Software Engineer Salary: IT કંપનીઓના શેરમાં તાજેતરમાં નોંધપાત્ર તેજી જોવા મળી છે. ભારત સોફ્ટવેર, IT સેવાઓ અને ડિજિટલ કન્સલ્ટિંગ ઉદ્યોગમાં વૈશ્વિક સ્તરે મોટું કેન્દ્ર છે. સાથે જ, વિશ્વની ઘણી ટેક કંપનીઓ પણ ભારતમાં કાર્યરત છે. RBIના જણાવ્યા અનુસાર, 2025-26માં ભારતની સોફ્ટવેર સેવાઓની નિકાસ વાર્ષિક ધોરણે 8.2% વધીને 221.4 અબજ ડૉલર થઈ હતી. દેશની કુલ સોફ્ટવેર નિકાસમાં અમેરિકાનો હિસ્સો 50%થી વધુ છે. ભારતમાં સોફ્ટવેર એન્જિનિયરોનો પગાર સામાન્ય લોકોની આવકની સરખામણીમાં ઘણો વધારે છે.
એક અંદાજ અનુસાર, ભારતમાં 43 લાખથી 58 લાખ સુધી સોફ્ટવેર એન્જિનિયરો છે, જે વૈશ્વિક કાર્યબળના આશરે 14.7% છે. વર્લ્ડ બેંકના જણાવ્યા અનુસાર, ભારતમાં સોફ્ટવેર એન્જિનિયરની કમાણી 13 લોકોની સરેરાશ આવક જેટલી છે. આ આંકડો 2024-2026 દરમિયાન સોફ્ટવેર એન્જિનિયરોના સરેરાશ પગાર અને 2024ની વ્યક્તિદીઠ કુલ રાષ્ટ્રીય આવક પર આધારિત છે.
પગાર કેટલો છે?
ભારતમાં સોફ્ટવેર એન્જિનિયરોનો સરેરાશ પગાર કંપની, હોદ્દા અને કામના સ્થળ પર આધાર રાખે છે. ઉદાહરણ તરીકે, નવા કર્મચારીઓનું વાર્ષિક પેકેજ ₹3.5 લાખથી ₹8.0 લાખ, મધ્યમ સ્તરે ₹12 લાખથી ₹25 લાખ અને વરિષ્ઠ એન્જિનિયરના સ્તરે ₹15.0 લાખથી ₹60 લાખ સુધી હોય છે. જોકે, ઘણી વૈશ્વિક કંપનીઓ આના કરતાં ઘણો વધારે પગાર આપે છે. રાષ્ટ્રીય આંકડા અનુસાર, ભારતમાં વર્તમાન ભાવે સરેરાશ વાર્ષિક વ્યક્તિદીઠ ચોખ્ખી રાષ્ટ્રીય આવક ₹2,08,090 છે. માસિક ધોરણે આ રકમ આશરે ₹17,340 થાય છે.
યુક્રેનમાં સોફ્ટવેર એન્જિનિયરોનો પગાર વ્યક્તિદીઠ સરેરાશ આવક કરતાં 9.6 ગણો છે. પાકિસ્તાનમાં આ પ્રમાણ 8.8 ગણું, ચીનમાં 6.2 ગણું, ઇજિપ્તમાં 4.1 ગણું, મેક્સિકોમાં 3.6 ગણું, બ્રાઝિલમાં 3.4 ગણું, પોલેન્ડમાં 2.5 ગણું, અમેરિકામાં 2.3 ગણું, UKમાં 2.2 ગણું, કેનેડામાં 1.9 ગણું, જાપાનમાં 1.7 ગણું, જર્મનીમાં 1.6 ગણું અને ફ્રાન્સમાં 1.4 ગણું છે.
