Credit Card Over Limit Facility: ઈમરજન્સીમાં કામ આવે છે ક્રેડિટ કાર્ડ ઓવરલિમિટ: જાણો તેના ફાયદા અને છુપાયેલા ચાર્જિસ વિશે
Credit Card Over Limit Facility: આજના સમયમાં ક્રેડિટ કાર્ડ માત્ર ચૂકવણીનું એક માધ્યમ નથી રહ્યા, પરંતુ તે લોકોની રોજિંદી નાણાકીય જરૂરિયાતોનો મહત્વનો હિસ્સો બની ચૂક્યા છે. ઓનલાઈન શોપિંગથી લઈને મુસાફરી અને મેડિકલ ખર્ચ સુધી, ક્રેડિટ કાર્ડ ઘણી વસ્તુઓમાં ઉપયોગમાં લેવાવા લાગ્યું છે. જોકે, દરેક ક્રેડિટ કાર્ડ સાથે એક નક્કી ક્રેડિટ લિમિટ હોય છે પરંતુ ઘણીવાર અચાનક આવતા ખર્ચ, જેમ કે મેડિકલ ઈમરજન્સી, જરૂરી મુસાફરી કે ઘરની તાત્કાલિક મરામત, આ મર્યાદાથી વધુ રકમની માંગ કરી શકે છે. આવા સમયે ક્રેડિટ કાર્ડ ઓવરલિમિટ સુવિધા કામ આવે છે.
હવે ઘણા લોકોના મનમાં સવાલ આવે છે કે ક્રેડિટ કાર્ડ ઓવરલિમિટ સુવિધા શું હોય છે અને તે કઈ રીતે કામ કરે છે અને શું તેને લેવી ફાયદાકારક હોય છે? આજે અમે તમને આના વિશે જ જણાવવાના છીએ. આવો જાણીએ વિગતો.
શું છે ક્રેડિટ કાર્ડ ઓવરલિમિટ સુવિધા?
ક્રેડિટ કાર્ડ ઓવરલિમિટ સુવિધા કાર્ડધારકને તેની ક્રેડિટ લિમિટથી વધુ ખર્ચ કરવાની પરવાનગી આપે છે. આ સુવિધા કાયમી રૂપે તમારી ક્રેડિટ લિમિટ નથી વધારતી, પરંતુ જરૂર પડ્યે મર્યાદિત સમય માટે વધારાના ખર્ચની પરવાનગી આપે છે. સામાન્ય રીતે આ સુવિધાનો લાભ લેવા માટે બેંક અથવા કાર્ડ ઇશ્યૂઅરની મંજૂરી અને ગ્રાહકની સહમતી આવશ્યક હોય છે.
ક્રેડિટ કાર્ડ ઓવરલિમિટ સુવિધા ખાસ કરીને એવી પરિસ્થિતિઓમાં મદદગાર સાબિત થઈ શકે છે, જ્યાં તરત પૈસાની જરૂર હોય અને બીજા વિકલ્પો ઉપલબ્ધ ન હોય. જેમ કે મેડિકલ ઈમરજન્સી, જરૂરી મુસાફરી અથવા કોઈ દુર્ઘટના વગેરે.
ક્રેડિટ કાર્ડ ઓવરલિમિટ સુવિધા કેટલી ફાયદાકારક?
ક્રેડિટ કાર્ડ ઓવરલિમિટ સુવિધા હેઠળ તમને નિર્ધારિત ક્રેડિટ લિમિટથી વધુ રકમ ખર્ચવાની સુવિધા મળે છે. આ માટે બેંક ગ્રાહકની મંજૂરી જરૂર લે છે. જોકે, આ ઓવરલિમિટ રકમ પર અલગ ચાર્જ, ટેક્સ અને વ્યાજ લાગી શકે છે. તેમજ જ્યાં સુધી વધારાના ખર્ચ કરવામાં આવેલી રકમની ચૂકવણી નથી કરવામાં આવતી, ત્યાં સુધી આ સુવિધા અસરકારક રહે છે.
ક્રેડિટ લિમિટથી વધુ ખર્ચ કરવા પર તમારો ક્રેડિટ યુટિલાઈઝેશન રેશિયો વધી શકે છે, જેનાથી ક્રેડિટ સ્કોર પ્રભાવિત થઈ શકે છે. તેમજ ભારતના મોટાભાગના મુખ્ય બેંકો ઓવરલિમિટ રકમ પર લગભગ ૨.૫% થી ૩% સુધી ચાર્જ વસૂલે છે. ઘણા કિસ્સાઓમાં ન્યૂનતમ ચાર્જ ૫૦૦ થી ૬૦૦ રૂપિયા સુધી હોઈ શકે છે. આ સિવાય આ ચાર્જ પર ૧૮% જીએસટી (GST) પણ લાગુ થાય છે.
આવામાં જો તમે ક્રેડિટ કાર્ડ ઓવરલિમિટ સુવિધા લેવા વિશે વિચારી રહ્યા છો તો પહેલા તમામ ચાર્જ, વ્યાજ, ટેક્સ વિશે જરૂર જાણી લો અને તમારા બજેટ મુજબ જ આ સુવિધા લો. જો વધારાના ખર્ચ કરવામાં આવેલી રકમને જલ્દી ચૂકવવાની ક્ષમતા નથી, તો આ સુવિધાથી બચવું વધુ સારું હોઈ શકે છે.
