Turkey Hotel Massive Fire: તૂર્કીની એક સ્કી રિસોર્ટ હોટલમાં આગ ફાટી નીકળતાં 66થી વધુ લોકોના મોત નીપજ્યા છે. જ્યારે 51 ઘાયલ થયા છે. બચાવ કામગીરી ચાલુ છે. વાયરલ ફૂટેજમાં હોટલની છત અને ઉપરના માળમાં આગ લાગી હતી. આ ભયાવહ આગના કારણે આકાશમાં ધુમાડાના ગોટેગોટા જોવા મળ્યા હતા. તૂર્કીના ગૃહ મંત્રી અલી યેરલિકાયાએ પણ આ વાતની પુષ્ટિ કરી છે.
યેરલિકાયાએ મીડિયાને જણાવ્યું હતું કે, સ્કી રિસોર્ટ હોટલમાં અચાનક આગ લાગતાં 66 લોકોએ જીવ ગુમાવ્યા છે. સ્થાનિક સમયાનુસાર મંગળવારે વહેલી સવારે 3:27 વાગ્યે કાર્તલકાયાના પહાડની ટોચે સ્થિત રિસોર્ટમાં 12 માળની ગ્રાન્ડ કાર્ટલ હોટલની રેસ્ટોરન્ટમાં આગ લાગી હતી. જેમાં ઘણા લોકો ગૂંગળામણના કારણે મૃત્યુ પામ્યા હતા. સ્કૂલોમાં રજાઓના કારણે 80થી 90 ટકા રિસોર્ટ પેક હતો. 230થી વધુ ગેસ્ટએ ચેક ઈન કરેલું હતું.
હોટલમાં સ્કી ઈન્સ્ટ્રક્ટર નેકમી કેપસેટુટને મીડિયાને જણાવ્યું હતું કે, ઈમારતમાંથી લગભગ 20 લોકોને બહાર કાઢવામાં સફળ રહ્યા હતા. પરંતુ ધૂમાડો વધતાં કંઈ જ દેખાતું ન હોવાથી લોકોને બચાવવા માટે રસ્તો શોધવો મુશ્કેલ બન્યો હતો.
ફાયર બ્રિગેડની 30 ગાડીઓ અને 28 એમ્બ્યુલન્સ પહોંચી
આરોગ્ય મંત્રી કેમલ મેમિસોગ્લુએ જણાવ્યું હતું કે, ‘ઘટના સ્થળ પર ફાયર બ્રિગેડની 30 ગાડીઓ અને 28 એમ્બ્યુલન્સ પહોંચી હતી. પરંતુ હોટલ પહાડની ટોચ પર હોવાથી આગ પર કાબૂ મેળવવામાં મુશ્કેલીઓ નડી રહી છે. આસપાસની અન્ય હોટલને પણ ખાલી કરવા અપીલ કરી છે. આગ લાગવા પાછળનું કારણ હજી જાણી શકાયુ નથી.’
