સેલરી મોડેથી આવે કે ખાતામાં પૂરતા પૈસા ન હોય તો RDની એક અથવા અનેક કિસ્ત ચૂકી શકે છે, જાણો રોકાણ પર શું અસર પડે છે
RD Investment: પોતાના પૈસાનું રોકાણ કરવા માટે મોટાભાગના લોકો સુરક્ષિત વિકલ્પ પસંદ કરે છે. આ માટે ઘણા લોકો બેંક FDમાં પૈસાનું રોકાણ કરે છે. બેંક FDની સાથે લોકો રિકરિંગ ડિપોઝિટ એટલે કે RDમાં પણ રોકાણ કરે છે. રિકરિંગ ડિપોઝિટમાં રોકાણકારે દર મહિને એક નિશ્ચિત રકમનું રોકાણ કરવું પડે છે. રિકરિંગ ડિપોઝિટમાં એક નિશ્ચિત વ્યાજ દરથી જ વળતર મળે છે.
RDમાં રોકાણ કરનારા લોકોના મનમાં ઘણી વખત સવાલ આવે છે કે જો સેલરી મોડેથી આવવા, ખાતામાં પૂરતા પૈસા ન હોવા અથવા કોઈ અન્ય કારણસર RDનો હપ્તો સમયસર જમા થઈ શકતો નથી, તો તેનાથી રોકાણ પર શું અસર પડશે? શું એક હપ્તો ચૂકી જતાં જ RD અકાઉન્ટ બંધ થઈ જાય છે? આવો જાણીએ વિગતો.
RDનો એક હપ્તો ચૂકી જવાથી શું થાય છે?
જો કોઈ વ્યક્તિનો RDનો એક હપ્તો ચૂકી જાય છે તો બેંક RD અકાઉન્ટ તરત બંધ કરતી નથી. જોકે, મોડું થવા પર દંડ ભરવો પડી શકે છે. આ ઉપરાંત સમસ્યા ત્યારે વધી જાય છે જ્યારે ઘણા મહિનાઓ સુધી સતત હપ્તો જમા કરવામાં આવતો નથી. જોકે, દંડની રકમ અને તેને વસૂલવાની રીત અલગ-અલગ બેંકોમાં અલગ હોઈ શકે છે.
એક RDનો હપ્તો ચૂકી ગયા બાદ બેંક ગ્રાહકને બાકી રકમ જમા કરીને RDને ફરી નિયમિત કરવાની તક આપે છે. ઘણા કિસ્સાઓમાં ગ્રાહકોને સતત પાંચ અથવા છ મહિના સુધી ચૂકી ગયેલા હપ્તા જમા કરવાની તક મળી શકે છે. આ દરમિયાન ગ્રાહકે બાકી હપ્તાઓની સાથે લાગુ પડતો દંડ પણ ભરવો પડે છે પરંતુ આ સમય દરેક બેંક અને RD યોજના માટે એકસરખો હોતો નથી.
જો ગ્રાહક લાંબા સમય સુધી હપ્તો ભરતો નથી તો બેંક RD અકાઉન્ટને અનિયમિત માની શકે છે. સતત છ મહિના સુધી હપ્તો નહીં ભરવાની સ્થિતિમાં RDને અનિયમિત કરીને સમય પહેલાં બંધ કરી શકાય છે. આવી સ્થિતિમાં આગળના માસિક હપ્તા જમા કરવાની સુવિધા પણ સમાપ્ત થઈ શકે છે. કેટલાક કિસ્સાઓમાં બેંક બાકી રહેલી રકમ ગ્રાહકના જોડાયેલા બચત ખાતામાં મોકલી શકે છે. આ સંપૂર્ણપણે બેંકના નિયમો પર આધાર રાખે છે.
આવી સ્થિતિમાં સ્પષ્ટ છે કે જો કેટલાક મહિનાના હપ્તા ચૂકી જાય છે તો તેને ચુકવણી સાથે ફરી રોકાણ કરી શકાય છે. જ્યારે વધુ લાંબા સમય સુધી હપ્તો ચૂકી જવાથી બેંક RD અકાઉન્ટ બંધ કરી શકે છે.
