Mehsana Political Murder Case: મહેસાણા શહેરમાં સ્થાનિક સ્વરાજ્યની ચૂંટણીના પ્રચારના અંતિમ તબક્કે કાયદો અને વ્યવસ્થાની સ્થિતિ કથળી છે. વોર્ડ નંબર 4 માં ભાજપ અને કોંગ્રેસના સમર્થકો વચ્ચે થયેલી જૂથ અથડામણે લોહિયાળ સ્વરૂપ ધારણ કર્યું છે. આ હિંસક ઘટનામાં ભાજપના ઉમેદવારના ભાણા મિતેન ચૌધરી પર જીવલેણ હુમલો કરવામાં આવ્યો હતો, જેમાં તેનું કરુણ મોત નિપજ્યું છે. ચૂંટણી ટાણે બનેલી આ ઘટનાને પગલે સમગ્ર મહેસાણા પંથકમાં ભારેલા અગ્નિ જેવી સ્થિતિ સર્જાઈ છે અને રાજકીય માહોલ વધુ ગરમાયો છે.
તાવડિયા રોડ પર આયોજનબદ્ધ હુમલો
પોલીસના જણાવ્યા અનુસાર, આ ઘટના ગઈકાલે મોડી રાત્રે માનવઆશ્રમ ચોકડીથી તાવડિયા રોડ તરફ જવાના રસ્તા પર બની હતી. મિતેન ચૌધરી અને તેના મિત્રો ગાડીમાં પસાર થઈ રહ્યા હતા ત્યારે ચારથી પાંચ અજાણ્યા શખસોએ તેમની ગાડી આંતરી હતી. હુમલાખોરોએ પૂર્વ આયોજિત કાવતરા મુજબ તીક્ષ્ણ હથિયારો, લાકડીઓ અને પાઈપ વડે યુવકો પર હુમલો કર્યો હતો. મિતેન ચૌધરીને ગંભીર ઈજાઓ થતા તેને હોસ્પિટલ ખસેડાયો હતો, જ્યાં સારવાર દરમિયાન તેણે દમ તોડ્યો હતો. આ હુમલામાં ધીમંત ચૌધરી નામનો અન્ય એક યુવક પણ ગંભીર રીતે ઈજાગ્રસ્ત થયો છે.
પોલીસ તપાસ અને સીસીટીવી ફૂટેજની ચકાસણી
હત્યાની જાણ થતા જ DySP સહિત લોકલ ક્રાઈમ બ્રાન્ચ (LCB) અને શહેર પોલીસનો મોટો કાફલો ઘટનાસ્થળે અને હોસ્પિટલ દોડી આવ્યો હતો. પ્રાથમિક તપાસમાં આ જૂથ અથડામણમાં કોંગ્રેસના ઉમેદવારના પતિને પણ ઈજાઓ પહોંચી હોવાની વિગતો સામે આવી રહી છે. પોલીસે હુમલાખોરોને ઝડપી પાડવા માટે વિસ્તારના સીસીટીવી (CCTV) ફૂટેજ કબજે કર્યા છે અને ટેકનિકલ સર્વેલન્સની મદદથી તપાસ તેજ કરી છે. આરોપીઓને પકડવા માટે અલગ-અલગ ટીમો બનાવીને ઠેર-ઠેર દરોડા પાડવામાં આવી રહ્યા છે.
ચૂંટણી પૂર્વે સુરક્ષા વ્યવસ્થામાં વધારો
ચૂંટણીના મતદાનના બરાબર એક દિવસ પહેલા બનેલી આ ઘટનાથી વહીવટી તંત્ર પણ ચિંતિત બન્યું છે. શહેરમાં કોઈ અનિચ્છનીય બનાવ ન બને તે માટે સંવેદનશીલ વિસ્તારોમાં પોલીસનો ચુસ્ત બંદોબસ્ત ગોઠવી દેવામાં આવ્યો છે. રાજકીય પક્ષોના નેતાઓએ આ ઘટનાની ટીકા કરી છે અને શાંતિ જાળવવા અપીલ કરી છે. જોકે, ચૂંટણી પ્રચારની અદાવત જ્યારે ખૂની ખેલ સુધી પહોંચી છે, ત્યારે મતદારોમાં પણ ફાળ પડી છે. હાલ પોલીસ સમગ્ર મામલામાં હત્યાનો ગુનો નોંધી આરોપીઓના મૂળ સુધી પહોંચવા પ્રયાસ કરી રહી છે.
