December 1st Rules Change: નવેમ્બર મહિનો પૂરો થવાનો છે અને સોમવારથી ડિસેમ્બર મહિનાની શરૂઆત થવાની છે. ડિસેમ્બર મહિનાની શરૂઆતની સાથે જ તમારી રોજિંદા જીવન સાથે જોડાયેલા ઘણા બધા ફેરફારો લાગુ થવાના છે, જે તમારી ફાઇનાન્શિયલ જરૂરિયાતો ને પણ અસર કરશે. આ ફેરફારોમાં ઘરેલુ ગેસ સિલિન્ડરના ભાવો, આધાર સાથે જોડાયેલા નિયમો, પેન્શન સ્કીમ અને ટેક્સ સંબંધિત નિયમોમાં બદલાવ સામેલ છે. ચાલો જાણીએ આ ફેરફારો વિશે, જેની સીધી અસર તમારા ખિસ્સા પર પડવાની છે.
આધાર કાર્ડ સાથે જોડાયેલા નિયમો
૧ ડિસેમ્બરથી તમારું આધાર કાર્ડ આસાનીથી અપડેટ થશે. તમારા આધાર કાર્ડ પર નામ, સરનામું, જન્મતારીખ જેવી જાણકારી તમે સંપૂર્ણ રીતે ઓનલાઈન અપડેટ કરી શકો છો. આ નવી અપડેટ પ્રક્રિયાથી હવે ડેટાનું વેરિફિકેશન પાન કાર્ડ કે પાસપોર્ટ જેવા સરકારી રેકોર્ડ્સથી થઈ જશે. તમે તમારો મોબાઈલ નંબર પણ ઓનલાઈન અપડેટ કરી શકશો. UIDAI એ નવી આધાર એપ પણ લોન્ચ કરી દીધી છે.
એલપીજી સિલિન્ડરની કિંમતો
ઓઇલ માર્કેટિંગ કંપનીઓ મહિનાની પહેલી તારીખે એલપીજી ગેસ સિલિન્ડરની કિંમતો જાહેર કરે છે. ૧ ડિસેમ્બરના રોજ તેલ કંપનીઓ રસોઈ ગેસ અને કોમર્શિયલ સિલિન્ડરની નવી કિંમતો જાહેર કરશે. જો આ ભાવોમાં વધારો થાય તો ગૃહિણીઓના બજેટ પર સીધી અસર પડશે.
ATF મોંઘું થશે તો વધશે હવાઈ ભાડું!
દર મહિનાની પહેલી તારીખે ઓઇલ માર્કેટિંગ કંપનીઓ ATF (એવિએશન ટર્બાઇન ફ્યુઅલ) ની કિંમતો પણ અપડેટ કરે છે. જો ૧ ડિસેમ્બરના રોજ કિંમતોમાં અણધાર્યો વધારો થયો તો તેની સીધી અસર હવાઈ ભાડા પર પણ પડી શકે છે.
પેટ્રોલ-ડીઝલની કિંમતોમાં બદલાવ
તેલ કંપનીઓ દર નવો મહિનો શરૂ થતા પહેલા પેટ્રોલ અને ડીઝલની કિંમતોની સમીક્ષા કરે છે. જોકે આ કિંમતો દરરોજ પણ બદલાઈ શકે છે. પેટ્રોલ-ડીઝલની કિંમતો વૈશ્વિક વલણો અને કરન્સીની ચાલ પર નિર્ભર કરે છે. ૧ ડિસેમ્બરના રોજ જો કિંમતોમાં બદલાવ થાય છે તો સામાન્ય લોકોના ખિસ્સા પર તેની સીધી અસર પડશે.
ટેક્સ સંબંધિત જરૂરિયાતો
કેટલીક ટેક્સ-સંબંધિત જરૂરિયાતોને પૂર્ણ કરવાની અંતિમ તારીખ ૩૦ નવેમ્બર છે. કેટલાક ડાયરેક્ટ-ટેક્સ અનુપાલન ૩૦ નવેમ્બરના રોજ સમાપ્ત થઈ રહ્યા છે, જેમાં ઓક્ટોબરમાં કાપેલા TDS ની વિગતો પણ સામેલ છે. આ જાણકારી ધારા 194-IA, 194-IB, 194-M અને 194-S હેઠળ જરૂરી છે. જો તમે કરદાતા છો, તો ભારે દંડથી બચવા માટે સમયસર તમારું રિટર્ન દાખલ કરવું જોઈએ.
પેન્શન સ્કીમ પસંદ કરવાની છેલ્લી તક
કેન્દ્ર સરકારે કર્મચારીઓ માટે યુનિફાઇડ પેન્શન સ્કીમ (UPS) માં રજિસ્ટ્રેશનની છેલ્લી તારીખ ૩૦ નવેમ્બર નક્કી કરી છે. જે કર્મચારીઓ નેશનલ પેન્શન સિસ્ટમ (NPS) માંથી આ UPS સ્કીમમાં સ્વિચ થવા માંગે છે, તેમને ૩૦ નવેમ્બર સુધીમાં તેનો વિકલ્પ પસંદ કરી લેવો પડશે. અધિકારીઓનું કહેવું છે કે ૧ ડિસેમ્બરથી આ વિન્ડો ફરીથી ખુલશે નહીં. જો કોઈ કર્મચારી સ્વિચ થવા માંગતો હોય, તો તેણે આ પ્રક્રિયા તાત્કાલિક પૂર્ણ કરી લેવી જોઈએ.
