વડોદરાઃ પાદરામાં મોબાઈલ બાબતે થયેલી લડાઈમાં યુવકનું મોત
પાદરા તાલુકાના ડભાસા ગામે રહેતા 28 વર્ષીય વિકેશ ઉર્ફે વિકાસ સનાભાઈ પાટણવાડિયાનો મોબાઈલ ફોન સુરેશ તડવી નામના શખ્સે બળજબરીથી આંચકી લીધો હતો. સોખરા કેનાલ પાસે વિકેશ ઉર્ફે વિકાસ, તેનો ભાઈ કિરીટ અને અન્ય લોકો સુરેશ તડવીને આ વાત સમજાવવા જતા હતા ત્યારે સુરેશ, વિશાલ અને એક મહિલા સહિત કુલ પાંચ લોકોએ લાકડીઓ વડે બંને ભાઈઓ પર હુમલો કર્યો હતો.
માથામાં ગંભીર ઈજાના કારણે વિકેશ ઉર્ફે વિકાસનું ઘટનાસ્થળે જ મોત નીપજ્યું હતું. જ્યારે કિરીટને માથામાં ઘા છે. આ બનાવ અંગે પાદરા પોલીસે ગુનો નોંધી કાયદેસરની કાર્યવાહી હાથ ધરી છે.
