UK Skoll MBA Scholarship: UK માં MBA કરવાનું સપનું થશે સાકાર, ઓક્સફર્ડની સ્કોલ MBA સ્કોલરશિપ 2027 માટે અરજી શરૂ
UK Skoll MBA Scholarship: દુનિયામાં ઉચ્ચ શિક્ષણ માટે ઓક્સફર્ડ યુનિવર્સિટીને સૌથી શ્રેષ્ઠ સંસ્થા માનવામાં આવે છે. બ્રિટનની આ યુનિવર્સિટીમાં અભ્યાસ કરવાનો ખર્ચ પણ ઓછો નથી, ખાસ કરીને જો તમારે માસ્ટર ઑફ બિઝનેસ એડમિનિસ્ટ્રેશન (MBA)નો અભ્યાસ કરવો હોય. સારી વાત એ છે કે એવી ઘણી સંસ્થાઓ છે, જે ઓક્સફર્ડમાં અભ્યાસ કરવા માટે સ્કોલરશિપ આપે છે. આવી જ એક સંસ્થા ઓક્સફર્ડમાં MBA કરવા માટે સ્કોલરશિપ આપી રહી છે.
આંત્રપ્રેન્યોરશિપ સાથે જોડાયેલી સંસ્થા સ્કોલ સેન્ટર ઓક્સફર્ડ યુનિવર્સિટીમાં MBA કરવા માટે ‘સ્કોલ MBA સ્કોલરશિપ 2027’ આપી રહી છે. જો તમે ઓક્સફર્ડ યુનિવર્સિટીમાંથી MBA કરવાનું સપનું જોઈ રહ્યા છો, તો તમારા માટે આ સારા સમાચાર છે, કારણ કે તમે પણ તેના માટે અરજી કરી શકો છો. આ સ્કોલરશિપ ઓક્સફર્ડના સૈડ બિઝનેસ સ્કૂલમાં અભ્યાસ કરવા માટે આપવામાં આવી રહી છે અને તેના માટે એપ્લિકેશન પ્રક્રિયાની શરૂઆત થઈ ચૂકી છે.
MBA સ્કોલરશિપના ફાયદા શું છે?
ટ્યુશન ફી માફ: સ્કોલરશિપ મેળવનારા વિદ્યાર્થીની MBA કોર્સની સંપૂર્ણ ફી માફ કરવામાં આવશે.
રહેવા-જમવાનો ખર્ચ: અભ્યાસ દરમિયાન બ્રિટનમાં રહેવા અને જમવા માટે દર વર્ષે 21,805 પાઉન્ડ (આશરે 28 લાખ રૂપિયા) આપવામાં આવશે.
સ્કોલર્સ કમ્યુનિટીની સભ્યતા: વિદ્યાર્થીને ‘સ્કોલ સ્કોલર કમ્યુનિટી’નો ભાગ બનવાની તક મળશે, જેના દ્વારા વિશ્વભરના અગ્રણી સોશિયલ ઇનોવેટર્સ અને લીડર્સ સાથે નેટવર્કિંગ કરવાની અને શીખવાની તક મળશે.
સ્કોલરશિપ લિંક: UK Skoll MBA Scholarship
ઓક્સફર્ડ સ્કોલરશિપ માટે કોણ અરજી કરી શકે?
વિદ્યાર્થીનું શૈક્ષણિક પૃષ્ઠભૂમિ સારું હોવું જોઈએ. તેની પાસે કોઈ માન્યતા પ્રાપ્ત સંસ્થામાંથી મળેલી બેચલર્સ ડિગ્રી હોવી જોઈએ.
વિદ્યાર્થીનો સોશિયલ આંત્રપ્રેન્યોરશિપમાં મજબૂત ટ્રેક રેકોર્ડ હોવો જોઈએ. પોતાનું સોશિયલ વેન્ચર હોય તો પ્રાથમિકતા મળી શકે છે.
સ્કોલરશિપ માટે અરજી કરતી વખતે એ સાબિત કરવું પડશે કે MBAની ભારે ફી ચૂકવવી શક્ય નથી.
વિદ્યાર્થીમાં સોશિયલ આંત્રપ્રેન્યોર તરીકેની ક્ષમતા હોવી જોઈએ.
તેના કાર્યથી સમાજ પર સકારાત્મક અને સ્થાયી અસર દેખાતી હોવી જોઈએ.
ઓક્સફર્ડ MBA માટે નિર્ધારિત અંગ્રેજી ભાષાની જરૂરિયાતો (જેમ કે IELTS/TOEFL) પૂર્ણ કરવી ફરજિયાત છે.
સ્કોલરશિપ માટે અરજી કેવી રીતે કરવી?
ઓક્સફર્ડમાં અભ્યાસ માટે મળતી આ સ્કોલરશિપ માટે ઓનલાઇન અરજી કરવી પડશે. સૌથી પહેલા તમારે ઓક્સફર્ડ સૈડ બિઝનેસ સ્કૂલના MBA પ્રોગ્રામ માટે સીધી અરજી કરવી પડશે અને સંપૂર્ણ MBA એપ્લિકેશન સબમિટ કરવી પડશે. એપ્લિકેશન ફોર્મના ફંડિંગ સેકશનમાં તમને ‘સ્કોલ સ્કોલરશિપ નિબંધ’ મળશે, જેને પૂર્ણ કરીને સબમિટ કરવું જરૂરી છે. MBA એપ્લિકેશન અને સ્કોલરશિપ નિબંધ બંને 8 જાન્યુઆરી 2027 પહેલાં પૂર્ણ કરવા પડશે. શોર્ટલિસ્ટ કરવામાં આવેલા ઉમેદવારોને ઇન્ટરવ્યૂ સહિતની પસંદગી પ્રક્રિયાના આગામી તબક્કા માટે બોલાવવામાં આવશે.
