EPFO Rules: શ્રમ અને રોજગાર મંત્રાલયે સામાજિક સુરક્ષા સંહિતા હેઠળ કર્મચારી ભવિષ્ય નિધિ સંગઠન (EPFO) ની ત્રણ નવી યોજનાઓ અધિસૂચિત કરી દીધી છે. જેમાં કર્મચારી ભવિષ્ય નિધિ યોજના-૨૦૨૬, કર્મચારી પેન્શન યોજના-૨૦૨૬ અને કર્મચારી જમા-લિંક્ડ વીમા યોજના-૨૦૨૬ સામેલ છે. નવી યોજનાઓમાં ડિજિટલ વ્યવસ્થાને મજબૂત બનાવવા અને ભવિષ્ય નિધિ (પીએફ), પેન્શન તથા વીમા દાવાઓના સમયસર નિકાલ સુનિશ્ચિત કરવા પર વિશેષ ભાર આપવામાં આવ્યો છે.
નવી વ્યવસ્થા હેઠળ જો ભવિષ્ય નિધિ, પેન્શન કે વીમાનો દાવો તમામ જરૂરી દસ્તાવેજો સાથે પૂરો હોવા છતાં ૨૦ દિવસની અંદર પતાવવામાં ન આવે, તો સંબંધિત કમિશનર પર ૧૨ ટકા વાર્ષિક દંડાત્મક વ્યાજ લગાવી શકાશે. આ રકમ સંબંધિત અધિકારીના પગારમાંથી કાપવામાં આવશે. મંત્રાલયનું કહેવું છે કે, આનાથી દાવાઓના નિકાલમાં બિનજરૂરી વિલંબ પર રોક લાગશે અને કર્મચારીઓને સમયસર તેમના પૈસા મળશે. મંત્રાલયના એક વરિષ્ઠ અધિકારીએ જણાવ્યું કે પહેલા પણ વિલંબ થવા પર વ્યાજ આપવાની જોગવાઈ હતી, પરંતુ હવે તેને સ્પષ્ટપણે ૧૨ ટકા નક્કી કરી દેવામાં આવ્યું છે. પહેલા અધિકારીઓએ પીએફ પર જાહેર વ્યાજ દર અનુસાર ચૂકવણી કરવી પડતી હતી.
કર્મચારીઓ અને નોકરીદાતાઓનું અંશદાન પહેલા જેવું જ રહેશે
નવી યોજનાઓ લાગુ થવાની સાથે કર્મચારી ભવિષ્ય નિધિ યોજના-૧૯૫૨, કર્મચારી પરિવાર પેન્શન યોજના-૧૯૭૧, કર્મચારી પેન્શન યોજના-૧૯૯૫ અને કર્મચારી જમા-લિંક્ડ વીમા યોજના-૧૯૭૬ નું સ્થાન લેશે. જોકે, કર્મચારીઓ અને નોકરીદાતાઓના અંશદાનમાં કોઈ ફેરફાર કરવામાં આવ્યો નથી. પહેલાની જેમ કર્મચારી અને નોકરીદાતા બંને પોતાના મૂળ પગારનો ૧૨-૧૨ ટકા ફાળો આપશે. નોકરીદાતાના ફાળામાંથી ૮.૩૩ ટકા રકમ પેન્શન યોજનામાં જશે, જ્યારે કેન્દ્ર સરકાર પહેલાની જેમ ૧.૧૬ ટકાનો ફાળો આપશે.
નવી યોજનાઓમાં નોકરીદાતાઓ અને ઈપીએફઓ બંને માટે ડિજિટલ અનુપાલનને ફરજિયાત બનાવવામાં આવ્યું છે, જેથી સભ્યો પીએફ ઉપાડ, પેન્શન, વીમા અને અન્ય સેવાઓનો લાભ સંપૂર્ણપણે ઓનલાઈન અને વિલંબ વગર લઈ શકે.
