અમદાવાદ, મંગળવાર
Real Estate : રાજ્ય સરકારે નવા સૂચિત જંત્રીદર જાહેર કર્યા છે, જે બેથી ત્રણ ગણા વધ્યા હોવાના કારણે રિયલ એસ્ટેટ ઉદ્યોગ સાથે સામાન્ય નાગરિકોને પણ મોટો ફટકો પડશે. ક્રેડાઈ અમદાવાદ GIHED દ્વારા આ વધારો સામે વિરોધ કરવામાં આવ્યો છે. બિલ્ડરોનો દાવો છે કે આ નવા દર લાગુ થાય તો મકાનની કિંમતોમાં 35% થી 40% સુધી વધારો થશે, જેનાથી ઘર ખરીદવું સામાન્ય નાગરિકો માટે મુશ્કેલ બનશે.
મકાન મોંઘા થશે અને ઘર ખરીદવું સપનુ બની જશે
નવા જંત્રીદરમાં થયેલા વધારાથી બિલ્ડરોની સાથે ખેડૂતો, જમીન માલિકો અને ઘરોની ખરીદીમાં રસ ધરાવતા નાગરિકોને પણ પ્રભાવિત કરવામાં આવશે. બાર દિવસથી કોઇ નવા પ્રોજેક્ટ શરૂ થયા નથી. બિલ્ડરોનું કહેવું છે કે દસ્તાવેજ પ્રક્રિયામાં પણ નવા દરથી નુકસાન થશે.
ક્રેડાઈના દાવાઓ અને માગણીઓ
ક્રેડાઈએ રાજ્ય સરકારને 30 દિવસના બદલે 31 માર્ચ, 2025 સુધી વાંધા-સૂચનો રજૂ કરવાની મહેરબાની કરવા વિનંતી કરી છે. સાથે જ ઑનલાઇન ઉપરાંત, કલેક્ટર અથવા મામલતદારની ઓફિસમાં ઑફલાઇન અરજી કરવાની વ્યવસ્થા ગોઠવવાની માગ કરી છે.
કોર્ટમાં લડતની તૈયારી
ક્રેડાઈએ ચેતવણી આપી છે કે જો સરકાર નવા દરમાં ફેરફાર નહીં કરે, તો બિલ્ડરો કોર્ટમાં પણ જઈ શકે છે. પ્રમુખ ધ્રુવ પટેલે જણાવ્યું કે રાજ્ય સરકારે બાર વર્ષ સુધી જંત્રીદર વધાર્યા નહીં, પરંતુ હવે બેઝ પર વિચાર કર્યા વિના 200% થી 2000% સુધીના વધારાની જાહેરાત કરી દીધી છે.
ખેડૂતો અને નાગરિકોને ભારે અસર
ખેડૂતો માટે જમીનના જંત્રીદર અને બજાર ભાવ વચ્ચેના તફાવતને કારણે પરિસ્થિતિ વધુ કઠિન બની શકે છે. ઓનલાઇન પ્રક્રિયાથી સામાન્ય નાગરિકો માટે પણ સમસ્યાઓ ઊભી થઈ છે. ઠેરઠેર વિકાસ પ્રોજેક્ટ અટકી જવાની શક્યતા છે, કારણ કે જમીન અને મકાનો મોંઘાં થઈ જશે.
બિલ્ડરોનો આક્ષેપ
બિલ્ડરોએ આ મુદ્દે સરકારના સર્વે અને પદ્ધતિ પર સવાલો ઉઠાવ્યા છે. જણાવાયું છે કે કેટલાક ઝોન અને સર્વે નંબરો વિશે જ સ્પષ્ટતા નથી. નવી જંત્રી બદલાવને કારણે મકાનો હવે ખરીદવા જેવાં નહીં રહે અને શહેરમાં નવા પ્રોજેક્ટ શરૂ થતા અટકી જશે.
જો સરકારની નીતિમાં ફેરફાર નહીં થાય, તો બિલ્ડરો અને નાગરિકોના આક્ષેપો આગામી સમયમાં વધુ તીવ્ર બનશે અને ક્રેડાઈ કોર્ટમાં જઈને આ મુદ્દે લડત આપે તેવી શકયતા છે.
