Driverless Electric Bus: ઇલેક્ટ્રિક અને ઑટોનોમસ વ્હીકલ્સ એટલે કે ડ્રાઇવર વિના ચાલતા વાહનો આજકાલ ઘણી ચર્ચામાં છે. તેમને ભવિષ્યમાં પરિવહનના માધ્યમ તરીકે જોવામાં આવી રહ્યા છે. ઘણી કંપનીઓએ પોતાના ડ્રાઇવરલેસ વ્હીકલ્સની સર્વિસ પણ શરૂ કરી છે. તુર્કીની ઓટોમેકર કંપની Karsanની ડ્રાઇવરલેસ ઑલ-ઇલેક્ટ્રિક મિનીબસ e-ATAK હવે નેધરલેન્ડ્સના પ્રસિદ્ધ Efteling Theme Parkમાં શરૂ થઈ ગઈ છે. Efteling Theme Park નેધરલેન્ડ્સનું ખૂબ જ લોકપ્રિય ફૅન્ટસી અને ફેરીટેલ્સ થીમ પાર્ક છે, જેને ડચનું ડિઝનીલેન્ડ પણ કહેવામાં આવે છે. આ પાર્ક 1952થી ચાલી રહ્યો છે અને અહીં દર વર્ષે લાખો પ્રવાસીઓ આવે છે.
6 કિલોમીટરનો રૂટ અને ફ્રી સફર
- રૂટ: ઇન્ટરેસ્ટિંગ એન્જિનિયરિંગના રિપોર્ટ અનુસાર આ ઑટોનોમસ ઇલેક્ટ્રિક બસ પાર્કના મુખ્ય પ્રવેશદ્વાર, વંડર હોટેલ એરિયા અને અન્ય પસંદગીના સ્ટોપ્સ વચ્ચે આશરે 6 કિલોમીટરના નિર્ધારિત માર્ગ પર ચાલશે.
- સુવિધાઓ: થીમ પાર્કમાં આવતા ગ્રાહકો માટે આ બસ સેવા સંપૂર્ણપણે ફ્રી છે. તેમાં વ્હીલચેરથી મુસાફરી કરનારા લોકો માટે વિશેષ ઍક્સેસ આપવામાં આવી છે.
- સંચાલન: આ સર્વિસનું સંચાલન Karsan અને Arriva કંપની મળીને કરશે.
SAE Level 4 ઑટોનોમીનો શું અર્થ છે?
- પોતાની રીતે ચાલતી બસ: આ ઇલેક્ટ્રિક બસમાં SAE Level 4 ઑટોનોમીનો ઉપયોગ કરવામાં આવ્યો છે. તેનો અર્થ એ છે કે આ બસ કોઈપણ હ્યુમન કંટ્રોલ વિના પોતાની રીતે ચાલી શકે છે, પરંતુ માત્ર અગાઉથી નક્કી કરાયેલા અને નિયંત્રિત માર્ગો પર.
- રસ્તા અને હવામાનની મર્યાદાઓ: આ બસ માત્ર નિર્ધારિત ટ્રાફિક, હવામાન અને સ્પીડ લિમિટની શરતોની અંદર જ ચાલશે.
- ટેક્નોલોજી: આ બસ Karsanની છે, જ્યારે તેની અંદર ઑટોમેટિક ડ્રાઇવિંગ સિસ્ટમ તુર્કીની જ ADASTEC કંપનીએ લગાવી છે.
નેધરલેન્ડ્સમાં Karsanનો બીજો મોટો પ્રોજેક્ટ
Karsanના CEO Utku Ayyarkınએ જણાવ્યું કે નેધરલેન્ડ્સના નોર્થ બ્રાબન્ટ વિસ્તારમાં જાહેર રસ્તાઓ પર ચાલનારી આ પ્રથમ ઑટોનોમસ બસ બની ગઈ છે. આ પહેલાં Karsanએ નેધરલેન્ડ્સના જ Rotterdam The Hague Airport પર પોતાની પ્રથમ ઑટોનોમસ બસ ચલાવી હતી.
પ્રવાસીઓ માટે શરૂ થઈ સર્વિસ
આ સર્વિસ 10 ઓગસ્ટે સત્તાવાર લોન્ચ થયા બાદ 12 ઓગસ્ટથી સામાન્ય લોકો માટે શરૂ થઈ ગઈ છે. દર વર્ષે લાખો લોકોની અવરજવર ધરાવતા થીમ પાર્કમાં આ ટ્રાયલ ઑટોનોમસ પબ્લિક ટ્રાન્સપોર્ટના ભવિષ્ય માટે એક મોટું પગલું માનવામાં આવે છે. Karsanના CEO અનુસાર આ પ્રોજેક્ટ સાબિત કરે છે કે ડ્રાઇવર વિના ચાલતી જાહેર બસો હવે માત્ર ભવિષ્યની કલ્પના નથી, પરંતુ સામાન્ય જીવનનો ભાગ બની રહી છે.
