Digi Yatra E Passport: એરપોર્ટ પર લાંબી લાઇન અને પ્રક્રિયાથી બચવા માટે સરકાર બોર્ડિંગને સરળ બનાવવામાં લાગી છે. આ જ દિશામાં હવે આંતરરાષ્ટ્રીય મુસાફરો માટે પણ Digi Yatra સુવિધા શરૂ કરવાની તૈયારી છે. તેને દિલ્હી અને મુંબઈ જેવા મોટા એરપોર્ટ પરથી ટ્રાયલના ધોરણે શરૂ કરી શકાય છે. નાગરિક ઉડ્ડયન મંત્રાલય એજન્સીઓ સાથે મળીને આ યોજના પર કામ કરી રહ્યું છે.
સૂત્રોનું કહેવું છે કે આ યોજનામાં પણ સ્થાનિક મુસાફરોની જેમ ફોટો અને અન્ય માહિતી સિસ્ટમમાં અપલોડ કરવાની રહેશે. આધાર સાથે બાયોમેટ્રિક માહિતી અપલોડ કર્યા બાદ સિસ્ટમ મુસાફરને Digi Yatra સુવિધા આપશે. જ્યારે તમે આ પ્રક્રિયા પૂર્ણ કર્યા બાદ એરપોર્ટ પહોંચશો, ત્યારે એન્ટ્રી ગેટ પર લગાવવામાં આવેલું મશીન તમારા ચહેરાને સ્કેન કરશે. ત્યારબાદ તમે સિક્યોરિટી ચેકમાંથી પસાર થઈને સીધા બોર્ડિંગ ગેટ સુધી પહોંચી શકશો. જે મુસાફરો પાસે ઈ-પાસપોર્ટ હશે, તેમની સાથે આ પ્રક્રિયાની શરૂઆત કરવામાં આવશે.
શું થશે ફાયદો?
તેનો ફાયદો એરપોર્ટ પર એન્ટ્રી અને સિક્યોરિટી ચેકમાં થશે. અહીં તમારે તમારો બોર્ડિંગ પાસ અને પાસપોર્ટ બતાવવાની જરૂર પડશે નહીં. બાકીની ઇમિગ્રેશન તપાસની પ્રક્રિયા હાલની જેમ જ ચાલુ રહેશે.
ક્યારે થશે શરૂ?
સૂત્રોના જણાવ્યા અનુસાર, ઓક્ટોબરથી ડિસેમ્બર વચ્ચે દિલ્હી અને મુંબઈ ઉપરાંત બેંગલુરુ, હૈદરાબાદ અને કોચ્ચી ઇન્ટરનેશનલ એરપોર્ટ પર પણ તેનું ટ્રાયલ શરૂ થઈ શકે છે. જોકે, સ્થાનિક મુસાફરો માટે શરૂ કરવામાં આવેલી Digi Yatra હજુ સુધી દેશના તમામ એરપોર્ટ પર લાગુ થઈ શકી નથી.
