Tata Motors Sales 2026: દેશી કાર કંપની ટાટા મોટર્સે કેલેન્ડર વર્ષ 2026 (CY2026)માં ઐતિહાસિક સિદ્ધિ મેળવી છે. કંપનીએ જાન્યુઆરીથી ઑક્ટોબર 2026ના માત્ર 10 મહિનામાં 6,49,477 પેસેન્જર વાહનોનું હોલસેલ વેચાણ નોંધાવ્યું છે. આ સાથે કંપનીએ પ્રથમ વખત એક કેલેન્ડર વર્ષમાં 6 લાખ વેચાણનો આંકડો પાર કર્યો છે. ટાટા મોટર્સે 2025ના પોતાના કુલ વેચાણના 5,73,007 યુનિટ્સના આંકડાને પણ સમય કરતાં વહેલો પાછળ છોડી દીધો છે. ગયા ઑક્ટોબર મહિનામાં કંપનીએ અત્યાર સુધીનું સૌથી વધુ માસિક હોલસેલ વેચાણ 73,894 યુનિટ્સ નોંધાવ્યું હતું. નવેમ્બર અને ડિસેમ્બરના અંદાજિત વેચાણને જોડવામાં આવે તો ટાટા મોટર્સ આ વર્ષના અંત સુધીમાં લગભગ 7,90,000 યુનિટ્સનો આંકડો સ્પર્શી શકે છે.
ટાટા મોટર્સે 2026ના પ્રથમ 10 મહિનામાં જ 6.49 લાખથી વધુ કારનું વેચાણ કરીને ભારતીય ઑટો બજારમાં પોતાની મજબૂત સ્થિતિ સાબિત કરી છે. કંપની આ મહિને જ 7 લાખ યુનિટ્સનો સીમાચિહ્ન પાર કરી શકે છે.
હકીકતમાં, આ વર્ષની શરૂઆતથી જ કંપનીનું પ્રદર્શન શાનદાર રહ્યું છે. જેમાં પ્રથમ ત્રિમાસિક ગાળો એટલે કે જાન્યુઆરીથી માર્ચ સૌથી શ્રેષ્ઠ ત્રિમાસિક ગાળો રહ્યો હતો. ઑક્ટોબરમાં 73,894 યુનિટ્સના રેકોર્ડ વેચાણ અને તહેવારોની મોસમને કારણે ચોથા ત્રિમાસિક ગાળા (Q4)માં 2 લાખથી વધુ યુનિટ્સનું વેચાણ થવાની આશા વ્યક્ત કરવામાં આવી રહી છે.
SUV પોર્ટફોલિયોનું પ્રભુત્વ: પંચ અને નેક્સોન સૌથી વધુ વેચાતી બની
ટાટા મોટર્સના આ વર્ષના કાર વેચાણના અહેવાલ પર નજર કરીએ તો, ટાટા પંચ જાન્યુઆરીથી સપ્ટેમ્બર 2026 દરમિયાન 1,82,269 યુનિટ્સના વેચાણ સાથે સૌથી લોકપ્રિય મોડેલ બની હતી. તેમાં વાર્ષિક 49 ટકાનો વધારો નોંધાયો હતો. કંપનીના કુલ પેસેન્જર વાહનોના વેચાણમાં પંચનો ફાળો 32 ટકા રહ્યો હતો.
ટાટા નેક્સોન 1,74,524 યુનિટ્સના વેચાણ સાથે બીજા સ્થાને રહી હતી. તેમાં વાર્ષિક 28 ટકાનો વધારો નોંધાયો હતો. જાન્યુઆરી 2026માં રજૂ કરાયેલી ટાટા સીએરાએ 62,574 યુનિટ્સનું વેચાણ કરીને 11 ટકા હિસ્સો મેળવ્યો હતો. બીજી તરફ, હેરિયર (+66%) અને સફારી (+17%)એ પણ મજબૂત વૃદ્ધિ નોંધાવી હતી. જ્યારે ટિયાગો, અલ્ટ્રોઝ અને ટિગોર (જેને સપ્ટેમ્બરમાં એરિસથી બદલવામાં આવી હતી)નો હિસ્સો ઘટીને 17 ટકા રહ્યો હતો.
EV સેગમેન્ટમાં 88 ટકાનો મોટો ઉછાળો
ઇલેક્ટ્રિક વાહનોના ક્ષેત્રમાં પોતાનું પ્રભુત્વ જાળવી રાખતાં ટાટા મોટર્સે જાન્યુઆરીથી ઑક્ટોબર 2026 દરમિયાન 1,24,792 ઇલેક્ટ્રિક કારનું વેચાણ કર્યું હતું. ગયા વર્ષની સમાન સમયગાળાની સરખામણીમાં આ 88 ટકા વધુ છે.
ટાટાના કુલ કાર વેચાણમાં EVનો ફાળો હવે 20 ટકા સુધી પહોંચી ગયો છે. નેક્સોન EV સૌથી વધુ વેચાતું મોડેલ રહ્યું છે, જ્યારે નવી ટિયાગો EV અને પંચ EVની માંગમાં પણ ઝડપથી વધારો થયો છે.
બેટરી-એજ-એ-સર્વિસ (BaaS)નો મળી રહ્યો છે લાભ
તમને જણાવી દઈએ કે ટાટા મોટર્સે પોતાના EV પોર્ટફોલિયોની માંગને વધુ પ્રોત્સાહન આપવા માટે બેટરી-એજ-એ-સર્વિસ (BaaS) વિકલ્પનો વિસ્તાર નેક્સોન EV, કર્વ EV, સીએરા EV અને હેરિયર EV સુધી કર્યો છે. આ પહેલ ગ્રાહકો માટે શરૂઆતની ખરીદીનો ખર્ચ ઘટાડીને માંગ વધારવામાં મદદ કરી રહી છે.
મજબૂત પ્રોડક્ટ લાઇનઅપ, નવી સીએરા અને એરિસને મળેલા સારા પ્રતિસાદ તથા તહેવારોની મોસમમાં વધેલી માંગને કારણે ટાટા મોટર્સ આ કેલેન્ડર વર્ષના અંત સુધીમાં 7.9 લાખ યુનિટ્સના રેકોર્ડ આંકડાની નજીક પહોંચી શકે છે.
