Naroda Fake Call Center: અમદાવાદના નરોડા વિસ્તારમાં એક ફ્લેટની અંદર ચાલતા ગેરકાયદેસર કોલ સેન્ટર પર પોલીસે દરોડો પાડીને મોટા રેકેટનો પર્દાફાશ કર્યો છે. નરોડા પોલીસને બાતમી મળી હતી કે ‘ઇવાન-3’ નામના બિલ્ડિંગના એક ફ્લેટમાં કેટલાક યુવાનો શંકાસ્પદ પ્રવૃત્તિ કરી રહ્યા છે. પોલીસે જ્યારે દરોડો પાડ્યો ત્યારે ત્યાં ચાર યુવકો અને એક સગીર અમેરિકન નાગરિકો સાથે લેપટોપ અને મોબાઈલ દ્વારા વાતચીત કરતા ઝડપાઈ ગયા હતા. આરોપીઓ માત્ર ત્રણ દિવસ પહેલા જ આ કામ શરૂ કર્યું હતું, પરંતુ પોલીસની સતર્કતાને કારણે તેઓ લાંબો સમય બચી શક્યા નહીં. સ્થળ પરથી લેપટોપ, મોબાઈલ અને ફેક લેટરપેડ જેવો મુદ્દામાલ કબજે કરવામાં આવ્યો છે.
અમેરિકન નાગરિકોને ટાર્ગેટ કરવાની અનોખી મોડસ ઓપરેન્ડી
આ ટોળકીની કામ કરવાની પદ્ધતિ ખૂબ જ શાતિર હતી. તેઓ અમેરિકાની જાણીતી “એડવાન્સ અમેરિકા” નામની લોન કંપનીના કર્મચારી તરીકે ખોટી ઓળખ આપતા હતા. ગૂગલ વોઈસ એપ્લિકેશનનો ઉપયોગ કરીને તેઓ અમેરિકન નાગરિકોને ફોન કરતા અને તેમને સસ્તી લોનની લાલચ આપતા હતા. વિશ્વાસ જીતવા માટે તેઓ નાગરિકો પાસેથી ઓળખના પુરાવા અને વિગતો મેળવતા અને ત્યારબાદ લોન મંજૂર થઈ હોવાના નકલી લેટરપેડ મોકલતા હતા. જ્યારે કોઈ વ્યક્તિ લોન લેવા તૈયાર થાય, ત્યારે તેની પાસેથી લોન પ્રોસેસિંગ ફીના નામે રોકડને બદલે ગિફ્ટ કાર્ડ મંગાવવામાં આવતા હતા, જેથી નાણાકીય વ્યવહાર પકડાય નહીં.
કમિશનનું ગણિત અને ફરાર આરોપીઓની શોધખોળ
પોલીસ તપાસમાં બહાર આવ્યું છે કે આ સમગ્ર કૌભાંડમાં ધરપકડ કરાયેલા પાંચ આરોપીઓ ઉપરાંત મયુર મંગલાણી, સુજલ મંગલાણી અને આશિષ ઉર્ફે કેવિન નામના મુખ્ય સૂત્રધારો પણ સામેલ છે. અમેરિકાથી આવતા ગિફ્ટ કાર્ડ્સ આ ફરાર આરોપીઓને મોકલવામાં આવતા હતા, જેઓ તેને ભારતીય ચલણમાં કન્વર્ટ કરાવીને નાણાં મેળવતા હતા. આ કામના બદલામાં કોલ સેન્ટરમાં બેસીને ફોન કરનારા યુવાનોને 20 ટકા કમિશન આપવામાં આવતું હતું. મુખ્ય આરોપી મનીષ અંસાની અગાઉ કેરળ અને ગોવાના કોલ સેન્ટરોમાં કામ કરવાનો અનુભવ ધરાવે છે અને તેણે જ આ આખી ટીમ તૈયાર કરી હોવાનું જાણવા મળ્યું છે.
આરોપીઓની પ્રોફાઇલ અને સાયબર સુરક્ષાનો પડકાર
પકડાયેલા આરોપીઓ અલગ-અલગ બેકગ્રાઉન્ડ ધરાવે છે, જે દર્શાવે છે કે ટૂંકા સમયમાં વધુ પૈસા કમાવવાની લાલચે તેમને ગુનાખોરીના રસ્તે ધકેલ્યા હતા. આ ટોળકીમાં એક કોરિયોગ્રાફર, એક ડિલિવરી બોય અને વેપાર સાથે સંકળાયેલી વ્યક્તિનો સમાવેશ થાય છે. મુખ્ય આરોપી બેરોજગાર હતો, તેથી તેણે આ રસ્તો અપનાવ્યો હતો. હાલ પોલીસે ગુનો નોંધીને એ તપાસ શરૂ કરી છે કે અત્યાર સુધીમાં કેટલા અમેરિકન નાગરિકો આ ઠગાઈનો ભોગ બન્યા છે અને તેની કુલ રકમ કેટલી છે. આ કિસ્સો ફરી એકવાર સાબિત કરે છે કે સાયબર ગુનેગારો હવે ટેકનોલોજીનો ઉપયોગ કરીને સાત સમંદર પાર પણ લોકોના ખિસ્સા ખાલી કરી રહ્યા છે.
