India Indonesia BrahMos Deal: સંરક્ષણ ઉદ્યોગના ક્ષેત્રમાં ભારતને વધુ એક મોટી ઉપલબ્ધિ મળી છે. ફિલિપાઈન્સ બાદ હવે દુનિયાની સૌથી વધુ મુસ્લિમ વસ્તી ધરાવતા દેશ ઇન્ડોનેશિયાએ ભારત પાસેથી બ્રહ્મોસ સુપરસોનિક ક્રૂઝ મિસાઈલ સિસ્ટમ ખરીદવા માટે સમજૂતી કરી છે. ઇન્ડોનેશિયાના સંરક્ષણ મંત્રાલયના પ્રવક્તા રિકો રિકાર્ડો સિરૈતે સોમવારે આની પુષ્ટિ કરી છે. આ સમજૂતી સાથે ઇન્ડોનેશિયા, ફિલિપાઈન્સ પછી બ્રહ્મોસ ખરીદનારો દક્ષિણ-પૂર્વ એશિયાનો બીજો દેશ બની ગયો છે.
450 મિલિયન ડોલરની ડીલ
રિપોર્ટ મુજબ, બ્રહ્મોસ મિસાઈલને લઈને ભારત-ઇન્ડોનેશિયા વચ્ચે થયેલી આ ડીલની કિંમત 450 મિલિયન ડોલર એટલે કે 3,800 કરોડ રૂપિયા છે. ઇન્ડોનેશિયાએ જણાવ્યું કે આ સોદો તેના હથિયારોના આધુનિકીકરણ અને દરિયાકાંઠાની સુરક્ષા ક્ષમતાને મજબૂત કરવાની વ્યૂહરચનાનો ભાગ છે.
ઇન્ડોનેશિયાના સંરક્ષણ મંત્રાલયના પ્રવક્તાએ શું કહ્યું?
પ્રવક્તા રિકો રિકાર્ડો સિરૈતના જણાવ્યા અનુસાર, ઇન્ડોનેશિયાએ ભારત સાથે બ્રહ્મોસ મિસાઈલ સિસ્ટમની ખરીદીમાં ભાગીદારી કરી છે. આ અમારા શસ્ત્રોના આધુનિકીકરણ, ખાસ કરીને દરિયાકાંઠાના સંરક્ષણને મજબૂત કરવાના પ્રયાસોનો ભાગ છે.
રિકોના જણાવ્યા મુજબ, આ ખરીદી સંરક્ષણ ક્ષેત્રમાં જકાર્તા-નવી દિલ્હીની વ્યૂહાત્મક ભાગીદારીને વધુ મજબૂત બનાવે છે. આ નવી સિસ્ટમથી રાષ્ટ્રીય સાર્વભૌમત્વની રક્ષામાં અવરોધક ક્ષમતા (deterrence capacity) ને પણ પ્રોત્સાહન મળવાની અપેક્ષા છે.
અન્ય ઘણા દેશોએ પણ બ્રહ્મોસમાં રસ દાખવ્યો
રશિયાની મદદથી ‘મેક ઇન ઇન્ડિયા’ પહેલ હેઠળ વિકસિત બ્રહ્મોસ મિસાઈલ ખરીદવા માટે અન્ય ઘણા દેશોએ પણ રસ દાખવ્યો છે. રિપોર્ટ મુજબ, વિયેતનામ પણ 700 મિલિયન ડોલરની સંભવિત ડીલને અંતિમ સ્વરૂપ આપવાની ખૂબ નજીક છે. આ ઉપરાંત થાઈલેન્ડ, સાઉદી અરેબિયા, યુએઈ, ઓમાન, ઇજિપ્ત અને કેટલાક લેટિન અમેરિકન દેશો પણ ભારત સાથે બ્રહ્મોસ સોદાને લઈને વાતચીતના તબક્કામાં છે.
ભારતમાં બનેલી બ્રહ્મોસ મિસાઈલોએ ‘ઓપરેશન સિંદૂર’ ને અંજામ સુધી પહોંચાડ્યું હતું. પહેલગામ હુમલા બાદ બ્રહ્મોસ મિસાઈલે આતંકી ઠેકાણાઓને ધ્વસ્ત કરવાનું કામ કર્યું હતું. તે ઓપરેશનમાં ભારતીય સેનાએ ‘ઓપરેશન સિંદૂર’ માં બ્રહ્મોસ મિસાઈલ, આકાશ મિસાઈલ અને MRSAM (બરાક-8) નો ઉપયોગ કર્યો છે.
બ્રહ્મોસ મિસાઈલની ખાસિયત
બ્રહ્મોસ સુપરસોનિક ક્રૂઝ મિસાઈલ છે. તે 3,700 કિલોમીટર પ્રતિ કલાકની ઝડપે લક્ષ્યને ટાર્ગેટ કરી શકે છે. તેની રેન્જ અંદાજે 800 કિલોમીટર સુધીની છે. તે પોતાની સાથે 200 થી 300 કિલોગ્રામ સુધીના વોરહેડ લઈ જવામાં સક્ષમ છે. તેને જમીન, સમુદ્ર અને આકાશમાંથી લોન્ચ કરી શકાય છે. તે દુશ્મનના રડારથી બચવા માટે અત્યંત ઓછી ઊંચાઈ પર ઉડવા માટે સક્ષમ છે.
