Mutual Funds in NSE-listed companies: માર્ચ ક્વાર્ટર ૨૦૨૫માં, નેશનલ સ્ટોક એક્સચેન્જ પર લિસ્ટેડ કંપનીઓમાં સ્થાનિક મ્યુચ્યુઅલ ફંડ્સનો હિસ્સો વધીને રેકોર્ડ ૧૦.૪% થયો છે. આ સતત ૭મું ક્વાર્ટર છે જ્યારે આ હિસ્સો વધ્યો છે. આ ક્વાર્ટરમાં તેમાં ૪૨ બેસિસ પોઈન્ટનો વધારો થયો છે.
સમગ્ર નાણાકીય વર્ષ દરમિયાન, સ્થાનિક મ્યુચ્યુઅલ ફંડ્સના હિસ્સામાં ૧.૪% પોઈન્ટનો વધારો થયો છે. ખાસ વાત એ છે કે પહેલીવાર સ્થાનિક મ્યુચ્યુઅલ ફંડ્સનો હિસ્સો બે આંકડામાં પહોંચ્યો છે અને તે વ્યક્તિગત રોકાણકારોના હિસ્સાને પણ વટાવી ગયો છે.
NSEના માર્કેટ પ્લસ રિપોર્ટ મુજબ મૂલ્યની દ્રષ્ટિએ, માર્ચ ૨૦૨૫ સુધીમાં સ્થાનિક મ્યુચ્યુઅલ ફંડ્સનું હોલ્ડિંગ રૂ. ૪૨.૪ લાખ કરોડ હતું. આ અગાઉના ક્વાર્ટર કરતા માત્ર ૨.૪% ઓછું હતું, જ્યારે કુલ બજાર મૂડીકરણ (એમકેપ)માં ઘટાડો વધુ હતો. આ દર્શાવે છે કે ઇક્વિટીમાં ચોખ્ખું રોકાણ સતત રહ્યું છે. સ્થાનિક મ્યુચ્યુઅલ ફંડ્સે ચોથા ક્વાર્ટરમાં ઇક્વિટી બજારમાં રૂ. ૧.૯ લાખ કરોડનું રોકાણ કર્યું હતું, જેનાથી સમગ્ર નાણાકીય વર્ષ ૨૦૨૪-૨૫માં કુલ ચોખ્ખું રોકાણ રૂ. ૬.૧ લાખ કરોડ થયું હતું. જે અત્યાર સુધીના કોઈપણ નાણાકીય વર્ષમાં સૌથી વધુ છે.
અહેવાલમાં જણાવાયું છે કે સિપ (સિસ્ટમેટિક ઇન્વેસ્ટમેન્ટ પ્લાન) દ્વારા રિટેલ રોકાણકારોની સતત ભાગીદારી આ મજબૂત રોકાણ પ્રવાહ પાછળનું મુખ્ય કારણ હતું. નાણાકીય વર્ષ ૨૦૨૫ માં સરેરાશ માસિક સિપ ઇનફ્લો વાર્ષિક ધોરણે ૪૫.૨% વધીને રૂ. ૨૪,૧૧૨ કરોડ થયો હતો.
નાણાકીય વર્ષ ૨૦૨૧ સિવાય, છેલ્લા આઠ વર્ષમાં (નાણાકીય વર્ષ ૨૦૧૫-નાણાકીય વર્ષ ૨૦૨૫) સ્થાનિક મ્યુચ્યુઅલ ફંડનો હિસ્સો તીવ્ર વધારો જોવા મળ્યો છે. જે ઇક્વિટી મ્યુચ્યુઅલ ફંડમાં રિટેલ રોકાણકારોના વધતા રસને પ્રતિબિંબિત કરે છે.સ્થાનિક મ્યુચ્યુઅલ ફંડ્સ એનએસઈ પર લિસ્ટેડ કંપનીઓના કુલ માર્કેટ કેપમાં ૧૦.૪% હિસ્સો ધરાવે છે.
માર્ચ ૨૦૨૫ ક્વાર્ટરમાં, એનએસઈ પર સૂચિબદ્ધ કંપનીઓમાં વ્યક્તિગત રોકાણકારોની નોન-પ્રમોટર માલિકી ઘટીને ૯.૫% થઈ ગઈ, જે સાત ક્વાર્ટરમાં સૌથી નીચું સ્તર છે. જે રોકાણકારો તરફથી ઓછું રોકાણ દર્શાવે છે. વ્યક્તિગત રોકાણકારોએ માર્ચમાં રોકડ બજારમાંથી લગભગ રૂ. ૧૫,૩૦૦ કરોડનો ચોખ્ખો ઉપાડ કર્યો હતો, જે અત્યાર સુધીનો સૌથી મોટો માસિક ઉપાડ છે. નિફ્ટી ૫૦ કંપનીઓમાં તેમનો હિસ્સો ૭.૯% પર સ્થિર રહ્યો હતો, પરંતુ નિફ્ટી ૫૦૦માં તે ઘટીને ૮.૬% થયો છે, જે નવ ક્વાર્ટરમાં સૌથી ઓછો છે. જે મિડ-કેપ અને સ્મોલ-કેપ કંપનીઓમાં નબળાઈને કારણે છે.