Anandiben Patel Governor: ગુજરાતનાં એકમાત્ર મહિલા મુખ્યમંત્રી બન્યા બાદ રાજ્યપાલ બનેલાં આનંદીબેન પટેલ પોતાના ગૃહ રાજ્યમાં પાછાં ફરશે કે પછી તેમને કોઈ નવી જવાબદારી સોંપવામાં આવશે? ગાંધીનગરથી લઈને નવી દિલ્હી અને લખનઉ સુધી આ મુદ્દો ચર્ચાનો વિષય બન્યો છે. ગુજરાતના રાજકારણમાં મહત્ત્વનો પ્રભાવ ધરાવતાં આનંદીબેન પટેલ દેશના એવા રાજ્યપાલોમાં સામેલ છે, જેઓ હાલમાં કાર્યકાળની દૃષ્ટિએ અગ્રસ્થાને છે. આનંદીબેન પટેલ પહેલી વાર 19 જાન્યુઆરી 2018ના રોજ મધ્ય પ્રદેશનાં રાજ્યપાલ બન્યાં હતાં. તેઓ 28 જુલાઈ 2019 સુધી મધ્ય પ્રદેશનાં રાજ્યપાલ રહ્યાં હતાં. આ દરમિયાન તેમણે થોડા સમય માટે છત્તીસગઢનો વધારાનો હવાલો પણ સંભાળ્યો હતો. ત્યારબાદ 29 જુલાઈ 2019ના રોજ તેમની ઉત્તર પ્રદેશનાં રાજ્યપાલ તરીકે નિમણૂક કરવામાં આવી હતી. ત્યારથી તેઓ આ પદ પર કાર્યરત છે.
આનંદીબેન પટેલ પર સૌની નજર
સૂત્રોના જણાવ્યા અનુસાર, ચાર નવા રાજ્યપાલોની નિમણૂક બાદ આગામી યાદીમાં ઉત્તર પ્રદેશ, મધ્ય પ્રદેશ, પંજાબ અને જમ્મુ-કાશ્મીરને નવા રાજ્યપાલ મળવાની સંભાવના વ્યક્ત કરવામાં આવી રહી છે. રાષ્ટ્રપતિ દ્રૌપદી મુર્મુએ ડૉ. સુધા યાદવને કર્ણાટક, ડૉ. ઢાલ સિંહ બિસેનને ઉત્તરાખંડ, બ્રજ મોહન રામને ઓડિશા અને દુષ્યંત ગૌતમને સિક્કિમના રાજ્યપાલ તરીકે નિયુક્ત કર્યા હતા. આ સાથે ઓમ પ્રકાશ માથુરની સિક્કિમથી કેરળ અને રાજેન્દ્ર વિશ્વનાથ આર્લેકરની કેરળથી તમિલનાડુ બદલી કરવામાં આવી હતી. એવી સંભાવના વ્યક્ત કરવામાં આવી રહી છે કે ટૂંક સમયમાં રાજ્યપાલોની નિમણૂકની બીજી યાદી પણ આવી શકે છે. 84 વર્ષનાં આનંદીબેન પટેલને નવી જવાબદારી સોંપવામાં આવશે કે પછી તેઓ ગુજરાત પરત ફરશે. આ અંગે સૌની નજર ટકેલી છે. કેન્દ્રીય ગૃહમંત્રી અમિત શાહની જેમ આનંદીબેન પટેલ પણ વડાપ્રધાન નરેન્દ્ર મોદીનાં અત્યંત નજીકનાં માનવામાં આવે છે. રાજકીય વર્તુળોમાં અમિત શાહ અને આનંદીબેન વચ્ચે હરીફાઈ હોવાનો દાવો થતો રહ્યો છે. અગાઉ એવી ચર્ચા પણ સામે આવી હતી કે ગુજરાતના રાજ્યપાલ આચાર્ય દેવવ્રતને ઉત્તર પ્રદેશની જવાબદારી સોંપવામાં આવી શકે છે.
આનંદીબેન પટેલનું મહત્ત્વ
એવી ચર્ચા છે કે અમિત શાહ પણ નહીં ઇચ્છે કે આનંદીબેન ગુજરાત પરત ફરે.
ઉત્તર પ્રદેશની ચૂંટણી દરમિયાન પણ તેમને સ્થિર અને કુશળ રાજ્યપાલની જરૂર પડશે.
આનંદીબેન પટેલ મુખ્યમંત્રી રહ્યાં બાદ રાજ્યપાલ બન્યાં છે અને તેઓ અત્યંત અનુભવી છે.
આનંદીબેન પટેલ ગૃહ રાજ્ય પરત ફરશે કે ઉત્તર પ્રદેશમાં જ રહેશે?
ગુજરાતના પૂર્વ મંત્રી અને રાજકીય વિશ્લેષક ડૉ. જયનારાયણ વ્યાસ ગાંધીનગર, દિલ્હીથી લઈને લખનઉ સુધી ચાલી રહેલી ચર્ચા અંગે અલગ અનુમાન ધરાવે છે. તેમનું કહેવું છે કે આનંદીબેન પટેલ હાલ ઉત્તર પ્રદેશનાં રાજ્યપાલ તરીકે ચાલુ રહેશે. ઉત્તર પ્રદેશની ચૂંટણીઓ નજીક આવી રહી છે અને ત્યારબાદ ગુજરાતની ચૂંટણી યોજાવાની હોવાથી તેમનું ગૃહ રાજ્યમાં પાછાં ફરવું મુશ્કેલ છે. રાજકીય પરિસ્થિતિઓ અને જરૂરિયાતોને ધ્યાનમાં રાખીને કેન્દ્ર સરકાર તેમને રાજ્યપાલના પદ પર જાળવી રાખશે, એવું વ્યાસ કહે છે. આનંદીબેન પટેલ વડાપ્રધાન નરેન્દ્ર મોદીનાં વિશ્વાસુ છે. BJPનું નેતૃત્વ તેમને ગુજરાત પરત લાવીને અહીંના રાજકારણમાં કોઈ બિનજરૂરી ફેરફાર કરવા ઇચ્છશે નહીં. ડૉ. જયનારાયણ વ્યાસ 2007થી 2012 સુધી ગુજરાત સરકારમાં આરોગ્ય અને પરિવાર કલ્યાણ મંત્રી રહ્યા હતા. તેઓ લાંબા સમય સુધી BJPમાં રહ્યા હતા અને ત્યારબાદ નવેમ્બર 2022માં કોંગ્રેસમાં જોડાયા હતા. હાલમાં તેઓ ગુજરાતના રાજકીય વિશ્લેષક તરીકે સક્રિય છે.
