WhatsApp View Once Text Messages: વોટ્સએપ તેના પ્લેટફોર્મ પર એક નવા પ્રાઈવસી ફીચર પર કામ કરી રહ્યું છે. હાલમાં જ માહિતી સામે આવી હતી કે કંપની ‘ડિસઅપિયરિંગ મેસેજીસ’ માટે ‘આફ્ટર રીડિંગ’ ઓપ્શનની ટેસ્ટિંગ કરી રહી છે. હવે એક નવા રિપોર્ટમાં દાવો કરવામાં આવ્યો છે કે વોટ્સએપ ‘વ્યૂ-વન્સ ટેક્સ્ટ મેસેજીસ’ ફીચર પણ લાવવાની તૈયારી કરી રહ્યું છે.
WABetaInfo ના રિપોર્ટ મુજબ, આ ફીચરની મદદથી યુઝર્સ ટેક્સ્ટ મેસેજને પણ ‘વ્યૂ વન્સ’ મોડમાં મોકલી શકશે. હાલમાં વોટ્સએપમાં ‘વ્યૂ વન્સ’ ફીચર ફક્ત ફોટો, વીડિયો અને વોઈસ નોટ્સ માટે ઉપલબ્ધ છે.
રિપોર્ટ અનુસાર, મેસેજ ટાઈપ કર્યા પછી યુઝર્સ સેન્ડ બટનને લોન્ગ પ્રેસ કરીને “સેન્ડ એઝ વ્યૂ વન્સ” ઓપ્શન પસંદ કરી શકશે. ત્યારબાદ રિસીવર તે મેસેજને ફક્ત એક વાર જ જોઈ શકશે. મેસેજ ઓપન થયા પછી તે ફરીથી દેખાશે નહીં.
આ ફીચર કેવી રીતે કામ કરશે
આ ફીચર પર્સનલ ચેટ અને ગ્રુપ બંનેમાં કામ કરશે. જોકે વોટ્સએપ ચેનલ્સમાં તેને ઉપલબ્ધ કરાવવામાં આવશે નહીં કારણ કે ચેનલ્સ બ્રોડકાસ્ટ કોમ્યુનિકેશન માટે ઉપયોગમાં લેવાય છે.
રિપોર્ટમાં કહેવામાં આવ્યું છે કે આ ફીચર તે યુઝર્સ માટે ખૂબ જ કામનું સાબિત થઈ શકે છે જેઓ અત્યારે કોઈ ટેક્સ્ટને ‘વ્યૂ વન્સ’ મોકલવા માટે પહેલા તેને ઈમેજમાં જોડીને મોકલે છે.
હાલમાં આ ફીચર ડેવલપમેન્ટ સ્ટેજમાં છે અને હજુ કોઈ બીટા ટેસ્ટર માટે ઉપલબ્ધ નથી. આશા છે કે આવનારા સમયમાં વોટ્સએપના ટેસ્ટફ્લાઈટ બીટા યુઝર્સને સૌથી પહેલા તેનો એક્સેસ મળશે, ત્યારબાદ તેને બધા યુઝર્સ માટે રોલઆઉટ કરવામાં આવી શકે છે.
