Neha Panchal Success Story: UPPSCમાં 9 વખત નિષ્ફળતા છતાં હાર ન માની, ભાઈનું સપનું પૂરું કરી નેહા પંચાલ બન્યાં ડેપ્યુટી કલેક્ટર

લગ્ન, દીકરીની જવાબદારી અને 40 લાખનું દેવું, નેહા પંચાલે UPPSC 2024માં પ્રથમ ક્રમ મેળવી રચ્યો ઇતિહાસ

Neha Panchal Success Story: UPPSC ટૉપર નેહા પંચાલની સફળતાની કહાણી સંઘર્ષ, અડગ સંકલ્પ અને એક બહેનના પ્રેમની ભાવનાત્મક સફર છે. દિલ્હીના એક સામાન્ય પરિવાર સાથે સંબંધ ધરાવતાં નેહાએ પોતાના ભાઈ વિનિતને નાની ઉંમરે બ્રેઇન ટ્યુમરના કારણે ગુમાવ્યો હતો. ભાઈની છેલ્લી ઇચ્છા હતી કે તેઓ અધિકારી બને અને આ જ તેમનું લક્ષ્ય બની ગયું. લગ્ન, ઘર અને દીકરીની જવાબદારીઓ તથા લાખો રૂપિયાનું દેવું હોવા છતાં તેમણે પુસ્તકો હાથમાં લીધાં.

UPSC અને UPPSCની પરીક્ષાઓમાં સતત 9 વખત નિષ્ફળ થયા પછી પણ હાર માનવાનો વિકલ્પ નહોતો. ત્યારબાદ એક દિવસ તેમનો વર્ષોનો સંઘર્ષ પૂરો થયો અને તેમણે UPPSCમાં પ્રથમ ક્રમ મેળવી ટોચનું સ્થાન પ્રાપ્ત કર્યું. આજે તેઓ ડેપ્યુટી કલેક્ટર છે. ચાલો, આ સફળતાની કહાણીમાં જાણીએ કે તેમણે સંઘર્ષો વચ્ચે સફળતાની સફર કેવી રીતે પૂરી કરી.

દિલ્હીથી આવે છે નેહા, સંઘર્ષથી ભરેલી શરૂઆત અને લાખોનું દેવું

નેહા પંચાલની સફળતાની કહાણી સંઘર્ષની ગાથા વર્ણવે છે. એક મુલાકાતમાં તેઓ જણાવે છે કે દિલ્હીના સામાન્ય પરિવારમાંથી આવ્યાં બાદ 2013માં તેમને સૌથી મોટો આઘાત ત્યારે લાગ્યો, જ્યારે તેમના 17 વર્ષના ભાઈને બ્રેઇન ટ્યુમર હોવાનું નિદાન થયું. સારવાર માટે પરિવાર પર 40 લાખ રૂપિયાનું ભારે દેવું થઈ ગયું. ભાઈના અવસાન અને ઘરની આર્થિક તંગીએ તેમનાં સપનાં જાણે વિખેરાઈ જવા મજબૂર કર્યાં હતાં.

લગ્ન પછી જવાબદારીઓ, અધિકારી બનવા માટે હાથમાં લીધાં પુસ્તકો

ભાઈના અવસાનના માત્ર 3 મહિના પછી, એપ્રિલ 2015માં નેહાનાં લગ્ન કરાવી દેવામાં આવ્યાં. ઘરની જવાબદારીઓ નિભાવવાની અને સાસરિયાંના વાતાવરણમાં અનુકૂળ થવાની સાથે તેમના માટે આગળ વધવું સરળ નહોતું. 2016માં દીકરીને જન્મ આપ્યા પછી પારિવારિક જવાબદારીઓ અને ભવિષ્ય વચ્ચે સંતુલન જાળવવું તેમની સૌથી મોટી કસોટી હતી. પરંતુ તેમની અંદર અધિકારી બનવાનું સપનું ક્યારેય સમાપ્ત થયું નહીં.

સ્પર્ધાત્મક પરીક્ષાઓમાં 9 વખત નિષ્ફળતા, પરંતુ હિંમત ન તૂટી

2018થી નેહાએ UPSCની તૈયારીનો મુશ્કેલ માર્ગ ફરી પસંદ કર્યો. સતત 3 વખત પ્રિલિમ્સમાં નિષ્ફળતા મળી. 2021માં તેઓ માત્ર 2 ગુણથી પસંદગી પામતાં રહી ગયાં. તેમને ખૂબ નિરાશા થઈ અને લોકોએ પણ તેમને વિવિધ વાતો સંભળાવી. ત્યારબાદ UPPSCમાં 2022 અને 2023માં પણ તેમને નિષ્ફળતા મળી. 9 વખત નિષ્ફળ થયા પછી પણ તેમણે હાર માનવાનું કે અટકી જવાનું પસંદ કર્યું નહીં.

પરિવારનો સાથ, UPPSC 2024માં પ્રથમ ક્રમ મેળવી ટોચનું સ્થાન પ્રાપ્ત કર્યું

આ મુશ્કેલ સમયમાં નેહાના પતિ અને માતાએ તેમની ઢાલ બનીને સાથ આપ્યો. સતત 9 વખત નિષ્ફળતા મળ્યા પછી પણ તેમણે હાર માની નહીં અને 2024માં UPPSCની પરીક્ષામાં પોતાની મહેનત સાબિત કરી. રાત્રે 1:30 વાગ્યે જ્યારે તેમના પતિએ તેમને પ્રથમ ક્રમે આવ્યાના સમાચાર આપ્યા, ત્યારે નેહાની આંખોમાં ખુશીનાં આંસુ હતાં.

ડેપ્યુટી કલેક્ટર બનીને નેહાએ ભાઈને આપેલું વચન પૂરું કર્યું

આ પરીક્ષામાં માત્ર ટોચનું સ્થાન જ મેળવ્યું નહીં, પરંતુ ડેપ્યુટી કલેક્ટર બનીને પોતાનું અને પોતાના ભાઈનું સપનું પણ પૂરું કર્યું. નેહાની સફળતાની આ સફર એ તમામ મહિલાઓ માટે એક ઉદાહરણ છે, જેઓ લગ્ન અને ઘરેલુ જવાબદારીઓ પછી પોતાનાં સપનાં અધૂરાં માની લે છે. તેમણે સાબિત કરી દીધું કે ઉંમર અને પરિસ્થિતિઓ અવરોધ બને છે એ માત્ર માનસિક વિચાર છે. દૃઢ ઇચ્છાશક્તિ સાથે પ્રતિકૂળ સંજોગોને હરાવીને પણ શિખર સુધી પહોંચી શકાય છે. તેમની સફળતાનો મંત્ર માત્ર અડગ સંકલ્પ અને પરિવારનો અતૂટ વિશ્વાસ છે.