Gujarat semiconductor Hub: ગુજરાત દેશની સેમિકન્ડક્ટર ઉદ્યોગ માટે પસંદગીનું સ્થળ બની રહ્યું છે, જેમાં રાજ્ય સરકારે હજારો કરોડના રોકાણને આકર્ષિત કરતા અનેક એમઓયુ પર હસ્તાક્ષર કર્યા છે. યુએસ ઇલેક્ટ્રોનિક્સ મેન્યુફેક્ચરિંગ કંપની જબિલ ઇન્ડિયાએ ગુજરાત સરકાર સાથે 1,000 કરોડ રૂપિયાના રોકાણ પર સિલિકોન ફોટોનિક્સ મેન્યુફેક્ચરિંગ પ્લાન્ટ સ્થાપવા માટે એમઓયુ પર હસ્તાક્ષર કર્યા છે.
રાજ્ય સરકારના એક વરિષ્ઠ અધિકારીએ જણાવ્યું હતું કે, બુધવારે ગુજરાતની રાજધાનીમાં આયોજિત સેમિકન્ડક્ટર કોન્ફરન્સના પહેલા દિવસે, લગભગ 15,000 કરોડ રૂપિયાના સંભવિત રોકાણ સાથેના કરારો પર હસ્તાક્ષર કરવામાં આવ્યા હતા, જેમાં વિદેશી કંપનીઓના પ્રસ્તાવોનો પણ સમાવેશ થાય છે. આ કરારોમાંથી, એકલા નેક્સ્ટજેને 10,000 કરોડ રૂપિયાના રોકાણ સાથે પ્લાન્ટ સ્થાપવાની પ્રતિબદ્ધતા વ્યક્ત કરી છે.
નેક્સ્ટજેને ગુજરાત સરકાર સાથે કમ્પાઉન્ડ સેમિકન્ડક્ટર ફેબ્રિકેશન અને ઓપ્ટો-ઇલેક્ટ્રોનિક્સ પ્લાન્ટ સ્થાપવા માટે કરાર પર હસ્તાક્ષર કર્યા. ગુજરાત સરકારના વિજ્ઞાન અને ટેકનોલોજી વિભાગના મુખ્ય સચિવ મોના ખંધારે જણાવ્યું હતું કે, “કોન્ફરન્સના પહેલા દિવસે, રાજ્ય સરકાર સહિત વિવિધ હિસ્સેદારો વચ્ચે વિવિધ સમજૂતી કરાર (MoU) પર હસ્તાક્ષર કરવામાં આવ્યા હતા, જે સેમિકન્ડક્ટર ક્ષેત્રમાં રૂ. 15,000 કરોડના સંભવિત રોકાણનો સંકેત આપે છે.”
ખંધારે ઉદ્ઘાટન સમારોહમાં જણાવ્યું હતું કે, યુએસ ઇલેક્ટ્રોનિક્સ મેન્યુફેક્ચરિંગ કંપની જબિલ ઇન્ડિયાએ ગુજરાત સરકાર સાથે રૂ. 1,000 કરોડના રોકાણ પર સિલિકોન ફોટોનિક્સ મેન્યુફેક્ચરિંગ પ્લાન્ટ સ્થાપવા માટે એમઓયુ પર હસ્તાક્ષર કર્યા છે.
ત્રણ દિવસીય ‘ગુજરાત સેમીકનેક્ટ કોન્ફરન્સ’ બુધવારે ગાંધીનગરના મહાત્મા મંદિર કન્વેન્શન અને એક્ઝિબિશન સેન્ટર ખાતે શરૂ થઈ હતી. સરકારી પ્રકાશન મુજબ, સેમિકન્ડક્ટરના ક્ષેત્રમાં કૌશલ્ય વૃદ્ધિ માટે ટાટા ઇલેક્ટ્રોનિક્સ અને ઇન્ડિયન ઇન્સ્ટિટ્યૂટ ઓફ ટેકનોલોજી (IIT), ગાંધીનગર વચ્ચે એક સમજૂતી કરાર પર હસ્તાક્ષર કરવામાં આવ્યા હતા.
અમદાવાદ જિલ્લાના ધોલેરા શહેરમાં ભારતીય કંપનીના આગામી સેમિકન્ડક્ટર ચિપ ઉત્પાદન એકમ માટે ટાટા ઇલેક્ટ્રોનિક્સ અને તાઇવાની કંપનીઓ PSMC અને Himax ટેક્નોલોજીસ વચ્ચે ત્રિપક્ષીય કરાર પર હસ્તાક્ષર કરવામાં આવ્યા હતા. નિવેદન અનુસાર, ગુજરાતમાં 500 કરોડ રૂપિયાના રોકાણ સાથે એક નવું ઇલેક્ટ્રોનિક્સ મેન્યુફેક્ચરિંગ સર્વિસ (EMS) યુનિટ સ્થાપવા માટે તાઇવાન સરફેસ માઉન્ટિંગ ટેકનોલોજી (TSMT) સાથે બીજો કરાર કરવામાં આવ્યો હતો.
આ રોકાણથી લગભગ 1,000 નવી નોકરીઓનું સર્જન થશે. ઉદ્ઘાટન સમારોહ દરમિયાન, કેયન્સ ટેકનોલોજીએ અમદાવાદ જિલ્લાના ઔદ્યોગિક કેન્દ્ર સાણંદ ખાતે તેના નવા OSAT યુનિટનો ભૂમિપૂજન સમારોહ કર્યો. પ્લાન્ટની મુખ્ય ઉત્પાદન લાઇન જાન્યુઆરી, 2026 થી ઉત્પાદન શરૂ કરશે.
