Donald Trump Visa Policy હેઠળ અમલમાં આવેલી ‘America First’ નીતિઓની સીધી અસર હવે અમેરિકામાં વસતા ભારતીયો પર જોવા મળી રહી છે. તાજા અહેવાલો મુજબ, H-1B વિઝા નિયમોમાં કરાયેલા કડક ફેરફારો બાદ ભારતીય વ્યાવસાયિકો અને ભારતીય મૂળના ઉદ્યોગપતિઓ સામે નફરત, ભેદભાવ અને ટ્રોલિંગનું વાતાવરણ ઝડપથી વધી રહ્યું છે.
H-1B વિઝા નિયમો બન્યા વધુ કઠોર
ટ્રમ્પ પ્રશાસને H-1B વિઝાની અરજી ફી વધારીને લગભગ 1 લાખ ડોલર સુધી લઈ જવાની તૈયારી કરી છે. સાથે જ હવે વધુ પગાર ધરાવતી નોકરીઓને જ વિઝા આપવા પ્રાથમિકતા આપવામાં આવશે. ફેબ્રુઆરીથી અમલમાં આવનારા નવા નિયમો મુજબ સૌથી વધુ વેતન મેળવનારા લેવલ-4 અરજદારોને જ અગત્યતા મળશે, જેના કારણે કુશળ ભારતીયોને મોટો ફટકો પડશે.
મોટી અમેરિકન કંપનીઓ અને ભારતીય મૂળના CEO પર આરોપો
રિપોર્ટ અનુસાર અનેક મોટી અમેરિકન કંપનીઓને સોશિયલ મીડિયા પર નિશાન બનાવવામાં આવી રહી છે. આરોપ લગાવવામાં આવી રહ્યો છે કે આ કંપનીઓ ગેરરીતે ભારતીયોને નોકરી આપે છે. તાજેતરમાં ફેડએક્સના ભારતીય મૂળના CEO રાજ સુબ્રમણ્યમ સામે પણ વાંધાજનક ટિપ્પણીઓ જોવા મળી હતી.
ભારતીય સમુદાય સામે નફરત અને હિંસામાં વધારો
‘Stop AAPI Hate’ સંસ્થાના જણાવ્યા પ્રમાણે દક્ષિણ એશિયાઈ સમુદાય સામે હિંસાની ધમકીઓમાં 12 ટકાનો વધારો થયો છે. સોશિયલ મીડિયા પર અપશબ્દો અને ઘૃણાસ્પદ ભાષાના ઉપયોગમાં 69 ટકા સુધીનો ઉછાળો નોંધાયો છે. ભારતીયોને ‘Job Thief’ અને ‘Visa Scammer’ જેવા ટેગ લગાવીને ટ્રોલ કરવામાં આવી રહ્યા છે.
સંગઠિત હુમલાનો ખતરો
નિષ્ણાતોનું માનવું છે કે આ તમામ હુમલાઓ કોઈ એકલદોકલ ઘટના નથી, પરંતુ સંગઠિત અભિયાનનો ભાગ છે. ખાસ કરીને સરકારી લોન મેળવનારા ભારતીય-અમેરિકન વ્યવસાયોને નિશાન બનાવવામાં આવી રહ્યા છે. આ પરિસ્થિતિને કારણે ઘણી કંપનીઓએ તેમની સર્વસમાવેશક નીતિઓને હાલ પૂરતી અટકાવી દીધી છે.
