ICC Women’s Rankings: ICC એ તાજેતરની મહિલા ODI રેન્કિંગ જાહેર કરી છે. ઇંગ્લેન્ડની કેપ્ટન નેટ સ્કાયવર બ્રન્ટે ભારતની સ્મૃતિ મંધાનાને પાછળ છોડી ICC મહિલા ODI ખેલાડીઓ રેન્કિંગમાં ટોચનું સ્થાન મેળવ્યું છે. ભારત સામેની તાજેતરની શ્રેણીમાં 160 રન બનાવનાર સ્કાયવર બ્રન્ટ બીજી વખત નંબર વન બની છે. અગાઉ તેણી 2023 માં રેન્કિંગમાં ટોચ પર હતી.
મંધાનાએ ઇંગ્લેન્ડ સામે ત્રણ મેચમાં 115 રન બનાવ્યા હતા, પરંતુ તેણી રેન્કિંગમાં એક સ્થાન નીચે આવી ગઈ છે. સ્કાયવર બ્રન્ટના હવે 731 પોઈન્ટ છે, જ્યારે મંધાનાના 728 પોઈન્ટ છે. ભારતીય કેપ્ટન હરમનપ્રીત કૌર 21મા સ્થાનેથી 11મા સ્થાને સરકી ગઈ છે, જ્યારે મધ્યમ ક્રમની બેટ્સમેન જેમિમા રોડ્રિગ્સ 15મા સ્થાનેથી 13મા સ્થાને આવી ગઈ છે. ટોચના પાંચમાં ઓસ્ટ્રેલિયન ખેલાડીઓનો દબદબો છે. દક્ષિણ આફ્રિકાની એલ વોલ્વાર્ડટ ત્રીજા સ્થાને છે. ઓસ્ટ્રેલિયાની એલિસ પેરી અને એલિસા હીલી ચોથા સ્થાને છે.
ODI બોલરોમાં દીપ્તિ શર્મા ચોથા સ્થાને છે, જ્યારે ઇંગ્લેન્ડની સોફી એક્લેસ્ટોન ત્રીજા સ્થાને છે અને ઓસ્ટ્રેલિયાની એશ્લે ગાર્ડનર અને મેગન શટ ટોચના બે સ્થાન પર છે. ઓસ્ટ્રેલિયાની કિમ ગાર્થ પાંચમા સ્થાને છે. ODI ઓલરાઉન્ડરોમાં ઓસ્ટ્રેલિયાની એશ્લે ગાર્ડનર ટોચ પર છે. વેસ્ટ ઇન્ડીઝની હેલી મેથ્યુઝ બીજા સ્થાને છે, દક્ષિણ આફ્રિકાની મેરિઝાન કાપ ત્રીજા સ્થાને છે, ભારતની દીપ્તિ શર્મા ચોથા સ્થાને છે અને ન્યુઝીલેન્ડની અમેલિયા કેર પાંચમા સ્થાને છે.
