમાવેશ થાય છે.
શું છે પસંદગીની સંપૂર્ણ પ્રક્રિયા?
પસંદગી પ્રક્રિયામાં સૌથી પહેલા ઉમેદવારોને તેમની એન્જિનિયરિંગ ડિગ્રીમાં મેળવેલા ગુણના આધારે શોર્ટલિસ્ટ કરવામાં આવશે. ત્યારબાદ શોર્ટલિસ્ટ થયેલા ઉમેદવારોને SSB ઇન્ટરવ્યુ માટે બોલાવવામાં આવશે. આ ઇન્ટરવ્યુ બે તબક્કામાં થશે, જેમાં મનોવૈજ્ઞાનિક ટેસ્ટ, ગ્રુપ ડિસ્કશન, ગ્રુપ ટાસ્ક અને પર્સનલ ઇન્ટરવ્યુનો સમાવેશ થાય છે.
SSB ઇન્ટરવ્યુ પાસ કર્યા પછી ઉમેદવારોનો મેડિકલ ટેસ્ટ કરવામાં આવશે, જેથી જાણી શકાય કે તેઓ સેનાના શારીરિક ધોરણો પર ખરા ઉતરે છે કે નહીં. મેડિકલમાં ફિટ જણાતા ઉમેદવારોની મેરિટ લિસ્ટ SSB માં મેળવેલા ગુણના આધારે બનાવવામાં આવશે. ત્યારબાદ મેરિટ લિસ્ટમાં આવતા યોગ્ય ઉમેદવારોને તેમના રેન્ક મુજબ જોઈનિંગ લેટર આપવામાં આવશે.
શૈક્ષણિક યોગ્યતા
ભારતીય સેના SSC (ટેકનિકલ) ભરતી ૨૦૨૬ માટે ઉમેદવાર સિવિલ, કોમ્પ્યુટર સાયન્સ, ઇલેક્ટ્રિકલ, ઇલેક્ટ્રોનિક્સ, મિકેનિકલ વગેરે જેવી એન્જિનિયરિંગ સ્ટ્રીમમાં BE/B.Tech પાસ હોવો જરૂરી છે. એન્જિનિયરિંગના અંતિમ વર્ષના વિદ્યાર્થીઓ પણ અરજી કરી શકે છે, પરંતુ તેમણે ૧ ઓક્ટોબર ૨૦૨૬ સુધીમાં પોતાની ડિગ્રી પાસ કરવી અનિવાર્ય રહેશે.
વય મર્યાદા
આ ભરતી માટે માત્ર અપરિણીત પુરુષ ઉમેદવારો જ પાત્ર છે, જેમની ઉંમર ૨૦ થી ૨૭ વર્ષની વચ્ચે હોવી જોઈએ. આ પદ માટે કોઈ પણ શ્રેણીના ઉમેદવારને વય મર્યાદામાં કોઈ છૂટછાટ આપવામાં આવશે નહીં, તેથી ઉમેદવારોની ઉંમર નિર્ધારિત મર્યાદામાં હોવી જરૂરી છે.
