Canada Immigration Rules: કેનેડામાં ઘણા લોકો સોશિયલ મીડિયા દ્વારા ઇમિગ્રેશન સંબંધિત સલાહ આપે છે. આવું કરનારા લોકોમાં ભારતીય વર્કર્સ અને સ્ટુડન્ટ્સ પણ સામેલ છે. હવે આ તમામ લોકો માટે એક મહત્વપૂર્ણ સમાચાર છે. કેનેડાએ પરવાનગી વિના ઇમિગ્રેશન અને નાગરિકતા સંબંધિત સલાહ આપવાના નિયમોના ઉલ્લંઘન બદલ 1.5 મિલિયન કેનેડિયન ડોલર (લગભગ 10 કરોડ રૂપિયા) સુધીના દંડની જોગવાઈ રજૂ કરી છે. આ દંડમાં ખોટી રજૂઆત અને જાણીજોઈને ખોટી અથવા ગેરમાર્ગે દોરતી માહિતી રજૂ કરવાનો પણ સમાવેશ થાય છે.
ફ્રેગોમેનના અહેવાલ અનુસાર, નવા નિયમો અમલમાં આવી ગયા છે. નવા નિયમો પેમેન્ટ અથવા ફી લઈને ઇમિગ્રેશન કે નાગરિકતા સંબંધિત સર્વિસ આપતા અધિકૃત અને બિનઅધિકૃત બંને પ્રકારના લોકો પર લાગુ પડે છે. આ દંડના દાયરામાં એવા લોકોનો પણ સમાવેશ થશે, જેઓ કેનેડાની બહાર રહીને કામ કરે છે. ‘ઇમિગ્રેશન, રેફ્યુજીસ એન્ડ સિટિઝનશિપ કેનેડા’ (IRCC) પોતાની વેબસાઇટ પર એક જાહેર રજિસ્ટ્રી પણ બહાર પાડવાનું છે. તેમાં દંડ ભરનારા લોકોનાં નામ અને તેમની વિગતો પણ પ્રકાશિત કરવામાં આવશે.
નવો નિયમ શું કહે છે?
– નવા ફ્રેમવર્ક હેઠળ, અધિકૃત પરવાનગી વિના ફી લઈને ઇમિગ્રેશન અથવા નાગરિકતા સંબંધિત સલાહ આપતા અથવા કોઈનું પ્રતિનિધિત્વ કરતા લોકો પર 5000 કેનેડિયન ડોલરનો દંડ લગાવી શકાય છે.
– જે લોકો કોઈ અરજદાર વતી જાણીજોઈને ખોટી અથવા ગેરમાર્ગે દોરતી માહિતી આપે છે અથવા અરજદારને આવી માહિતી રજૂ કરવામાં મદદ કરે છે, તેમને 15,000 કેનેડિયન ડોલરના દંડનો સામનો કરવો પડી શકે છે.
– જો ખોટી અથવા ગેરમાર્ગે દોરતી માહિતીના આધારે કોઈ ઇમિગ્રેશન એપ્લિકેશન મંજૂર કરવામાં આવે છે, તો વધારાનો દંડ પણ લાગી શકે છે. દંડની રકમ ઉલ્લંઘનની ગંભીરતા અને કેટલી વખત નિયમોનું ઉલ્લંઘન કરવામાં આવ્યું છે તેના પર નિર્ભર રહેશે. તમામ ઉલ્લંઘનોને જોડીને દંડની મહત્તમ રકમ 1.5 મિલિયન કેનેડિયન ડોલર (લગભગ 10 કરોડ રૂપિયા) સુધી પહોંચી શકે છે.
– આ નિયમો હેઠળ લાઇસન્સ ધરાવતા ઇમિગ્રેશન કન્સલ્ટન્ટ્સ, વકીલો અને અન્ય અધિકૃત પ્રતિનિધિઓ સહિત ફી લઈને સર્વિસ આપતા તમામ લોકોનો સમાવેશ થાય છે.
– નિયમોના દાયરામાં એવા લોકોનો પણ સમાવેશ થાય છે, જેઓ જરૂરી પરવાનગી વિના ઇમિગ્રેશન સંબંધિત સર્વિસ આપી રહ્યા છે.
કંપનીઓ અને વર્કર્સ માટે આનો શું અર્થ છે?
જે કંપનીઓ પોતાની રીતે ઇમિગ્રેશન સંબંધિત બાબતોનું સંચાલન કરી રહી છે, તેમને પોતાની ટીમોની પ્રવૃત્તિઓની સમીક્ષા કરવાની સલાહ આપવામાં આવી છે. તેમણે મૂલ્યાંકન કરવું જોઈએ કે તેમને કોઈ અધિકૃત વ્યક્તિની જરૂર છે કે નહીં. જો કંપનીના કર્મચારીઓ જરૂરી પરવાનગી વિના ઇમિગ્રેશન સંબંધિત સલાહ આપે છે અથવા પ્રતિનિધિત્વ કરે છે અને તેના માટે પૈસા લે છે, તો તેમને દંડ ભરવો પડી શકે છે અને તેમના ઉલ્લંઘનોની વિગતો જાહેર પણ કરવામાં આવી શકે છે.
કંપનીઓ અને વિદેશી નાગરિકોને તેમના ઇમિગ્રેશન પ્રતિનિધિઓનાં દસ્તાવેજો અને તેમની પાસે રહેલી અધિકૃતતાની તપાસ કરવાની પણ સલાહ આપવામાં આવી છે. તેમણે એ પણ સુનિશ્ચિત કરવું જોઈએ કે અરજી સાથે રજૂ કરવામાં આવેલી તમામ માહિતી સંપૂર્ણપણે સાચી હોય.
