Women’s T20 World Cup: ઓસ્ટ્રેલિયાની એલિસ પેરી, ઈંગ્લેન્ડની ઓપનર ડેની વ્યાટ-હોજ, ભારતની સ્મૃતિ મંધાના અને સાઉથ આફ્રિકાની ઓલરાઉન્ડર મેરિઝાન કેપને સમગ્ર ટુર્નામેન્ટમાં શાનદાર પ્રદર્શન બાદ ICC મહિલા T20 વર્લ્ડ કપ 2026 પ્લેયર ઓફ ધ ટુર્નામેન્ટ એવોર્ડ માટે નોમિનેટ કરવામાં આવ્યા છે. આ ચારેય ખેલાડીઓનું પ્રદર્શન ટુર્નામેન્ટમાં શાનદાર રહ્યું છે. એલિસા પેરી અને ડેની વ્યાટ તેમના શાનદાર ખેલના જોરે ઓસ્ટ્રેલિયા અને ઈંગ્લેન્ડને ફાઈનલમાં પહોંચાડવામાં સફળ રહ્યા છે. બીજી તરફ, મંધાનાના દમદાર પ્રદર્શન છતાં ભારતીય ટીમ ગ્રુપ સ્ટેજમાં જ ટુર્નામેન્ટમાંથી બહાર થઈ ગઈ હતી. કેપે ઉમદા પ્રદર્શન કરીને સાઉથ આફ્રિકાને સેમીફાઈનલ સુધી પહોંચાડવામાં મહત્વની ભૂમિકા ભજવી હતી.
એલિસ પેરીએ ફરી એકવાર ICC ટુર્નામેન્ટમાં શાનદાર પ્રદર્શન કર્યું છે. તેમણે અત્યાર સુધી છ મેચોમાં 46.25 ની સરેરાશથી 185 રન બનાવ્યા છે અને બોલિંગમાં ચાર વિકેટ પણ ઝડપી છે. ઓસ્ટ્રેલિયાના ફાઈનલ સુધીના અજેય સફર દરમિયાન પેરીને ત્રણ વાર ‘પ્લેયર ઓફ ધ મેચ’ પસંદ કરવામાં આવ્યા હતા. તેમણે બાંગ્લાદેશ સામેની મુકાબલામાં બે વિકેટ લેવાની સાથે 19 રનની અણનમ ઈનિંગ રમી હતી. આ પછી પાકિસ્તાન અને ભારત સામે સતત બે અડધી સદી ફટકારીને ટીમની જીતમાં મહત્વની ભૂમિકા ભજવી હતી અને ઓસ્ટ્રેલિયાને એક પણ મેચ ગુમાવ્યા વિના ફાઈનલમાં પહોંચાડવામાં નોંધપાત્ર યોગદાન આપ્યું હતું.
ડેની વ્યાટ મહિલા T20 વિશ્વ કપ 2026 માં સૌથી વધુ રન બનાવનાર બેટ્સમેન રહ્યા છે. તેઓ 6 મુકાબલામાં 294 રન બનાવી ચૂક્યા છે. વ્યાટ આ વિશ્વ કપમાં એક સદી અને બે અડધી સદી લગાવી ચૂક્યા છે. તેમણે તેમના દમદાર પ્રદર્શનના જોરે ઈંગ્લેન્ડને ફાઈનલની ટિકિટ અપાવવામાં મહત્વનો રોલ અદા કર્યો છે. વ્યાટનો ટુર્નામેન્ટમાં સ્ટ્રાઈક રેટ 152.33 નો રહ્યો છે. ભલે ભારતીય ટીમનો સફર ગ્રુપ સ્ટેજમાં જ ખતમ થઈ ગયો, પરંતુ સ્મૃતિ મંધાનાએ તેમની બેટિંગથી ખાસ પ્રભાવિત કર્યા છે. મંધાનાએ 5 મુકાબલામાં 140 ના સ્ટ્રાઈક રેટથી રમતા 205 રન બનાવ્યા. મંધાનાએ આ દરમિયાન બે અડધી સદી લગાવી. તેમણે પાકિસ્તાન અને નેધરલેન્ડ્સ સામે અડધી સદી લગાવી હતી.
ICC દ્વારા શોર્ટલિસ્ટ કરાયેલા ખેલાડીઓમાં મેરિઝાન કેપનું નામ પણ સામેલ છે. કેપે પ્રોટીઆસ ટીમને સેમીફાઈનલ સુધી પહોંચાડવામાં મહત્વનું પાત્ર ભજવ્યું છે. તેમણે ટુર્નામેન્ટમાં 31 ની સરેરાશથી રમતા 124 રન બનાવ્યા છે. બીજી તરફ, બોલિંગમાં 14.37 ની એવરેજથી 8 વિકેટ ઝડપી છે. કેપનું સૌથી શ્રેષ્ઠ પ્રદર્શન ભારત સામે આવ્યું, જ્યાં તેમણે 2 વિકેટ લેવાની સાથે-સાથે 81 રનની દમદાર ઈનિંગ પણ રમી હતી. ‘પ્લેયર ઓફ ધ ટુર્નામેન્ટ’ એવોર્ડના વિજેતાની જાહેરાત રવિવારે લોર્ડ્સમાં ઈંગ્લેન્ડ અને ઓસ્ટ્રેલિયા વચ્ચે મહિલા T20 વર્લ્ડ કપ ફાઈનલ બાદ કરવામાં આવશે.
