શું અંજારમાં જાણી જોઈને શ્રમિકોને મારી નાખવાના ઈરાદે ઝૂંપડાં સળગાવાયાં હતાં ?
અંજાર, તા. 17 : શહેરની યોગેશ્વર ચોકડી અને અસાબા વેબ્રિજ પાસે માર્ગ અકસ્માતની ઘટના તાજી જ છે, ત્યાં શહેરની મધ્યમાં જ ભૂંગાઓમાં આગ ચાંપી શ્રમિકોની હત્યાનો પ્રયાસ કરાયો હોવાના બનાવનાં પગલે ભારે ખળભળાટ મચી ગયો હતો. આ બનાવનાં પગલે ઘટનાસ્થળે લોકો મોટી સંખ્યામાં એકત્ર થઈ ગયા હતા. આ મામલે શખ્સ સામે હત્યાના પ્રયાસ સહિતની કલમો તળે ફરિયાદ દર્જ કરાવાઈ છે.
મજૂરી કરીને ગુજરાન ચલાવતા શ્રમિકોનાં ઝૂંપડાં સળગાવી દેવાતાં શ્રમિકો ઉપર આભ નીચે ધરતી જેવી પરિસ્થિતિમાં આવી ગયા હતા. પોલીસના સત્તાવાર સાધનો પાસેથી મળતી વિગતો મુજબ આ બનાવ આજે સવારના અરસામાં ખત્રીચોક ઝૂંપડા પાસે બન્યો હતો. ભૂંગામાં નાનાં ભૂલકાં સહિત 10 જેટલા પરિવાર અંદર હતા, આ અરસામાં ભૂંગાઓ ઉપર જ્વલનશીલ પ્રવાહી છાંટીને આરોપી રફીક કુંભારે આગ ચાંપી દીધી હતી. આગ લગાડી આરોપી નાસી છૂટયો હતો. બનાવની જાણ થતાં ઘટનાસ્થળે એકત્ર લોકો અને પોલીસે તાત્કાલિક ભૂંગામાં રહેલા લોકોને બચાવી લેતાં સદ્નસિબે કોઈને જાનહાનિ થઈ ન હતી. પલભરમાં તમામ ઝૂંપડાં આગમાં સ્વાહા થઈ ગયાં હતાં અને મજૂરી કામ કરતા શ્રમિકોની ઘરવખરી સળગીને ખાખ થઈ ગઈ હતી. આ બનાવનાં પગલે લોકોમાં ભારે દોડધામ થઈ પડી હતી. અગ્નિશમન દળ દ્વારા પાણીનો મારો ચલાવીને આગને કાબૂમાં લેવાઈ હતી.
આ મામલે ફરિયાદી બદ્રિનાથ ગંગારામ યાદવે નોંધાવેલી ફરિયાદને ટાંકીને પોલીસે કહ્યું હતું કે, આરોપી ફરિયાદી અને તેની આસપાસ રહેતા લોકોને મજૂરી કામ માટે લઈ જતો હતો, પરંતુ પૈસા આપતો ન હતો. ફરિયાદી અને લોકોએ મજૂરી કામ માટે આવવાની ના પાડતાં ઉશ્કેરાયેલા આરોપીએ તમામને જીવતા સળગાવી નાખવાની ધમકી આપી હતી. દરમ્યાન આજે સવારે આ બાબતનું મનદુ:ખ રાખી શ્રમિકોને મારી નાખવાના ઈરાદે ભૂંગામાં આગ લગાડી દીધી હતી. પોલીસે આરોપીને રાઉન્ડઅપ કરી લીધો છે. બનાવનાં પગલે શહેરભરમાં ભારે ચકચાર પ્રસરી હતી. પોલીસે વધુ તપાસ હાથ ધરી છે. – .. તો શ્રમિકોના ભૂંગા સળગાવવાની ઘટના અટકાવી શકાઈ હોત : અંજાર, તા. 17 : પૂર્વ કચ્છના વડાંમથક ગણાતાં ઐતિહાસિક અંજાર શહેરમાં થોડા કલાકોમાં જ બનેલી બે ઘટનાથી શહેરમાં પોલીસની નિક્રીયતાથી કાયદો વ્યવસ્થા ખોરવાઈ ગયા હોવાની રાવ ઊઠી છે. પોલીસની ઢીલી કામગીરીના કારણે શહેરીજનોમાં આક્રોશ ભભૂકી ઊઠયો છે.
શહેરમાં ધોળા દિવસે ચોરી, લૂંટ, હત્યાના બનાવ, દારૂનું થતું વેચાણ, ટ્રાફિક અમલવારીનું ઉલ્લંઘન, અસામાજિક તત્ત્વોનો ત્રાસ સહિતની સમસ્યાઓથી ઐતિહાસિક શહેરના લોકોમાં ભારે કચવાટની લાગણી પ્રસરી છે. શહેરમાં અવાર-નવાર ચોરીના બનતા બનાવો, ખુલ્લેઆમ અંગ્રેજી શરાબનું વેચાણ જાણે સામાન્ય હોય તે રીતે કોઈ કાર્યવાહી કરાતી ન હોવાની રાવ શહેરના જાગૃત નાગરિકો કરી રહ્યા છે. શરાબના વેચાણ સામે પોલીસ શા માટે કાર્યવાહી નથી કરતી તેવું કદાચ સૌ કોઈ જાણતા હોવાની ટકોર જાણકારો કરી રહ્યા છે. અસામાજિક તત્ત્વો દ્વારા મોચી બજાર મધ્યે આઠથી 10 ભૂંગાને આગ ચાંપી દેવામાં આવી હતી. અસામાજિક તત્ત્વો દ્વારા શ્રમિકોને ધાકધમકી પણ કરવામાં આવી હતી. આ મામલે ફરિયાદ નોંધવા માટે પોલીસનો સંપર્ક કરવાનો પ્રયાસ કરાયો હતો, પરંતુ પોલીસનો કોઈ સાથ સહકાર મળ્યો ન હતો અને આજે આ માથાભારે શખ્સે ભૂંગા સળગાવી નાખતાં શ્રમજીવીઓનું આશિયાનું છીનવાઈ ગયું હતું.
આંતરિક પરિસ્થિતિ જોતાં કોઈ અનિચ્છનીય બનાવ બનવાની સંભાવના જાણકારો દ્વારા ચિંતાની લાગણી સાથે વ્યક્ત કરવામાં આવી છે. યોગેશ્વર ચોકડી પાસે ભારે વાહને બાઈકને હડફેટે લેતાં યુવાનનું મોત નિપજ્યાના બનાવના પગલે લોકોમાં ભારે આક્રોશ ભભૂકી ઊઠયો હતો. સ્થાનિકોએ રાત્રિના પોલીસની કામગીરી સામે સવાલ ઊઠાવ્યા હોવાનું સૂત્રો જણાવી રહ્યા છે. પોલીસ દ્વારા પ્રસાદી લઈને ભારે વાહનોને પસાર કરાતાં હોવાનો આક્ષેપ લોકો કરી રહ્યા છે. અસામાજિક પ્રવૃત્તિનો ગ્રાફ જોતાં લોકોમાં પોલીસ પ્રત્યે વિશ્વાસ ઊઠી ગયો હોવાનું જાણકારો કહી રહ્યા છે. કથળેલી પરિસ્થિતિને કાબૂમાં લેવા ત્વરીત પગલાંની માંગ ઊઠી છે.
