Fake Currency Scam Gujarat: ગુજરાતમાં હાલમાં ૨ કરોડથી વધુની નકલી ચલણી નોટો પકડાવવાના કૌભાંડે સમગ્ર દેશમાં ચર્ચા જગાવી છે. આ મામલે અમદાવાદ ક્રાઈમ બ્રાન્ચે સુરતના કથિત યોગગુરુ પ્રદીપ જોટંગીયાની ધરપકડ કરી છે. તપાસમાં બહાર આવ્યું છે કે, આ વ્યક્તિ કોઈ મોટો યોગી કે ડોક્ટર નથી, પરંતુ માત્ર ૧૨ ધોરણ પાસ છે અને ભૂતકાળમાં રાજકોટમાં હેર સલૂન ચલાવતો હતો. સુરતમાં ‘શ્રી સત્યમ યોગ ફાઉન્ડેશન’ના નામે તે લોકોની શ્રદ્ધા સાથે ચેડાં કરી રહ્યો હતો. ધર્મ અને ભક્તિની આડમાં આચરવામાં આવતા આ કાળા કારોબારના ઘટસ્ફોટથી વહીવટી તંત્ર અને જનતામાં ભારે આશ્ચર્ય ફેલાયું છે.
હાર્દિક પટેલ અને પ્રદીપ વચ્ચેના જૂના સંબંધોની ચર્ચા
પ્રદીપ જોટંગીયાની ધરપકડ બાદ સોશિયલ મીડિયા પર અનેક જૂના ફોટા અને વીડિયો વાયરલ થઈ રહ્યા છે. આમાં સૌથી વધુ ચર્ચિત તસવીર પાટીદાર અનામત આંદોલન સમયની છે, જેમાં પ્રદીપ આંદોલનકારી હાર્દિક પટેલના માથે હાથ ફેરવતો અને આશીર્વાદ આપતો જોવા મળે છે. ટીકાકારો આ બંનેને સરખાવતા કહી રહ્યા છે કે એકે સમાજનો ઉપયોગ કરીને પોતાનો સ્વાર્થ સાધ્યો તો બીજાએ મશીનથી નકલી નોટો છાપી દેશ સાથે ગદ્દારી કરી. બંનેના રસ્તા ભલે અલગ હતા, પરંતુ ટૂંકા રસ્તે રાતોરાત પૈસાદાર બનવાના ઈરાદા સમાન હોવાનું ચર્ચાઈ રહ્યું છે.
ધર્મના નામે પાખંડ અને ગંભીર ગુનાહિત આરોપો
પ્રદીપ જોટંગીયા ભક્તોને આકર્ષવા માટે ભગવાન શ્રીકૃષ્ણનો વેશ ધારણ કરી મટકી ફોડવા જેવા નાટકો કરતો હોવાનું પોલીસ તપાસમાં ખૂલ્યું છે. તેના આશ્રમમાં મોડી રાત્રે યુવતીઓની અવરજવર હોવાના સ્થાનિકોના આક્ષેપો બાદ સુરક્ષા એજન્સીઓ વધુ સતર્ક બની છે. આ ઉપરાંત, સુરતના સામાજિક કાર્યકર વલ્લભભાઈ ચોથાણીએ આ કથિત ગુરુ સામે વાઘના ચામડાનો ગેરકાયદે ઉપયોગ, છેતરપિંડી અને ડિગ્રી વગર કેન્સર તથા હાર્ટ એટેકની જોખમી સારવાર કરવા જેવા ગંભીર આક્ષેપો કર્યા છે, જે તેની ગુનાહિત માનસિકતા તરફ આંગળી ચીંધે છે.
રાજકીય જોડાણો અને જાહેર જીવનમાં ક્ષોભજનક સ્થિતિ
પ્રદીપના પકડાયા બાદ પૂર્વ મુખ્યમંત્રી શંકરસિંહ વાઘેલાનો એક જૂનો વીડિયો પણ વાયરલ થયો છે, જેમાં તેઓ આ કથિત ગુરુની પ્રશંસા કરતા જોવા મળે છે. આવા વિવાદિત વ્યક્તિઓ જ્યારે મોટા રાજકીય નેતાઓ કે ધર્મગુરુઓ સાથે દેખાય છે, ત્યારે તેમની સામાજિક પ્રતિષ્ઠાનો ઉપયોગ તેઓ પોતાના કાળા કામોને છુપાવવા માટે કરે છે. હાલમાં પોલીસ આ મામલે ઊંડાણપૂર્વક તપાસ કરી રહી છે કે નકલી નોટો છાપવાના આ રેકેટમાં અન્ય કેટલા લોકો સામેલ છે. આ ઘટના સમાજ માટે એક લાલબત્તી સમાન છે કે ભક્તિના નામે થતા પાખંડથી સાવધ રહેવું જરૂરી છે.
