Duleep Trophy: દલીપ ટ્રોફીના પ્રથમ દિવસે ઈસ્ટ ઝોને નોર્થ ઈસ્ટ ઝોન સામે શાનદાર રમતનું પ્રદર્શન કરતાં 6 વિકેટના નુકસાન પર 355 રનનો મજબૂત સ્કોર ઊભો કર્યો છે. એક સમયે ઈસ્ટ ઝોનની ટીમ 138 રન પર 5 વિકેટ ગુમાવીને સંકટમાં દેખાઈ રહી હતી. ત્યારબાદ સુદીપ ઘરામી (146 રન) અને શાહબાઝ અહમદ (નાબાદ 100 રન)એ છઠ્ઠી વિકેટ માટે 150 રનની શાનદાર ભાગીદારી કરીને ટીમને સંભાળી હતી. ઘરામીએ પોતાની 185 બોલની ઇનિંગમાં 25 ચોગ્ગા અને 1 છગ્ગો ફટકાર્યો, જ્યારે શાહબાઝે 137 બોલમાં 9 ચોગ્ગા અને 2 છગ્ગાની મદદથી પોતાની સદી પૂર્ણ કરી.
વૈભવ સૂર્યવંશી અને ઈશ્વરન ફ્લોપ, કુશાગ્રે ફટકારી અડધી સદી
ઈસ્ટ ઝોન માટે ઇનિંગની શરૂઆત સારી રહી નહોતી. યુવા બેટ્સમેન વૈભવ સૂર્યવંશી અને અનુભવી અભિમન્યુ ઈશ્વરન સસ્તામાં પેવેલિયન પરત ફર્યા. જોકે, ત્યારબાદ કુમાર કુશાગ્રે ઘરામી સાથે મળીને ત્રીજી વિકેટ માટે 92 રનની ઉપયોગી ભાગીદારી કરી. કુશાગ્રના આઉટ થયા બાદ ઈશાન કિશન અને વિરાટ સિંહ પણ ઝડપથી આઉટ થઈ ગયા, પરંતુ ઘરામી અને શાહબાઝની ઇનિંગે ઈસ્ટ ઝોનને મોટા સ્કોર તરફ આગળ વધારી દીધું.
દેશપાંડે અને કોટિયનની ઘાતક બોલિંગ, 251 રને સમેટાઈ નોર્થ ઝોન
દિવસની બીજી મેચમાં વેસ્ટ ઝોનના બોલરોએ નોર્થ ઝોનની પ્રથમ ઇનિંગને 251 રન પર જ સમેટી દીધી. વેસ્ટ ઝોન તરફથી ઝડપી બોલર તુષાર દેશપાંડે (4/57) અને ઑફ-સ્પિનર તનુષ કોટિયને (4/72) શાનદાર પ્રદર્શન કરતાં 4-4 વિકેટ ઝડપી હતી. નોર્થ ઝોન માટે આયુષ બદોનીએ 51 રનની ઇનિંગ રમી, જ્યારે નીચલા ક્રમમાં અંશુલ કંબોજે 52 બોલમાં 5 ચોગ્ગા અને 5 છગ્ગાની મદદથી 60 રન બનાવીને ટીમનો સ્કોર 250ને પાર પહોંચાડ્યો.
શૉ અને દેસાઈ આઉટ, વેસ્ટ ઝોને બનાવ્યા 31/2
નોર્થ ઝોનને 251 રન પર રોક્યા બાદ પોતાની પ્રથમ ઇનિંગની શરૂઆત કરવા ઉતરેલી વેસ્ટ ઝોનની ટીમને પણ શરૂઆતમાં ઝટકા લાગ્યા. દિવસની રમત પૂર્ણ થઈ ત્યાં સુધી વેસ્ટ ઝોને 10 ઓવરમાં 2 વિકેટ ગુમાવીને 31 રન બનાવી લીધા છે. ઓપનર પૃથ્વી શૉને ડાબોડી સ્પિનર આબિદ મુશ્તાકે આઉટ કર્યો, જ્યારે હર્વિક દેસાઈને અર્શદીપ સિંહે પેવેલિયન મોકલ્યો.
