UAE Job Exploration Visa: શું તમે દુબઈ અથવા સંયુક્ત આરબ અમીરાત (UAE)ના અન્ય કોઈ અમીરાતમાં જૉબ કરવા માંગો છો, પરંતુ તમારી પાસે જૉબ સ્પૉન્સરશિપ નથી? જો તમારો જવાબ હા છે, તો તમારા માટે એક સારા સમાચાર છે. જૉબ ઑફર અથવા સ્પૉન્સરશિપ વિના પણ દુબઈમાં જૉબ માટે જઈ શકાય છે. હવે તમે વિચારી રહ્યા હશો કે એવો કયો રસ્તો છે, જેના દ્વારા જૉબ ઑફર વિના પણ દુબઈ જઈ શકાય છે. આજે આપણે આ જ રસ્તા વિશે જાણીશું.
UAEમાં કામ કરવા ઇચ્છતા ભારતીય સ્કિલ્ડ પ્રોફેશનલ્સ, કોઈ સ્થાનિક કંપની અથવા સ્પૉન્સર વિના દુબઈમાં નોકરી શોધવા માટે જઈ શકે છે. UAEનું ‘જૉબ એક્સપ્લોરેશન વિઝિટ વિઝા’ નોકરી શોધનારાઓને ઇન્ટરવ્યૂમાં સામેલ થવા, ભરતી પ્રક્રિયામાં ભાગ લેવા અને અમીરાતમાં રોજગારની તકો શોધવાની સુવિધા આપે છે. સરળ ભાષામાં કહીએ તો ભારતીય વર્કર્સ આ વિઝા દ્વારા જૉબ શોધવા માટે દુબઈ અથવા અન્ય અમીરાતમાં જઈ શકે છે.
જે ભારતીયો કામ માટે UAE જવાની યોજના બનાવી રહ્યા છે, તેમના માટે આ વિઝા ભારતમાંથી નોકરી માટે અરજી કરવાને બદલે દુબઈમાંથી જ નોકરી શોધવાનો વિકલ્પ આપે છે. નોકરી શોધવા માટે જરૂરી સમયના આધારે અરજદારો 60 દિવસ, 90 દિવસ અથવા 120 દિવસનો વિઝા પસંદ કરી શકે છે. લાગુ નિયમો અને મંજૂરી હેઠળ UAEમાં રહેવાનો સમય વધારી શકાય છે અને કુલ અવધિ 180 દિવસ સુધી થઈ શકે છે.
વિઝિટ વિઝા માટે કોણ અરજી કરી શકે છે?
- વિઝા માટે ભારતીયો પાસે સામાન્ય રીતે બૅચલર ડિગ્રી અથવા તેની સમકક્ષ લાયકાત હોવી જોઈએ.
- વર્કરને જે જૉબ જોઈએ છે, તે UAEના માનવ સંસાધન અને અમીરાતીકરણ મંત્રાલય (MOHRE)ના વર્ગીકરણ અનુસાર સ્કિલ લેવલ 1, 2 અથવા 3 હેઠળ આવતી હોવી જોઈએ.
- તાજેતરમાં ગ્રેજ્યુએટ થયેલા ભારતીયો પણ આ માટે યોગ્ય હોઈ શકે છે, જો તેમણે પોતાની ડિગ્રી છેલ્લા બે વર્ષની અંદર એવી યુનિવર્સિટીમાંથી પૂર્ણ કરી હોય, જે માન્ય આંતરરાષ્ટ્રીય રૅન્કિંગમાં વિશ્વની ટૉપ 500 સંસ્થાઓમાં સામેલ હોય.
- અરજદારોએ એ પણ દર્શાવવું પડી શકે છે કે UAEમાં રહેવા દરમિયાન પોતાનો ખર્ચ ઉઠાવવા માટે તેમની પાસે પૂરતા પૈસા છે.
ભારતીયોને વિઝા માટે શું જોઈએ?
અરજદારોએ કેટલાક દસ્તાવેજો તૈયાર કરવા પડશે, જેમ કે ઓછામાં ઓછા છ મહિના માટે વૅલિડ પાસપોર્ટ, તાજેતરના ફોટોગ્રાફ અને એજ્યુકેશનલ સર્ટિફિકેટ એટલે કે ડિગ્રી અને સ્કૂલની માર્કશીટ. અરજદારની કૅટેગરીના આધારે આર્થિક સ્થિતિનો પુરાવો પણ માંગવામાં આવી શકે છે. અરજી GDRFA દુબઈના ઑનલાઇન ચૅનલ્સ અથવા ‘ફેડરલ ઑથોરિટી ફૉર આઇડેન્ટિટી, સિટિઝનશિપ, કસ્ટમ્સ એન્ડ પોર્ટ સિક્યુરિટી’ (ICP) દ્વારા જમા કરી શકાય છે.
અરજદારોએ પોતાની ખાનગી માહિતી આપવી પડશે, વિઝાની અવધિ પસંદ કરવી પડશે, જરૂરી દસ્તાવેજો અપલોડ કરવા પડશે અને લાગુ ફીની ઑનલાઇન પેમેન્ટ કરવી પડશે. મંજૂરી મળ્યા બાદ વિઝા ઇલેક્ટ્રૉનિક રીતે જારી કરવામાં આવે છે. આ રસ્તાનો ઉપયોગ કરવાની યોજના બનાવી રહેલા ભારતીયો માટે મુખ્ય ફાયદો એ છે કે તેઓ દુબઈમાં રહેતા હોવા દરમિયાન જ યોગ્ય જૉબ શોધી શકે છે, કંપનીઓને મળી શકે છે અને ઇન્ટરવ્યૂમાં સામેલ થઈ શકે છે.
જોકે, વિઝા મળવાથી જૉબની ગૅરંટી મળતી નથી. નોકરી શોધનારાઓએ રજિસ્ટર્ડ સરકારી ચૅનલ્સ દ્વારા એલિજિબિલિટીની લેટેસ્ટ શરતો, ફી અને નિયમોની તપાસ કરવી જોઈએ અને જૉબ અથવા વિઝાની ગૅરંટી આપવાનો દાવો કરતા એજન્ટો અથવા સંસ્થાઓથી બચવું જોઈએ.
