Delhi Winter Action Plan 2026: દિલ્હીનાં મુખ્યમંત્રી રેખા ગુપ્તાએ શિયાળા દરમિયાન રાજધાનીમાં પ્રદૂષણ ઘટાડવા માટે વિન્ટર ઍક્શન પ્લાનની જાહેરાત કરી છે. આ અંતર્ગત અનેક કડક નિયમો બનાવવામાં આવ્યા છે.
દિલ્હીમાં પ્રદૂષણ લાંબા સમયથી મોટી સમસ્યા રહ્યું છે. પ્રદૂષણ ઘટાડવા માટે સરકાર સતત પ્રયાસો કરી રહી છે અને નવી નીતિઓ બનાવી રહી છે. શિયાળાની ઋતુ શરૂ થવાની હોવાથી દિલ્હી સરકારે પ્રદૂષણ ઘટાડવા માટે અગાઉથી તૈયારીઓ કરી લીધી છે. આ નિયમોનો હેતુ દિલ્હીના વાતાવરણને સ્વચ્છ બનાવવાનો છે. આ નિયમો 1 નવેમ્બર 2026 થી 28 ફેબ્રુઆરી 2027 સુધી સમગ્ર દિલ્હી અને NCR માં લાગુ રહેશે.
દિલ્હી સરકારે નો PUC, નો ફ્યુઅલ નિયમ લાગુ કર્યો છે. માન્ય PUC પ્રમાણપત્ર વિના કોઈપણ વાહનને દિલ્હીના પેટ્રોલ પંપ પર પેટ્રોલ, ડીઝલ, CNG અથવા LPG મળશે નહીં. આ નિયમ દિલ્હીમાં નોંધાયેલાં તમામ વાહનો પર પણ લાગુ પડે છે. જો તમારા વાહનનું PUC પ્રમાણપત્ર સમાપ્ત થવાનું હોય, તો સમયસર નવું પ્રમાણપત્ર મેળવી લો.
1 નવેમ્બરથી 31 જાન્યુઆરી દરમિયાન દિલ્હી બહાર નોંધાયેલાં BS-6 કરતાં નીચા ઉત્સર્જન ધોરણવાળાં વાહનોના પ્રવેશ પર સંપૂર્ણ પ્રતિબંધ રહેશે. પ્રદૂષણ ઘટાડવા માટે આ પગલું લેવામાં આવી રહ્યું છે. જોકે, ઇલેક્ટ્રિક વાહનો, CNG વાહનો અને આવશ્યક સેવાઓમાં ઉપયોગમાં લેવાતાં વાહનોને આ નિયમમાંથી મુક્તિ આપવામાં આવશે.
રસ્તાઓ પર ટ્રાફિક અને વાહનોના ધુમાડાને ઘટાડવા માટે સરકારી અને ખાનગી ઑફિસોના સમયમાં ફેરફાર કરવામાં આવ્યો છે.
– અલગ-અલગ સમયપત્રક: દિલ્હી મ્યુનિસિપલ કૉર્પોરેશનની MCD ઑફિસો સવારે 8:30 થી સાંજે 5:00 વાગ્યા સુધી ચાલશે, જ્યારે દિલ્હી સરકારની ઑફિસો સવારે 10:00 થી સાંજે 6:30 વાગ્યા સુધી કાર્યરત રહેશે.
– વર્ક ફ્રોમ હોમ: તમામ સરકારી અને ખાનગી ઑફિસોમાં 50% કર્મચારીઓ માટે ઘરેથી કામ કરવું ફરજિયાત કરવામાં આવ્યું છે.
– પાર્કિંગ ફી બમણી: ખાનગી વાહનોનો ઉપયોગ ઘટાડવા માટે MCD ની પાર્કિંગ ફી બમણી કરવામાં આવી છે. જોકે, દિલ્હી મેટ્રોની પાર્કિંગ ફીમાં વધારો કરવામાં આવ્યો નથી.
– બાંધકામ પર પ્રતિબંધ: 10 ડિસેમ્બરથી 20 જાન્યુઆરી સુધી ધૂળ ફેલાવતાં તમામ પ્રકારનાં બાંધકામનાં કામો પર સંપૂર્ણ પ્રતિબંધ રહેશે. આ ઉપરાંત, બાંધકામ સામગ્રીની હેરફેર પર પણ પ્રતિબંધ મૂકવામાં આવ્યો છે.
– AI કૅમેરાથી દેખરેખ: ધૂળ ફેલાવતાં બાંધકામ અને તોડી પાડવાની કામગીરીનાં સ્થળો પર આર્ટિફિશિયલ ઇન્ટેલિજન્સ કૅમેરા દ્વારા દેખરેખ રાખવામાં આવશે.
