Narmada BJP MLA Darshana Deshmukh Protest: નર્મદા જિલ્લાના રાજપીપળા શહેરમાંથી ભાજપ સંગઠન અને ચૂંટાયેલા જનપ્રતિનિધિઓ વચ્ચેનો આંતરિક ડખો સપાટી પર આવ્યો છે. રાજપીપળાના બાબાસાહેબ આંબેડકર હોલ ખાતે પ્રધાનમંત્રીના સુશાસનના ૧૨ વર્ષ પૂર્ણ થવા બદલ એક ભવ્ય સરકારી કાર્યક્રમનું આયોજન કરવામાં આવ્યું હતું. આ હાઈપ્રોફાઈલ કાર્યક્રમમાં પ્રભારી મંત્રી ઈશ્વરસિંહ પટેલ (Ishwarsinh Patel), પૂર્વ વનમંત્રી ગણપત વસાવા (Ganpat Vasava) અને સીનિયર સાંસદ મનસુખ વસાવા (Mansukh Vasava) મંચ પર ઉપસ્થિત હતા. જોકે, ચાલુ કાર્યક્રમમાં જ નાંદોદના મહિલા ધારાસભ્ય ડૉ. દર્શનાબેન દેશમુખ (Dr. Darshanaben Deshmukh) નું પ્રોટોકોલ મુજબ સન્માન ન જળવાતા તેમણે મંચ પરથી જ બળવો પોકારી વૉકઆઉટ કર્યો હતો, જેના કારણે ગુજરાતના રાજકારણમાં ભારે ગરમાવો આવી ગયો છે.
ભાષણ કરવા ન દેતાં મહિલા ધારાસભ્યનો મંચ પર જ હલ્લાબોલ
આ વિવાદની શરૂઆત ત્યારે થઈ જ્યારે કાર્યક્રમના સંચાલકો દ્વારા સ્થાનિક ધારાસભ્ય ડૉ. દર્શનાબેન દેશમુખને પ્રવચન આપવાની તક આપ્યા વિના જ સીધું સાંસદ મનસુખ વસાવાને માઇક સોંપી દેવામાં આવ્યું હતું. આ જોઈને ધારાસભ્ય અને સાંસદ બંને જિલ્લા પ્રમુખ નીલ રાવ (Nil Rao) પર ભારે અકળાયા હતા. ડૉ. દર્શનાબેને હોલ ભરેલા ૩૦૦-૪૦૦ લોકોની વચ્ચે રોષ ઠાલવતા કહ્યું કે, “અહીંયા શું તમે માત્ર મારું અપમાન કરવા બોલાવો છો? હું મહિલા ધારાસભ્ય છું તો એનો મતલબ એ છે કે મારું અવારનવાર અપમાન કરવાનું? શું આ ભાજપની શિસ્તબદ્ધતા છે?” આટલું કહીને તેઓ ચાલુ કાર્યક્રમમાંથી બહાર નીકળી ગયા હતા.
ધોમધખતા તાપમાં ગાંધી પ્રતિમા પાસે ધરણા અને રાજીનામાની ચીમકી
કાર્યક્રમનો બહિષ્કાર કરીને ધારાસભ્ય ડૉ. દર્શનાબેન સીધા ગાંધી ચોક વડીયા ખાતે આવેલી ગાંધીજીની પ્રતિમા પાસે પહોંચ્યા હતા અને કાળઝાળ ગરમીમાં ધરણા પર બેસી ગયા હતા. તેમની નારાજગી જોઈને સાંસદ મનસુખ વસાવા અને અન્ય વફાદાર કાર્યકરો પણ મંત્રીઓની હાજરી છોડીને તેમની સાથે ધરણામાં જોડાયા હતા. ધારાસભ્યએ મીડિયા સમક્ષ રડતી આંખે ગંભીર આક્ષેપ કર્યો કે, “હું આદિવાસી અને મહિલા છું એટલે છેલ્લા બે વર્ષથી જિલ્લા પ્રમુખ નીલ રાવ મને ટાર્ગેટ કરે છે. ગાંધીનગરના એક મોટા મંત્રીનું પીઠબળ હોવાથી પ્રમુખ મનમાની કરે છે.” તેમણે ચીમકી આપી કે જો જિલ્લા પ્રમુખ રાજીનામું નહીં આપે તો તેઓ પોતે ધારાસભ્ય પદેથી રાજીનામું આપી દેશે.
પ્રદેશ નેતાગીરી એક્શનમાં, ગાંધીનગર સુધી પહોંચશે સંગઠનનો વિવાદ
બપોરથી શરૂ થયેલા આ હાઈવોલ્ટેજ ડ્રામા બાદ મોડી રાત્રે ભાજપ પ્રદેશ સંગઠનના વરિષ્ઠ નેતાઓ એક્શનમાં આવ્યા હતા. ગાંધીનગરથી પ્રદેશના હોદ્દેદારોએ ટેલિફોનિક વાતચીત કરીને ડૉ. દર્શનાબેનને ન્યાયની પાકી ખાતરી આપી સમજાવ્યા હતા, જેના આધારે તેમણે મોડી રાત્રે આંદોલન સમેટ્યું હતું. આગામી સોમવારે નર્મદા જિલ્લા ભાજપના સીનિયર નેતાઓની એક સ્પેશિયલ ટીમ જિલ્લા પ્રમુખ નીલ રાવ વિરુદ્ધના પુરાવાઓ લઈને ગાંધીનગર પ્રદેશ કચેરીએ જશે. હવે જોવાનું એ રહેશે કે પ્રદેશ હાઈકમાન્ડ આ આદિવાસી મહિલા ધારાસભ્યના સન્માનની લડાઈમાં જિલ્લા પ્રમુખ સામે કેવા પગલાં ભરે છે.
