ChatGPT Personal Context Tool: OpenAI એ ચેટજીપીટી પ્લસ અને પ્રો યુઝર્સ માટે એક મોટું અને જરૂરી ફીચર રોલ આઉટ કર્યું છે. હવે ચેટજીપીટી આખા ચેટ હિસ્ટ્રીમાં સર્ચ કરી શકે છે. આ નવી સિસ્ટમ, જેને આંતરિક રીતે પર્સનલ કોન્ટેક્સ્ટ એજન્ટ ટૂલ કહેવામાં આવે છે, તે યુઝર્સને એકાઉન્ટ બન્યું ત્યારથી લઈને અત્યાર સુધીની તમામ વાતચીતના સવાલ પૂછવાની અને સચોટ જવાબ મેળવવાની સુવિધા આપે છે. ખાસ વાત એ છે કે હવે ChatGPT જે જૂની ચેટમાંથી માહિતી લે છે, તેને ક્લિક કરી શકાય તેવા સોર્સ (સ્ત્રોત) તરીકે બતાવે છે, જેનાથી જવાબ વધુ વિશ્વસનીય અને ટ્રાન્સપરન્ટ (પારદર્શક) બન્યો છે.
આમાં નવું શું છે?
અત્યાર સુધી ચેટજીપીટી તમારી જૂની ચેટ્સને સ્ટોર તો કરતું હતું, પરંતુ તેમાંથી સાચી માહિતી કાઢવી અવારનવાર મુશ્કેલ રહેતી હતી. નવા અપડેટ પછી, ચેટજીપીટી પ્લસ અને પ્રો યુઝર્સ હવે તેમના આખા ચેટ હિસ્ટ્રીને સર્ચ કરી શકે છે, પછી ભલે તે મહિનાઓ કે વર્ષો જૂની વાતચીત કેમ ન હોય.
Personal Context Agent Tool શું છે?
આ નવા ફીચરનું ટેકનિકલ નામ Personal Context Agent Tool (કોડનેમ: q7dr546) છે. આ ટૂલ હિસ્ટ્રી-આધારિત સવાલો માટે સક્રિય થાય છે અને ચેટજીપીટીને એ સમજવામાં મદદ કરે છે કે યુઝરે પહેલા કયા વિષયો પર શું વાતચીત કરી હતી. ઉદાહરણ તરીકે, કોઈ જૂની રેસીપી, પહેલા બનાવેલો વર્કઆઉટ પ્લાન, અથવા કોઈ પ્રોજેક્ટ કે આઈડિયા પર થયેલી ચર્ચા. હવે આ બધું શોધવા માટે અલગ-અલગ ચેટ્સ ખોલવાની જરૂર નહીં પડે, આ બધું એકમાં જ આવી જશે.
નીચે દેખાશે સોર્સ લિંક
જ્યારે ચેટજીપીટી તમારી કોઈ જૂની ચેટમાંથી માહિતીનો ઉપયોગ કરશે, ત્યારે તે જવાબની નીચે એક સોર્સ લિંક બતાવશે. તમે તે લિંક પર ક્લિક કરીને સીધા તે જૂની વાતચીત પર જઈ શકો છો જ્યાંથી તે સંદર્ભ લેવામાં આવ્યો છે. આનાથી માહિતીની વિશ્વસનીયતા પણ વધશે.
પહેલા શું તકલીફ હતી?
પહેલા ચેટ હિસ્ટ્રી સર્ચ ફીચર ઘણીવાર ખોટી અથવા અપ્રસ્તુત ચેટ બતાવતું હતું. એક જેવા અનેક થ્રેડ્સ હોવાને કારણે તે કન્ફ્યુઝ થઈ જતું હતું અને સાચી માહિતી શોધવામાં અસફળ રહેતું હતું. નવી સિસ્ટમ આ ખામીઓને ઘણી હદ સુધી દૂર કરે છે.
કયા યુઝર્સને મળશે આ ફીચર?
હાલમાં આ સુવિધા ફક્ત ChatGPT Plus અને Pro સબ્સ્ક્રાઇબર્સ માટે ઉપલબ્ધ છે. આ વૈશ્વિક સ્તરે રોલ આઉટ કરવામાં આવી રહી છે અને તેમાં એકાઉન્ટ બન્યું ત્યારથી લઈને અત્યાર સુધીની તમામ ચેટ્સ કવર થશે. જોકે આ ફીચર ChatGPT માટે મોટું અપગ્રેડ છે, પરંતુ Google ના Gemini એ ફેબ્રુઆરી ૨૦૨૫ માં જ જૂની વાતચીતોને રેફરન્સ કરવાની ક્ષમતા આપી દીધી હતી.
જેમિની યુઝર્સ લાંબા સમયથી વધુ સંદર્ભ-જાગૃત ચેટ્સનો અનુભવ કરી રહ્યા છે. આમ છતાં, OpenAI એ તાજેતરના સમયમાં GPT-5 નું રોલઆઉટ, ChatGPT-5.1 રિલીઝ, નવી પર્સનાલિટી, વધુ નેચરલ ટોન અને ઝડપી જવાબ જેવા અનેક મોટા સુધારા કર્યા છે.
