Morbi Jetpar Farmers Protest: મોરબી જિલ્લાના જેતપર ગામમાં ખાનગી કંપની દ્વારા વીજપોલ અને હાઈટેન્શન કોરિડોર લાઈન નાખવાની કામગીરી સામે સ્થાનિક ખેડૂતોનો આક્રોશ ચરમસીમાએ પહોંચ્યો છે. જમીન અને ઊભા પાકને થઈ રહેલા નુકસાનના વિરોધમાં છેલ્લા કેટલાક દિવસોથી ૯ ખેડૂતો આમરણાંત ઉપવાસ પર બેઠા છે. આ આંદોલનને વધુ વેગ આપવા અને અનોખી ખેડૂત એકતા દર્શાવવા માટે અન્ય ૧૫ ખેડૂતોએ સામૂહિક મુંડન કરાવીને ગાંધીગીરીના માર્ગે વિરોધ પ્રદર્શન શરૂ કર્યું છે. આશ્ચર્યની વાત એ છે કે મુંડન કરાવનારા ખેડૂતોના પોતાના ખેતરમાંથી કોઈ લાઈન પસાર થતી નથી, છતાં પીડિત ભાઈઓના સમર્થનમાં તેઓ આ લડતમાં જોડાયા છે.
મંજૂરી વગર ઊભા પાકમાં વાહનો દોડાવી કંપનીના માણસોએ કરી દાદાગીરી
ખેડૂતોનો મુખ્ય આક્ષેપ છે કે ખાનગી વીજ કંપનીના કર્મચારીઓ કાયદેસરના સરકારી રસ્તાનો ઉપયોગ કરવાને બદલે ખેડૂતોના ખાનગી ખેતરોમાંથી ભારે વાહનોની અવરજવર કરાવી રહ્યા છે. ભોગ બનનાર ખેડૂત જીતેન્દ્રભાઈ અમૃતિયાએ (Jitendrabhai Amrutia) જણાવ્યું કે, જ્યારે તેઓએ પોતાના ખેતરમાં મંજૂરી વગર ગાડીઓ ફેરવતા કંપનીના માણસોને અટકાવ્યા અને પૂછપરછ કરી, ત્યારે કંપનીના સ્ટાફે કોઈ પણ વહીવટી મંજૂરી બતાવવાને બદલે તેમને બીભત્સ ગાળો ભાંડીને જાનથી મારી નાખવાની ધમકી આપી હતી. જાણે આખી જમીન કંપનીની માલિકીની હોય તેવું જોહુકમીભર્યું વર્તન ત્યાં કરવામાં આવ્યું હતું.
ઊભા મોલાતને આડેધડ નુકસાન, મોટી સંખ્યામાં ખેડૂતો પોલીસ સ્ટેશને ઉમટ્યા
અન્ય એક સ્થાનિક ખેડૂત ગજેન્દ્રસિંહ ઝાલાએ (Gajendrasinh Jhala) આક્રોશ સાથે ઉમેર્યું કે, કંપની દ્વારા આગોતરી કોઈ જાણ કર્યા વિના રાતોરાત ખેતરોની અંદર વાયર નાખવાની કામગીરી શરૂ કરી દેવાઈ છે. વાહનોના કારણે ચોમાસાના ઊભા પાકને વ્યાપક નુકસાન પહોંચ્યું છે. કંપની તંત્ર ખેડૂતોની ન્યાયિક વાત સાંભળવા સુદ્ધાં તૈયાર નથી. આ દાદાગીરી સામે કાયદેસરની કલમો હેઠળ ગુનો નોંધાવવા માટે આખું ગામ અને મોટી સંખ્યામાં ખેડૂતો જેતપર પોલીસ સ્ટેશન ખાતે ઉમટી પડ્યા હતા અને કંપની વિરુદ્ધ લેખિતમાં કડક પોલીસ અરજી સબમિટ કરી હતી.
પ્રશ્ન હલ નહીં થાય તો સરદાર પટેલના માર્ગે ઉગ્ર આંદોલનની ચીમકી
હાલ તો જેતપર ગામમાં પોલીસ ફરિયાદ અને મુંડન વિરોધને પગલે વાતાવરણ તંગ બનેલું છે. આંદોલનકારી ખેડૂતોએ ચીમકી ઉચ્ચારી છે કે, તેઓ અત્યારે માત્ર શાંતિપૂર્ણ રીતે ગાંધી ચિંધ્યા માર્ગે ન્યાયની ભીખ માંગી રહ્યા છે. પરંતુ જો આગામી દિવસોમાં વહીવટી તંત્ર કે કંપની દ્વારા દાદાગીરી બંધ કરીને આ વિવાદનો કાયમી અને યોગ્ય ઉકેલ લાવવામાં નહીં આવે, તો તેઓ બારડોલી સત્યાગ્રહની જેમ સરદાર વલ્લભભાઈ પટેલના માર્ગે સમગ્ર મોરબી જિલ્લામાં ઉગ્ર ક્રાંતિકારી આંદોલન છેડશે, જેની સંપૂર્ણ જવાબદારી શાસકોની રહેશે.
