Karisma Kapoor: સંજય કપૂરની 30,000 કરોડની સંપત્તિ વિવાદ મામલે એક્સ-વાઈફ કરિશ્મા કપૂર અને તેમના બાળકોને દિલ્હી હાઈકોર્ટે મોટી રાહત આપી છે. કોર્ટે સંજય કપૂરના બેંક એકાઉન્ટ્સ ફ્રીઝ કરવાનો આદેશ આપી દીધો છે. સાથે જ કરિશ્માના બંને બાળકોની અંતરિમ મનાઈ હુકમની અરજી સ્વીકારતા સાવકી માતા પ્રિયા કપૂરને સંજયની સંપત્તિના આગળના કોઈપણ વિભાજન અથવા ત્રીજા પક્ષને અધિકાર આપતા રોકી દીધા છે. પ્રિયા કપૂર માટે કોર્ટ તરફથી આ મોટો ફટકો છે.
સંજય કપૂરની સંપત્તિને વેચી, ટ્રાન્સફર કે ગીરો રાખી શકાશે નહીં
કોર્ટે કહ્યું છે કે જ્યાં સુધી કરિશ્માના બાળકો- કિયાન રાજ કપૂર અને સમાયરા દ્વારા દાખલ કરવામાં આવેલા કેસનો નિકાલ ન આવે, ત્યાં સુધી તેમના પિતા સંજય કપૂરની સંપત્તિ વેચી શકાશે નહીં અને ટ્રાન્સફર પણ કરી શકાશે નહીં.
આ ઉપરાંત, જો સંજય કપૂરના બેંક એકાઉન્ટમાંથી કોઈપણ પ્રકારનું ટ્રાન્ઝેક્શન થાય છે, તો પ્રિયા કપૂરે તેની જાણકારી કોર્ટને આપવી પડશે.
પ્રિયાને કોર્ટે એકાઉન્ટ સ્ટેટમેન્ટ ફાઈલ કરવાનો નિર્દેશ આપ્યો છે, અને કહ્યું છે કે જે પણ શંકા અને સવાલો ઉભા થયા છે, તેને દૂર કરવાની જવાબદારી હવે પ્રિયા કપૂરની છે.
દિલ્હી હાઈકોર્ટનો પ્રિયા કપૂરને નિર્દેશ
જસ્ટિસ જ્યોતિ સિંહે કહ્યું, ‘સંપત્તિનો નાશ થવો જોઈએ નહીં. સંપત્તિને સુરક્ષિત રાખવી જોઈએ’.
તેમણે દિવંગત બિઝનેસમેનની પત્ની પ્રિયા કપૂરને સ્પષ્ટપણે કહ્યું કે તેઓ તેમની કોઈપણ પ્રકારની સંપત્તિ વેચવા, ટ્રાન્સફર કરવા કે ગીરો રાખવાથી બચે અને તેના સ્વરૂપમાં પણ કોઈ ફેરફાર ન કરે.
સંજય કપૂરનું 2025 માં થયું નિધન, ત્યારથી જ સંપત્તિ વિવાદ
સંજય કપૂરનું 12 જૂન 2025 ના રોજ કાર્ડિયાક અરેસ્ટથી નિધન થયું હતું, અને ત્યારથી જ તેમની 30,000 કરોડની સંપત્તિ પર વિવાદ ચાલી રહ્યો છે.
સંજયે કરિશ્મા કપૂર સાથે લગ્ન કર્યા હતા, જેનાથી તેમને બે બાળકો- સમાયરા અને કિયાન છે.
વર્ષ 2016 માં તેમના છૂટાછેડા થઈ ગયા હતા અને બાદમાં સંજયે પ્રિયા સચદેવ સાથે લગ્ન કર્યા હતા, જે તેમની ત્રીજી પત્ની હતી.
કરિશ્માના બાળકોના સાવકી માતા પ્રિયા પર આરોપ
સંજયના મૃત્યુ પછી કરિશ્માના બાળકોએ તેમની 30 હજાર કરોડની સંપત્તિમાં હક માંગવા માટે દિલ્હી હાઈકોર્ટમાં અરજી કરી હતી.
તેમણે સાવકી માતા પ્રિયા પર નકલી વસિયત તૈયાર કરવાનો અને તેમનું નામ ખોટું લખવાનો આરોપ લગાવ્યો હતો.
એવો પણ આરોપ લગાવવામાં આવ્યો હતો કે પ્રિયાએ સંજય કપૂરની નકલી વસિયત તૈયાર કરાવીને તેમની સંપત્તિ વિશે અધૂરી માહિતી આપી હતી.
સંજયના વિદેશી બેંક એકાઉન્ટ અને ક્રિપ્ટોના લેણદેણ પર પણ રોક
દિલ્હી હાઈકોર્ટે હવે સંજય કપૂરની સંપૂર્ણ સંપત્તિ પર ‘Status Quo’ (યથાસ્થિતિ) જાળવી રાખવાનો આદેશ આપ્યો છે, જેથી બાળકોના અધિકારોનું રક્ષણ કરી શકાય.
કોર્ટે સંજયની ક્રિપ્ટોકરન્સીના લેણદેણ અને વિદેશી બેંક એકાઉન્ટ્સના ટ્રાન્ઝેક્શન પર પણ તાત્કાલિક અસરથી રોક લગાવી દીધી છે.
કોર્ટનું કહેવું છે કે સંજયની માતાએ પણ પુત્ર દ્વારા છોડવામાં આવેલી વસિયતની માન્યતા પર સવાલ ઉઠાવ્યા છે અને તેથી હવે તેની પ્રમાણિકતા સાબિત કરવી જરૂરી છે.
