Ahmedabad Cyber Fraud: અમદાવાદના ચાંદખેડા વિસ્તારમાં રહેતા એક વેપારી સાથે ઓનલાઈન બેન્કિંગ છેતરપિંડીનો ચોંકાવનારો કિસ્સો સામે આવ્યો છે. હેકરે વેપારીના કરન્ટ એકાઉન્ટના નેટ બેન્કિંગમાં ગેરકાયદે પ્રવેશ મેળવી કોઈપણ OTP કે નવા બેનિફિશિયરી ઉમેર્યાનો મેસેજ મોકલ્યા વિના જ ખાતામાંથી 68.31 લાખ રૂપિયાની રકમ ટ્રાન્સફર કરી લીધી હતી. આ ઘટના સામે આવ્યા બાદ વેપારીએ પોલીસમાં ફરિયાદ નોંધાવી છે.
ધોલેરાથી પરત ફરતી વખતે છેતરપિંડીનો ખુલાસો
મળતી માહિતી મુજબ, ચાંદખેડામાં રહેતા 36 વર્ષીય વેપારી પોતાની કંપની ચલાવે છે. ગત 4 નવેમ્બરના રોજ તેઓ ધોલેરાથી ઓફિસ તરફ પરત ફરી રહ્યા હતા. તે દરમિયાન બપોરે આશરે 1:30 વાગ્યે તેમના મોબાઈલ પર બેન્ક ખાતામાંથી 10 લાખ રૂપિયા ડેબિટ થયાનો મેસેજ આવ્યો હતો.
અચાનક આટલી મોટી રકમ ઉપડી જતાં વેપારી ચોંકી ગયા હતા. તેમણે તરત જ બેન્કનો સંપર્ક કરીને ખાતું હોલ્ડ કરવા અને વ્યવહારો બંધ કરવાની વિનંતી કરી હતી. જોકે, બેન્કનો સંપર્ક કર્યા દરમિયાન પણ ખાતામાંથી અન્ય રકમ ટ્રાન્સફર થવાના મેસેજ આવવા લાગ્યા હતા.
OTP વિના કેવી રીતે થયું 68 લાખનું ટ્રાન્ઝેક્શન?
આ ઘટનામાં સૌથી ચિંતાજનક બાબત એ છે કે છેતરપિંડી દરમિયાન વેપારીના રજિસ્ટર્ડ મોબાઈલ નંબર પર કોઈ OTP આવ્યો નહોતો. એટલું જ નહીં, નવા બેનિફિશિયરી ઉમેરવામાં આવ્યા હોવાનો મેસેજ પણ મળ્યો નહોતો.
ફરિયાદ મુજબ, અજાણ્યા હેકરે નેટ બેન્કિંગ સાથે જોડાયેલા ડેટાની મદદથી સિસ્ટમમાં પ્રવેશ મેળવ્યો હતો. ત્યારબાદ અલગ-અલગ બેન્ક ખાતાઓમાં કુલ 68,31,539 રૂપિયા ટ્રાન્સફર કરી લીધા હતા.
ઘટનાની જાણ થતાં વેપારીએ પોતાના ભાગીદારને બેન્કમાં મોકલ્યા હતા અને સાયબર હેલ્પલાઈન નંબર 1930 પર ફરિયાદ નોંધાવી હતી. હવે આ મામલે પોલીસ દ્વારા ફરિયાદના આધારે તપાસ હાથ ધરવામાં આવી છે.

