Gopichand Hinduja death: હિંદુજા ગ્રુપના ચેરમેન અને ભારતીય મૂળના બ્રિટિશ અબજોપતિ ગોપીચંદ હિંદુજાનું 85 વર્ષની વયે નિધન થયું છે. લંડનના એક હોસ્પિટલમાં તેમણે અંતિમ શ્વાસ લીધા. તેઓ છેલ્લા કેટલાક અઠવાડિયાઓથી બીમાર હતા. બિઝનેસ વર્તુળોમાં તેઓ ‘જીપી’ નામથી જાણીતા હતા. આ દુઃખદ સમાચાર બ્રિટિશ હાઉસ ઓફ લોર્ડ્સના સભ્ય રામી રેન્જરે આપ્યા. રેન્જરે ભાવુક શ્રદ્ધાંજલિ આપતા જણાવ્યું કે જીપી હિંદુજા અત્યંત દયાળુ, વિનમ્ર અને વફાદાર મિત્ર હતા. તેમના નિધનથી એક યુગનો અંત આવ્યો છે.
ગોપીચંદ હિંદુજા હિંદુજા ગ્રુપના મુખ્ય હતા — જે એક વૈશ્વિક વ્યાપારી સામ્રાજ્ય છે. આ ગ્રુપ ઓટોમોબાઈલ, બેન્કિંગ, કેમિકલ્સ, એનર્જી, મીડિયા અને રિયલ એસ્ટેટ જેવા અનેક ક્ષેત્રોમાં કાર્યરત છે. હિંદુજા ગ્રુપનો ભારત તથા વિશ્વભરમાં મજબૂત પ્રભાવ રહ્યો છે. ગોપીચંદ હિંદુજાના નેતૃત્વ હેઠળ ગ્રુપ નવી ઊંચાઈએ પહોંચ્યું હતું. તેમના નિધનથી વેપાર જગતમાં મોટી ખોટ પડી છે.
હિંદુજા પરિવારની અપરંપાર સંપત્તિ
ગોપીચંદ હિંદુજા મે 2023માં તેમના મોટા ભાઈ શ્રીચંદ હિંદુજાના અવસાન પછી ગ્રુપના ચેરમેન બન્યા હતા. તેઓ બ્રિટનના સૌથી ધનિક વ્યક્તિઓમાં ગણાતા હતા. તાજેતરમાં જ હિંદુજા પરિવાર બ્રિટનની સન્ડે ટાઈમ્સ રિચ લિસ્ટમાં પ્રથમ સ્થાને રહ્યા હતા. 18 મે, 2025ના રોજ જાહેર થયેલી યાદી અનુસાર, તેમના પરિવારની કુલ સંપત્તિ ₹33,67,948 કરોડ હતી, જે બીજા ક્રમે આવેલા ડેવિડ અને સાઈમન રીબેન પરિવાર કરતાં ₹8,042 કરોડ વધુ હતી. ફોર્બ્સના રિયલ-ટાઈમ આંકડા મુજબ, મંગળવાર સુધી હિંદુજા પરિવારની કુલ સંપત્તિ 20.6 અબજ ડોલર (રૂ. 1,82,668 કરોડ) હતી.
વિશ્વવ્યાપી વ્યાપારિક સામ્રાજ્ય
હિંદુજા પરિવાર લંડનમાં અનેક મૂલ્યવાન રિયલ એસ્ટેટ સંપત્તિઓનો માલિક છે. તેમાં વ્હાઇટહોલની ઐતિહાસિક ઓલ્ડ વોર ઑફિસ બિલ્ડિંગમાં આવેલું રૅફલ્સ લંડન હોટેલ પણ શામેલ છે. ગોપીચંદ હિંદુજાએ 1959માં મુંબઈના જયહિંદ કોલેજમાંથી ગ્રેજ્યુએશન કર્યું હતું. તેમને યુનિવર્સિટી ઑફ વેસ્ટમિનસ્ટર તરફથી માનદ કાયદાનો ડોક્ટરેટ અને રિચમન્ડ કોલેજ, લંડન તરફથી અર્થશાસ્ત્રમાં માનદ ડોક્ટરેટ મળ્યું હતું.
પરિવારના સભ્યો જુદા જુદા દેશોમાંથી તેમના વ્યવસાય સંભાળે છે — ગોપીચંદ લંડનમાં રહેતા હતા, તેમના ભાઈ પ્રકાશ મોનાકોમાં છે, જ્યારે સૌથી નાના ભાઈ અશોક મુંબઈમાંથી ભારતના હિતોનું સંચાલન કરે છે. ગોપીચંદના નેતૃત્વ હેઠળ ગ્રુપે 1984માં ગલ્ફ ઑઇલનું અધિગ્રહણ કર્યું અને ત્રણ વર્ષ પછી અશોક લેલેન્ડ કંપની પર કબજો મેળવ્યો — જે ભારતના ઇતિહાસમાં કોઈ એનઆરઆઇ દ્વારા કરવામાં આવેલું પ્રથમ મોટું રોકાણ હતું.
