Saudi Arabia Snowfall 2025: સાઉદી અરેબિયાનું નામ પડતા જ આંખ સામે ધગધગતું રણ અને તડકો દેખાય છે, પરંતુ અત્યારે ત્યાંના પહાડો વચ્ચે એક અદભૂત ઘટના ઘટી રહી છે. ઉત્તરી સાઉદી અરેબિયાના પહાડો અત્યારે શિયાળાના શાનદાર નજારામાં ફેરવાઈ ગયા છે. ટ્રોજેના હાઇલેન્ડઝ અને તબુક વિસ્તારના કેટલાક ભાગોમાં બરફની ચાદર બિછાઈ ગઈ છે.
તબુક વિસ્તારના જબલ અલ-લોઝમાં ભારે હિમવર્ષા થઈ છે, જેનાથી આ વિસ્તારનું તાપમાન માઈનસમાં પહોંચી ગયું છે. સાઉદી અરેબિયાથી આવતી હિમવર્ષાની તસવીરો જોઈને લોકોને વિશ્વાસ નથી આવી રહ્યો. ઘણા લોકો તો તેને AI દ્વારા બનાવેલી માની રહ્યા છે.
વરસાદની સાથે પડ્યો બરફ
સાઉદી ગેઝેટના અહેવાલ મુજબ, ટ્રોજેના હાઇલેન્ડઝમાં હળવાથી મધ્યમ વરસાદ સાથે હિમવર્ષા થઈ. બીર બિન હિરમાસ, અલ-ઉયનાહ, હલાત અમ્માર અને શિગરીની સાથે આસપાસના વિસ્તારો સહિત અનેક કેન્દ્રોમાં વરસાદ પડવાના સમાચાર છે. એક યુઝરે આનો વીડિયો સોશિયલ મીડિયા પર શેર કરતા લખ્યું, ‘એક દુર્લભ ઘટનામાં સાઉદી અરેબિયામાં ભારે હિમવર્ષા થઈ રહી છે.’
જબલ અલ-લોઝ સાઉદી અરેબિયાના ઉત્તર-પશ્ચિમમાં સમુદ્ર સપાટીથી લગભગ ૨૫૮૦ મીટરની ઊંચાઈ પર સ્થિત છે. જબલ અલ-લોઝનો શાબ્દિક અર્થ છે- બાદામનો પહાડ. અહીં થયેલી હિમવર્ષાએ સ્થાનિક લોકો અને પ્રવાસીઓ બંનેનું ધ્યાન ખેંચ્યું છે. સાઉદી અરેબિયાના નેશનલ સેન્ટર ફોર મેટરોલોજી (NCM) એ રિયાધ, પૂર્વી પ્રાંત અને ઉત્તરી સરહદોના કેટલાક ભાગોમાં મધ્યમથી ભારે ગાજવીજ સાથે વરસાદની ચેતવણી આપી છે.
પેગંબરની ભવિષ્યવાણીને લઈને ચર્ચા
હિમવર્ષાની તસવીરો અને દ્રશ્યોએ સોશિયલ મીડિયા પર યુઝર્સને હેરાન કરી દીધા છે. ઘણા લોકો આ વિશે પૂછી રહ્યા છે કે આ અસલી છે કે નકલી. તો બીજી તરફ, એક વ્યક્તિએ તેને પેગંબરની ભવિષ્યવાણી સાથે જોડતા આખરી દિવસ નજીક હોવાની નિશાની ગણાવી છે. આનો સંબંધ પેગંબર મોહમ્મદની તે ભવિષ્યવાણી સાથે જોડવામાં આવી રહ્યો છે. પેગંબર મોહમ્મદની ઇસ્લામિક ભવિષ્યવાણીઓ અને હદીસોમાં એ જણાવવામાં આવ્યું છે કે ‘છેલ્લા સમયે અરબ દ્વીપકલ્પ ફરી એકવાર હરિયાળો અને નદીઓથી ભરાઈ જશે.’
ઘણા લોકો વિચારી રહ્યા છે કે શું હિમવર્ષા એવા પરિવર્તનની શરૂઆત છે જે આખરે રણને હરિયાળું બનાવી શકે છે. જેનાથી સૂકી જમીન પાણી અને હરિયાળીથી ભરપૂર ફળદ્રુપ વિસ્તાર બની જશે. રણ પ્રદેશોમાં વધુ વરસાદનો અર્થ છે કે માટી ભેજ જાળવી રાખશે, જે ઝાડ-છોડ ઉગાડવા માટે સૌથી જરૂરી છે. જોકે, સાઉદી અરેબિયાના તબુક કે અલ-ચૌફ જેવા પહાડી વિસ્તારોમાં બરફ પડવો એ કોઈ અનોખી ઘટના નથી, પરંતુ વરસાદની પેટર્નમાં તાજેતરના ફેરફારોએ લોકોની ઉત્સુકતા વધારી છે.
