આતંકવાદમાં પાકિસ્તાન નંબર-1 બન્યું, હક્કાનીએ જૂની નીતિઓ પર ઉઠાવ્યા સવાલ
Pakistan Terrorism: અમેરિકામાં પાકિસ્તાનના પૂર્વ રાજદૂત હુસૈન હક્કાનીએ શહબાઝ સરકારની ટીકા કરતા કહ્યું છે કે ‘પાકિસ્તાને ઘરમાં સાપ પાળ્યા છે અને એ સાપ તેને ડંખી રહ્યા છે.’ હુસૈન હક્કાનીએ ‘ગ્લોબલ ટેરરિઝમ ઇન્ડેક્સ 2026’માં પાકિસ્તાન આતંકવાદથી સૌથી વધુ પ્રભાવિત દેશ તરીકે સામે આવતાં તીખી પ્રતિક્રિયા આપી છે. તેમણે કહ્યું કે દેશ હવે ઉગ્રવાદી જૂથો પ્રત્યેની પોતાની જૂની નીતિઓનું પરિણામ ભોગવી રહ્યો છે.
ઇન્ડેક્સમાં પાકિસ્તાનની સ્થિતિ દર્શાવતું ગ્રાફિક શેર કરતા હક્કાનીએ એક્સ પર લખ્યું, ‘જ્યારે તમે તમારા ઘરના પાછળના ભાગમાં સાપ પાળો છો ત્યારે આવું જ થાય છે. એક દિવસ ઘરના સભ્યોને પણ ડંખ મારવામાં આવે છે. પાકિસ્તાને પચાસ વર્ષ પહેલાં ઉગ્રવાદી જિહાદીઓને હથિયારો આપવાનું શરૂ કર્યું હતું. હવે આતંકવાદી હુમલાનો ભોગ બનતા દેશોમાં પાકિસ્તાન સૌથી ઉપર છે. શું કોઈ આમાંથી બોધપાઠ લેવા તૈયાર છે?’
હક્કાનીએ હિલેરી ક્લિન્ટનની એ ઐતિહાસિક ચેતવણી યાદ અપાવી
તમને જણાવી દઈએ કે અમેરિકાના પૂર્વ વિદેશ મંત્રી હિલેરી ક્લિન્ટને 2011માં ઇસ્લામાબાદમાં કહ્યું હતું, ‘તમે તમારા બેકયાર્ડમાં સાપ પાળીને એવી આશા રાખી શકતા નથી કે તેઓ માત્ર તમારા પાડોશીઓને જ ડંખશે.’ હુસૈન હક્કાનીએ 2026ના સંદર્ભમાં આ જ વાત ફરીથી કહી છે, જ્યારે પાકિસ્તાનના ખૈબર પખ્તૂનખ્વા અને બલૂચિસ્તાન જેવા પ્રાંતો આતંકવાદથી ખરાબ રીતે ઝઝૂમી રહ્યા છે. ગઈકાલે પણ બલૂચિસ્તાનમાં થયેલા એક આત્મઘાતી વિસ્ફોટમાં 11 પોલીસકર્મીઓ માર્યા ગયા છે.
گھر کے پچھلے صحن میں سانپ پالنے کا نتیجہ یہی ہوتا ہے کہ ایک دن گھر والوں کو بھی ڈستے ہیں۔ پاکستان نے پچاس برس پہلے انتہا پسند جہادیوں کو مسلح کرنا شروع کیا تھا۔ اب پاکستان دہشت گرد حملوں کا نشانہ بننے والے ممالک میں سب سے اوپر ہے۔ ہے کوئی سبق سیکھنے والا؟ pic.twitter.com/zJ7cSD1NSw
— Husain Haqqani (@husainhaqqani) September 25, 2026
ગ્લોબલ ટેરરિઝમમાં પાકિસ્તાન નંબર-1 કેવી રીતે પહોંચ્યું?
- ‘ઇન્સ્ટિટ્યૂટ ફોર ઇકોનોમિક્સ એન્ડ પીસ’ (IEP)એ પોતાના 2026ના ઇન્ડેક્સમાં પાકિસ્તાનને આતંકવાદથી પ્રભાવિત દેશોમાં પ્રથમ સ્થાને રાખ્યું છે.
- 2025માં પાકિસ્તાનમાં આતંકવાદી ઘટનાઓમાં 1,139 લોકોના મોત થયા અને દેશમાં કુલ 1,045 આતંકવાદી ઘટનાઓ નોંધાઈ. દેશમાં આતંકવાદ સાથે જોડાયેલા મોતનો આંકડો 2013 પછીના પોતાના સૌથી ઊંચા સ્તરે પહોંચ્યો છે. આ વર્ષે પણ સેંકડો આતંકવાદી ઘટનાઓ બની ચૂકી છે.
- પાકિસ્તાને આ ઇન્ડેક્સમાં 8.574નો સ્કોર મેળવ્યો અને બુર્કિના ફાસોથી આગળ નીકળી ગયું.
- પાકિસ્તાન ઇન્ડેક્સની દરેક આવૃત્તિમાં આતંકવાદથી સૌથી વધુ પ્રભાવિત 10 દેશોમાં સામેલ રહ્યું છે, પરંતુ 2025માં પ્રથમ વખત તે ટોચ પર પહોંચ્યું.
- IEPના અહેવાલ અનુસાર 2025માં પાકિસ્તાનમાં આતંકવાદથી થતા મોતમાં લગભગ છ ટકાનો વધારો થયો છે. આતંકવાદ સાથે જોડાયેલા મોતમાં વધારો થવાનું આ સતત છઠ્ઠું વર્ષ છે.
- આતંકવાદી ઘટનાઓની સંખ્યા 2024ની 1,098થી થોડી ઘટીને 2025માં 1,045 થઈ ગઈ. જ્યારે બંધક બનાવવાની ઘટનાઓમાં પણ મોટો વધારો નોંધાયો છે. 2024માં આ સંખ્યા 101 હતી, જે 2025માં વધીને 655 થઈ ગઈ.
- સમગ્ર વિશ્વમાં 2025માં આતંકવાદથી થતા મોત 28 ટકા ઘટીને 5,582 થયા, જ્યારે હુમલાની સંખ્યા લગભગ 22 ટકા ઘટીને 2,944 થઈ.
બલૂચિસ્તાન, ખૈબર પખ્તૂનખ્વા આતંકવાદથી સૌથી વધુ પ્રભાવિત
- અહેવાલમાં પાકિસ્તાનના પશ્ચિમી સરહદી વિસ્તારોને આતંકવાદી પ્રવૃત્તિઓનું મુખ્ય કેન્દ્ર ગણાવવામાં આવ્યું છે.
- IEP અનુસાર 2025માં પાકિસ્તાનમાં થયેલા આતંકવાદી હુમલાઓમાંથી 74 ટકાથી વધુ અને આતંકવાદ સાથે જોડાયેલા મોતમાંથી 67 ટકા મોત બલૂચિસ્તાન અને ખૈબર પખ્તૂનખ્વામાં થયા.
- અહેવાલમાં ઉગ્રવાદી પ્રવૃત્તિઓમાં વધારાનું એક કારણ 2021માં અફઘાનિસ્તાનમાં તાલિબાનની સત્તામાં વાપસી અને ત્યારબાદ પાકિસ્તાન-અફઘાનિસ્તાન સરહદ પર હુમલાઓમાં વધારો હોવાનું જણાવાયું છે.
- તહરીક-એ-તાલિબાન પાકિસ્તાન (TTP) અને બલૂચિસ્તાન લિબરેશન આર્મી (BLA)ની વધતી હિંસાએ સુરક્ષા સાથે જોડાયેલા મોટા પડકારો ઊભા કર્યા છે.
પાકિસ્તાન માટે TTP બની સૌથી મોટી મુશ્કેલી
IEPનું કહેવું છે કે TTP સતત પાંચમા વર્ષે પાકિસ્તાનનું સૌથી ખતરનાક આતંકવાદી સંગઠન રહ્યું. 2025માં પાકિસ્તાનમાં આતંકવાદ સાથે જોડાયેલા 56 ટકા મોત માટે તેને જવાબદાર ગણાવવામાં આવ્યું છે. તેણે 595 હુમલા કર્યા, જેમાં 637 લોકોના મોત થયા, જે પાછલા વર્ષની સરખામણીમાં મોતમાં 13 ટકાનો વધારો છે. અહેવાલમાં TTPને 2025માં વિશ્વનું ત્રીજું સૌથી ખતરનાક આતંકવાદી સંગઠન ગણાવવામાં આવ્યું છે અને કહેવામાં આવ્યું છે કે વિશ્વના ચાર સૌથી ખતરનાક આતંકવાદી સંગઠનોમાંથી આ એકમાત્ર એવું સંગઠન હતું જેના હુમલામાં મૃત્યુ પામનારા લોકોની સંખ્યામાં વધારો થયો.
