Railway Digital Claims: ભારતીય રેલવેએ મુસાફરોની સુવિધાને ધ્યાનમાં રાખીને એક નવી ડિજિટલ પહેલ શરૂ કરવાનો નિર્ણય લીધો છે. રેલવે હવે e-RCT (ઇલેક્ટ્રોનિક રેલવે ક્લેમ્સ ટ્રિબ્યુનલ) સિસ્ટમ લોન્ચ કરશે. આ એક સંપૂર્ણ ઓનલાઇન પ્લેટફોર્મ હશે, જેનાથી ક્લેમ સંબંધિત મામલાઓનો નિકાલ સરળ અને ઝડપી બની શકશે. ભારતીય રેલવેનું કહેવું છે કે આ નવી વ્યવસ્થાથી લોકોને ઓફિસોના ધક્કા નહીં ખાવા પડે અને સમગ્ર પ્રક્રિયા પારદર્શક બનશે.
શું છે e-RCT સિસ્ટમ?
e-RCT એટલે કે ઇલેક્ટ્રોનિક રેલવે ક્લેમ્સ ટ્રિબ્યુનલ એક ઓનલાઇન સિસ્ટમ છે, જ્યાં કોઈ પણ વ્યક્તિ પોતાના ક્લેમ સાથે જોડાયેલો કેસ ઘરે બેઠા દાખલ કરી શકે છે. પહેલા આવા મામલાઓમાં લોકોને ટ્રિબ્યુનલની ઓફિસે જવું પડતું હતું, પરંતુ હવે આ પ્રક્રિયા ડિજિટલ થઈ જશે.
આ સિસ્ટમ ખાસ કરીને આ બાબતો માટે કામ કરશે-
રેલવે અકસ્માત કે અઘટિત ઘટનાઓ
સામાનનું નુકસાન કે ચોરી
ભાડાનો વિવાદ
અન્ય વળતર સંબંધિત મામલાઓ
કેવી રીતે કામ કરશે આ સિસ્ટમ?
આ પ્લેટફોર્મ પર કેસ દાખલ કરવો ઘણો સરળ રહેશે.
કોઈ પણ વ્યક્તિ ગમે ત્યારે અને ગમે ત્યાંથી ઓનલાઇન અરજી કરી શકશે.
કેસ દાખલ કરતી વખતે એક ચેકલિસ્ટ આપવામાં આવશે, જેથી જરૂરી જાણકારી પૂરી કરી શકાય.
તમામ જરૂરી દસ્તાવેજો ઓનલાઇન અપલોડ કરી શકાશે.
કેસનું ઓટોમેટિક એલોટમેન્ટ થશે, એટલે કે સિસ્ટમ પોતે જ કેસ સંબંધિત અધિકારીને મોકલી દેશે. આ ઉપરાંત નોટિસ અને અન્ય જરૂરી કાગળો પણ ડિજિટલ સ્વરૂપે ઉપલબ્ધ થશે.
ઈ-હિયરિંગની સુવિધા
e-RCT સિસ્ટમમાં ઈ-હિયરિંગ એટલે કે ઓનલાઇન સુનાવણીની સુવિધા પણ આપવામાં આવશે. આનાથી લોકોને અદાલત કે ટ્રિબ્યુનલની ઓફિસે જવાની જરૂર ઓછી પડશે. વીડિયો કોન્ફરન્સ દ્વારા સુનાવણી થઈ શકશે, જેનાથી સમય અને પૈસા બંનેની બચત થશે.
સંપૂર્ણ જાણકારી એક જ જગ્યાએ
આ સિસ્ટમની સૌથી ખાસ વાત એ છે કે કેસની સંપૂર્ણ જાણકારી- દાવો દાખલ કરવાથી લઈને અંતિમ નિર્ણય સુધી, એક જ ઓનલાઇન પ્લેટફોર્મ પર જોઈ શકાશે. આનાથી પારદર્શિતા વધશે અને લોકોને પોતાના કેસની સ્થિતિ જાણવામાં સરળતા રહેશે.
એટલે કે આ નવી વ્યવસ્થાથી પડતર મામલાઓમાં ઘટાડો આવશે. ક્લેમનો નિકાલ ઝડપથી થશે અને સામાન્ય લોકોને જલ્દી ન્યાય મળી શકશે.
