Mitchell Starc 5 Wickets: મિચલ સ્ટાર્કનો કહેર, 22 બોલમાં 5 વિકેટ લઈને બાંગ્લાદેશની બૅટિંગ તોડી નાખી
AUS vs BAN 2nd Test: ઑસ્ટ્રેલિયાના ઝડપી બોલર મિચલ સ્ટાર્કે બાંગ્લાદેશ સામેની બીજી ટેસ્ટના પ્રથમ સેશનમાં ધારદાર બોલિંગ કરી. સ્ટાર્કે શાનદાર બોલિંગ કરતા પોતાના પ્રથમ ચાર ઓવરમાં જ 5 વિકેટ ઝડપી લીધી. મકાયમાં રમાઈ રહેલી આ મેચમાં સ્ટાર્કે બાંગ્લાદેશની બૅટિંગની કમર તોડી નાખી. ગ્રેટ બૅરિયર રીફ એરીનામાં ઑસ્ટ્રેલિયાએ ટૉસ જીતીને પ્રથમ બોલિંગ પસંદ કરી. સ્ટાર્કે મેચના પ્રથમ જ બોલ પર શાદમાન ઇસ્લામને આઉટ કરીને બાંગ્લાદેશને મોટો ઝટકો આપ્યો. ટેસ્ટ ક્રિકેટમાં આ ચોથી વખત છે જ્યારે સ્ટાર્કે મેચના પ્રથમ બોલ પર વિકેટ લીધી છે.
ત્યારબાદ તેણે પોતાની આગામી સ્પેલમાં તંઝીદ હસન અને કેપ્ટન નજમુલ હુસેન શાંતોને આઉટ કરી દીધા. આ બંને બૅટ્સમેનનું ખાતું પણ ખૂલ્યું નહોતું. બાંગ્લાદેશની મુશ્કેલીઓ અહીં અટકી નહોતી. મોમિનુલ હક પણ સ્ટાર્કનો શિકાર બન્યા, જેમનો કૅચ નાથન ગ્રીને પકડ્યો. સ્ટાર્કે લિટન દાસને LBW આઉટ કરીને પોતાની પાંચમી વિકેટ પૂરી કરી.
22 balls, five wickets, one Mitchell Starc #AUSvBAN
Catch up on a stunning start: https://t.co/drrfqp5tb0 pic.twitter.com/JLTQq5EZO9
— cricket.com.au (@cricketcomau) August 22, 2026
ટેસ્ટમાં છઠ્ઠો સૌથી ઝડપી 5 વિકેટ હૉલ
મિચલ સ્ટાર્કે માત્ર 22 બોલમાં પોતાની 5 વિકેટ પૂરી કરી. આ ટેસ્ટ ઇતિહાસનો છઠ્ઠો સૌથી ઝડપી 5 વિકેટ હૉલ છે. સૌથી ઓછા 15 બોલમાં 5 વિકેટ લેવાનો વિશ્વ રેકોર્ડ પણ મિચલ સ્ટાર્કના નામે છે. ગયા વર્ષે વેસ્ટ ઇન્ડીઝ સામે તેમણે આ સિદ્ધિ મેળવી હતી. ઇર્ની ટોશાક, સ્ટુઅર્ટ બ્રૉડ અને સ્કૉટ બોલેન્ડે 19-19 બોલમાં 5 વિકેટ પૂરી કરી છે. જ્યારે શેન વૉટસને 2011માં સાઉથ આફ્રિકા સામે 21 બોલમાં 5 વિકેટ લીધી હતી.
મિચલ સ્ટાર્કે બાંગ્લાદેશની પ્રથમ ઇનિંગ્સમાં 10 ઓવર નાખ્યા. તેમાં તેમણે 12 રન આપીને 6 બૅટ્સમેનોને આઉટ કર્યા. બાંગ્લાદેશની ઇનિંગ્સની છેલ્લી વિકેટ પણ સ્ટાર્કને મળી. તેના કારણે બાંગ્લાદેશની ટીમ માત્ર 64 રનમાં ઑલઆઉટ થઈ ગઈ. આ ટેસ્ટ ક્રિકેટમાં બાંગ્લાદેશનો ચોથો સૌથી નાનો સ્કોર છે.
