Gujarat ATS Tramadol Smuggling Raid: ગુજરાત એન્ટી ટેરરિઝમ સ્ક્વોડ (ATS) દ્વારા ડ્રગ્સ અને ગેરકાયદેસર સાયકોટ્રોપિક પદાર્થોના સ્મગલિંગ સામે આક્રમક કાર્યવાહી કરવામાં આવી છે. એક ખાસ ઓપરેશન દરમિયાન, ATSની ટીમે અંકલેશ્વરથી રાજસ્થાન તરફ લઈ જવામાં આવતા 8 કરોડ 32 લાખ રૂપિયાની કિંમતના 2,08,000 ટેબ્લેટનો જથ્થો ઝડપી પાડ્યો છે. આ ટેબ્લેટ્સ ‘ટ્રામાડોલ હાઈડ્રોક્લોરાઈડ’ અને ‘સ્કોવિડોલ-100’ જેવી બ્રાન્ડની હતી. ATSના નાયબ પોલીસ અધિક્ષક એસ.એલ. ચૌધરી અને તેમની ટીમની સતર્કતાને કારણે, રાજસ્થાનના ઉદયપુર જિલ્લાના ગોગુન્ડા તાલુકામાંથી આ કાળા કારોબારના મુખ્ય સૂત્રધાર પરેશ પારસમલ જૈનની ધરપકડ કરવામાં આવી છે. આ જથ્થો શાહીબાગ વિસ્તારમાંથી પસાર થતી એક લક્ઝરી બસમાંથી કબજે કરવામાં આવ્યો હતો.
આરોપીનો ગુનાહિત ઈતિહાસ અને આંતરરાષ્ટ્રીય લિંક્સ
પૂછપરછ દરમિયાન પરેશ જૈનની કબૂલાતથી ચોંકાવનારા ખુલાસા થયા છે. તેણે મે 2026થી અત્યાર સુધીમાં કુલ 25 બેચમાં 62 લાખથી વધુ ટેબ્લેટ્સ મંગાવીને રાજસ્થાન અને ઉત્તરપ્રદેશમાં વેચી હોવાનું સામે આવ્યું છે. પરેશ જૈન કોઈ સામાન્ય ગુનેગાર નથી, પરંતુ તે અગાઉ પણ NDPS એક્ટ હેઠળ પકડાઈ ચૂક્યો છે. હરિદ્વાર અને થાણેમાં ‘કોડીન કફ સીરપ’ના કેસમાં તેનું નામ સામે આવ્યું હતું, એટલું જ નહીં, ગત મહિને વાપી ખાતેથી પકડાયેલા 2.38 કિલો મેક્રેડ્રોન કેસમાં પણ તે વોન્ટેડ હતો. વારંવારના ગુનાઓ છતાં તે નશાના વેપારમાં સક્રિય હતો, પરંતુ આ વખતે ATSની ટેક્નિકલ ટીમે તેને પાંજરે પૂર્યો છે.
ગુજરાત પોલીસની ‘ઝીરો ટોલરન્સ’ નીતિ
રાજ્ય સરકારની નશા વિરોધી અને ‘ઝીરો ટોલરન્સ’ નીતિના ભાગરૂપે ATS દ્વારા સતત સ્મગલિંગ નેટવર્ક પર નજર રાખવામાં આવી રહી છે. આ ઓપરેશનમાં ATSના પી.આઈ. વી.એન. વાઘેલા અને તેમની ટીમે અત્યાધુનિક તકનીકી સાધનોનો ઉપયોગ કરીને આરોપીનું લોકેશન ટ્રેસ કર્યું હતું. પોલીસે 160 બોક્સમાંથી કુલ 4,160 સ્ટ્રીપ્સ કબજે કરી છે. હાલમાં આ ડ્રગ માફિયાને કોર્ટમાં રજૂ કરીને પોલીસે વધુ રિમાન્ડની માંગણી કરી છે, જેથી આ આખા નેટવર્કમાં બીજા કોણ કોણ સંડોવાયેલા છે અને આ જથ્થો કોને સપ્લાય કરવામાં આવતો હતો, તેની ઊંડી તપાસ થઈ શકે. ગુજરાત પોલીસની આ કાર્યવાહી નશાના વેપાર સાથે જોડાયેલા તત્વોમાં ફફડાટ ફેલાવી રહી છે.
